O le aso Lulu o le vaiaso nei na fa’ateia ai le tapuaiga a le Fono Faitulafono, le faigamalo a Amerika Samoa, Itumalo o Saole faapea ai uo ma aiga, ina ua maua i ni ripoti le Tuua o le malo e le afioga i le ali’i Senatoa ia Saole Mila, ao i ai o ia i le aai o Seattle i le setete o Washington.

Na fa’amaonia mai e le Fofoga o Saole mai le motu o Aunu’u, le tofa a Fuiava Avaloa i le Samoa News ananafi, le tuua ai o le malo e le afioga i le ali’i Senatoa i le ‘aai o Seattle.

“O se tala e talia gata e le itumalo faapea ai le afioaga lenei tala fa’avauvau ua oo mai, ina ua valaau le Atua i le Tama o lenei itumalo,” o le saunoaga lea a Fuiava i se fa’atalatalanoaga i luga o le telefoni.

“O le afioga i le ali’i Senatoa ia Saole, o se tama e aga malie i soo se saofaiga a le itumalo ma le afioaga, e agamalu ae loloto le tofa ma le fa’autaga o loo i ai,” o le saunoaga lea a Fuiava.

“O le a misia Saole e le itumalo faapea le nu’u ma le aiga, ou te iloa fo’i o le a matua misia o ia e le maota maualuga a le Senate i le Fono Faitulafono.”

E le’i mafai ona maua mai se saunoaga aloaia mai le afioga i le ali’i Peresetene o le Senate poo le sui peresetene fo’i e tusa ai o lenei tala fa’avauvau, ona o loo toesea uma i laua ma le atunu’u i le taimi nei.

Na taua e se sui o le aiga ma le afioaga i le Samoa News e faapea, na fa’atoa tuua e le afioga i le ali’i Senatoa ma lona faletua ia Taualaga le atunu’u i le lua vaiaso talu ai, ina ua mae’a le tatala aloaiaina o le tauaofiaga a le Fono i le aso 13 Iulai 2015, mo le fa’amoemoe e asiasi i aiga ma fanau i fafo ona toe malaga mai ai lea i le atunu’u.

E tusa ai ma le saunoaga a le tofa a Fuiava, ua i ai le fuafuaga a le aiga ma le fanau, o le afioga i le ali’i Senatoa ia Saole e lagomau lava i fafo.

“O lea ua taoto le finagalo o le Faletua, le aiga faapea ai le fanau, o le afioga i le Maopu ia Saole e lagomau i fafo i Seattle i le aai o loo i ai lona aiga, o loo faatalitali pea le itumalo ma le afioaga i se isi polokalame a le aiga i toe sauniga o le ali’i senatoa,” o le saunoaga lea a Fuiava.

Ao lei nofoia e Saole le nofoa o le itumalo o Saole i le Senate, sa tautua o ia i le Vaega o Fa’amasinoga o se Fa’amasino Lagolago, mulimuli ai loa filifilia o ia e lona itumalo e fai ma o latou sui i le Senate, o lana ulua’i nofoaiga fo’i lenei i le nofoa a le itumalo.

O Saole sa avea o ia ma Ta’ita’ifono o le Komiti o Mataupu tau Lotoifale a le Senate.

Saunoa le afioga i le alii senatoa ia Magalei Logovi’i e faapea, o Saole o se alii senatoa e agamalu ma loto maualalo, e ui i le tele o taimi e fa’aleo ai sona finagalo i ni isi o mataupu, ae lolo lava sona taofi i se fa’aiuga e fulisia i ai le maota atoa.

Ia faamaise le Atua i le paia o aiga loto fa’avauvau, ona o le motusia o le mafutaga ma lenei Tamali’i o le atunu’u.