Na tu’uaia e ni isi o faipule i se iloiloga sa faia i le vaiaso na te’a nei le Teutupe a le malo, o lana faaiuga e taofi ai le toe faia o ‘payroll deduction’ ua mafua ai ona afaina le to’atele o tagata faigaluega a le malo mai le totogia o a latou nonogatupe ma inisiua.

Mo se fa’ata’ita’iga e pei ona saunoa le alii faipule ia Vaamua Henry Sesepasara, o ni isi o tagata faigaluega a le malo ua silia i le ta’i 10 tausga o totogi a latou inisiua, ua poloka ma faaletonu a latou feagaiga (policy) on a ua faaletonu a latou peimeni (payments) i masina ta’itasi.

E o o i tagata sa faia a latou nonogatupe i faletupe ua le toe taliaina ni a latou talosaga mo ni isi nonogatupe ina ua faaletonu le totogia o a latou peimeni, aemaise ai ua le toe i ai se ‘payroll deduction’ sa faa faigofie ai ona talia e le faletupe talosaga mo ni nonogatupe.

Na faauilavea le afioga i le alii faipule ia Fetu Fetui Jr ma saunoa e faapea, o ia le isi tagata o lo o aafia i le faaiuga sa faia e le Teutupe.

“Mo lou silafia le susuga a le Teutupe, o a’u le isi tagata lea ua aafia i lau faaiuga sa faia, ua le toe maua la’u ‘life insurance’ sa totogi i fafo ina ua e taofia le payroll deduction, e te silafia le mea lena".

Na taua e Falema’o Pili i luma o le komiti e faapea, talu lava ona faia lana faaiuga e taofia ai le payroll deduction a le malo, e le o i ai lava ni isi o faasea i lea suiga, ae na saunoa Vaamua e faapea, atonu e le o tuuina atu ni faasea a tagata faigaluega a le malo ia te ia, ae o le toatele o tagata faigaluega a le malo o lo o aafia ua tuuina atu a latou faasea i faipule o latou itumalo, ma o ni isi o i latou o lo o galulue i totonu o le Ofisa o le Tupe a le malo, lea o lo o latou taua e faapea, e le o faaitiitia ni tagata faigaluega i totonu o le Ofisa o Tupe ae sei vagana ai tagata faigaluega fou o lo o faaopoopo atu pea, i se isi la faaupuga, e le o faia se gaioiga e sefe ai tupe a le malo ae na o le atili ai ona faaalu o tupe a le malo, ma atili ai ona afaina ni isi o tagata faigaluega.

Na faamanino e Falema’o i le komiti e faapea, e $156,000 le tupe a le malo ua sefe mai ina ua taofi le payroll deduction, ma o lea tupe e le gata sa alu e totogi ai ova taimi o tagata faigaluega sa gafa ma le faatinoina o gaioiga mo le payroll deduction, ae o le tau fo’i o masini ma meatotino a le malo sa faaaogaina i lea auaunaga.

Na fesili Vaamua ia Falema’o, pe sili atu ia te ia le $156,000 lea ua sefe a le malo nai lo le tulaga pagatia lea ua fetaia’i nei ma tagata faigaluega, ae na tali Falema’o i le isi fo’i fesili, pe fa’amata o se tiute o le malo le tautua o ana tagata faigaluega i le auala lea e pei ona finagalo i ai afioga i faipule.

“E faapefea ona ave e le malo lea auaunaga mo na o sina vaega o tagata ae faapefea le anoano o le atunuu atoa e le mafai ona tuuina atu i ai lea auaunaga,?” o le fesili lea a Falema’o i luma o le komiti, ma ia taua ai se tasi o itu le lelei o le payroll deduction ua ia maituina, ona o isi tagata e o o atu lava i le ta’i lima a latou payroll deduction e faia i piriota totogi uma a le malo, ma e uma ane payroll deduction nei e lima ua leai se tupe o totoe i le siaki e alu ma ia i le fale.

Na tutulu le tama’ita’i faipule ia Vui Florence Vaili Saulo a’o taumafai e faaleo sona lagona faanoanoa i le tulaga pagatia ua feagai nei ma le toatele o tagata faigaluega a le malo, talu ona taofia le payroll deduction.

Na faatepa e Vui i le teutupe le taua tele o feagaiga (policy) o lo o totogi e tagata i a latou ‘life insurance’, ae fiafia tele kamupani inisiua pe afai e motusia faafuase’i le totogiina o tupe mo policy a tagata ua silia i le ta’i 10 tausaga o totogi, aua o le a le totogiina ai e le kamupani le $50,000 pe sili atu fo’i mo le ‘life insurance.

E o o foi i tagata sa totogi inisiua mo taimi o faalavelave, ua o o i le taimi e taofia ai i le falema’i, ae siaki atu a latou inisiua ua faaletonu ina ua misi a latou peimeni (payments), ma le toe agava’a ai loa i latou i nei faamanuiga sa latou tautiga mai ai i le tele o tausaga e totogi.

Na taua e Vui lona fiamalamalama i le mafuaaga ua faia faafuase’i ai lenei faaiuga i le tipi motu faafuase’i o le ‘payroll deduction’ sa faia a le malo, e aunoa ma le tuuina atu o se avanoa o nai pisinisi o lo o tau atina’e.

Ae i le saunoaga a le afioga ia Timusa Tini Lam Yuen o ia fo’i lea o le ta’ita’ifono o le Komiti o le Paketi a le maota o sui, na ia taua ai lona faanoanoa tele i le tulaga lea ua tula’i mai, ona e foliga mai ua faaituau le faaiuga ua faia e le teutupe mo na o matagaluega a le malo ae faatuatuana’i ai pisinisi o lo o tau atina’e, ina ua tatala na o le avanoa e fai ai na o ‘payroll deductiono mo ni isi o ofisa o le malo e pei o le ASPA ma le ASTCA, ae o ‘deduction’ nei e le o faatulafonoina nei, se’i vagana ai lava ‘deduction’ e pei o le FICA ma le lafoga o mea ia o lo o faatulafono e tatau lava ona tipi mai totogi o tagata faigaluega a le malo.

Na faamanino e Falema’o i le komiti e faapea, e ui o le manulauti a le faigamalo ua i ai nei o le faamuamua lea o tagata, peitai o le tuuina atu e le malo o lana tautua mo na o se vaega o tagata faigaluega a le malo ae le o aofia ai le atunuu atoa, o se tulaga e le talafeagai i lona manatu.

Na taua e Fetui Jr e faapea, o se tasi o itu pagatia ua fetaia’i ma tagata faigaluega i Manu’a i le taimi nei talu ona taofi le ‘payroll deduction’, ua faaalu ai e le tagata e toatasi mai Manu’a le lata i le $200 mo le pasese i le va’alele e sau ai i Tutuila nei e totogi peimeni mo lana loan ma le inisiua, ma o se avega ua mamafatu mo le itumalo o Manu’a.

Ae na tali fuaitau Falema’o e faapea, o le suiga fou lea ua faia e lona ofisa amata atu i le vaiaso totogi a le malo o le a sosoo nei, o le malaga lea o sui o lona Ofisa ma le tinoitupe i Manu’a mo le faamoemoe e tala ai siaki a tagata faigaluega i Manu’a, ma faa faigofie ai feuiaiga e pei ona atugalu i ai sui mamalu o le itumalo.

Na faaiu saunoaga a alii faipule i lo latou talosagaina lea o le teutupe, ina ia faia sana faaiuga e toe faaauau ai le ‘payroll deduction’ sa faia e le malo i ana tagata faigaluega, ma aloaia ai loa le iugafono na pasia e le fono i le amataga o le tausaga, e pei ona talosagaina ai le toe faaauau o lenei auaunaga.

Ae na saunoa Falema’o e faapea, o le a se’i la talanoa muamua ma le kovana e tusa ai o le i’ugafono, ona toe logo mai ai lea o se faaiuga la te faia i se taimi o i luma.