Ua ta’imua nei le afio’aga o Lauli’i o le falelima i sasa’e i mea lelei! Ua mae’a le latou Aso Fa’afetai na tu’ufa’atasia uma ai Ekalesia uma ua fa’anofoia ile afio’aga, ma latou talimalo i le Sauniga Fa’afetai a le Malo o Amerika Samoa, ma latou amatalia ai le latou faiga fou, na mua’i faia, ae na toe motusia, lea ua toe soso’o le pitomaea.

I se talanoa fiafia mai a le susuga Rev. Tualesolo Talo o le Ekalesia Katoliko, na ia fa’ailoa ai, “O le amataga o le fa’amoemoe, na logotala loa Rev. Iakopo o le EFKAS i Lauli’i o le a talimalo i le sauniga a le Malo i le Aso Fa’afetai, o i’ina loa na ia taloina loa se matou fonotaga, ma fa’aali taofi ai fo’i e tusa o le fa’amoemoe.”

E lima lelei Ekalesia ua fa’atuina i totonu o Lauli’i, Ekalesia Fa’apotopotoga Kerisiano i Amerika Samoa, Ekalesia Metotisi, Ekalesia Katoliko, Ekalesia Egelani ma le Ekalesia a le Atua [AOG]. O latou fa’afeagaiga fo’i sa auai uma mai mo le fonotaga taua, ma latou setia ai le fa’avae o le Komiti mo le Aso Fa’afetai a Lauli’i, e ta’ito’alua sui mai le Ekalesia fa’atasi ai ma le Fa’afeagaiga.

O le ulua’i aso, o aso atofa o le Fa’afetai, Aso Tofi i le sauniga Fa’afetai a le Malo lea na amatalia i le 9:00 i le taeao, ma sa fa’atulaga, e tofu atu Ekalesia ta’itasi i ona matafale ma latou fua o fa’aeleeleaga o totoina i ato, ina ia fa’ao’o e avea ma ta’ita’i a le Malo pe a mae’a le sauniga fa’apitoa.

“I le sauniga lea, sa pa’au uma mai lava le mamalu fa’amata e fia o le Malo i le afioga le Kovana sili ma le faletua, o le sui Kovana ma le faletua, o ta’ita’i ma fa’auluuluga o matagaluega ta’itasi ma latou faletua, aemaise o le mamalu o Maota e lua o le Fono Faitulafono ma o latou faletua, le vaega o Fa’amasinoga ma lona fa’auluuluga ma o latou faletua, ma le lautele fo’i o le Malo, o i latou na sa latou fa’amanuiaina le afio’aga i ona ekalesia uma i lo latou avea o fua o fa’aeleeleaga e fa’aaoga.” O se tala fiafia lea a le ali’i Fesoasoani Katoliko.

O le itula e 6:00 i le afiafi na fa’asolo ai loa le polokalama fa’ale-agaga na lautogia uma ai fo’i Ekalesia i ona vaega ta’itasi. “O pesega ma polokalama fa’atino na matua iloga ona fiafia le fanau talavou e fa’atino ma ua fa’afiafiaina fo’i i matou le aufaigaluega, ua va’aia le olaola o le Upu i tagata o le afio’aga.” O se tala mai lea a Rev. Tualesolo Talo.

Alafa’i i le savaliga i le toe aso nai Moamoa, o le fa’amoemoe, ia faia le fa’amalositino e ala i le savavali mai i Oneasosopo, faia ai le Zumba ma fa’ai’u ai i ta’aloga sa masani ai Samoa i aso ua te’a: Tosoga Maea, Tu’uga tamo’e, tu’uga taga ma isi mea fa’apena ae ua le faia le Kirikiti ona o le vevela tele fo’i le la. O le itula e 12:00 na tapunia aloaia ai loa le latou polokalama fa’apitoa mo le Aso Fa’afetai, ae ua fai le tala, e toe faia fo’i i le tausaga 2015, ma fa’aleleia atili.

“O pesega ma tala fa’atino o le Tusi Pa’ia o le a fa’aalia uma i lea afiafi, susu mai e maimoa ma fa’aosofia ai lou agaga fiafia i lenei vaitau o le fanau mai o le tatou Mesia.” O sana lea tala fiafia mai i le mamalu lautele.