AVANOA FAIGALUEGA I MANU’A

Na tei le fa’alogo a le Fafige Faikakala i le mataupu lea na laga e se sui o le kapeneta i le vaiaso nei, ma taua ai le faailoga lanu o le faaiuga ua faia e le Faatonusili o le Ofisa o Tagata Faigaluega a le malo (DHR), e faatapulaa ai avanoa faigaluega i Manu’a mo na o tagata ua nonofo mau i Manu’a.

Na taua e Utualii Iuniasolua Savusa, o lea faaiuga ua atagia mai ai le faailoga lanu, ona o avanoa faigaluega mo Manu’a e mafai fo’i ona agava’a ai isi tagata o lo o nonofo i Tutuila nei, po o isi foi tagata mai fafo ua agavaa faaletulafono ona aumau i totonu o Amerika SAmoa.

Na fiu si Fafige Faikakala e tali telefoni faapea ai ma le mau ‘comments’ i luga o lana ‘facebook page’, ina ua tau fai lolofi atu i ai manatu ma lagona o le atunuu e uiga i lenei mataupu.

Na taua e le isi uo toeaina a le Fafige Faikakala, e leai se mea e galue ai fua se tagata i Manu’a pe afai e le nofo mau i Manu’a.

“E fa’apefea oga galue se kagaka Augu’u i Magu’a pe afai e gofo mau lea kagaka i Augu’u, ae o le MV Sili e ka’i kolu i le fa masiga o lo o koso lava i luga o le mea koso va’a e le o lelei”, o le fesili faatupu manatu lea a le uo toeaina a le Fafige Faikakala.

“O le mea mogi lava e kakagu oga fai, faakumau pea le kulaga ua i ai, ga o kagaka Magu’a e gogofo mau i Magu’a e kakau oga galulue i Magu’a, a o kakou i Kukuila gei, gogofo pea iigei ma galulue ai”.

Toe manatua vave lava e le Fafige Faikakala le isi foi mataupu faapea na tula’i mai i le malaga a le isi va’a, ina ua faatonu e le kapeteni le isi alii Samoa e alu e fai i tagata o lo o i luga o le vaa, e aai ai pea latou i luga o le va’a, o tagata o lo o i luga o le uafu, aai ai pea i luga o le uafu, ae o laua o le a aai ma le kapeteni.

Na ona tu lava o le ali’i Samoa lea alaga leotele loa i le pasese o le va’a e fa’apea, “Okay every body, all of you on the wharf eat the wharf, all of you in the boat eat the boat, but me, I eat the Captain”.

SAILI I LE TAI SE AGAVA’A

E le o mapu le mafaufau o si Fafige Faikakala i le tulaga lea ua i ai le tausinioga a ni isi o sui o le atunuu, mo le nofoa o Amerika Samoa i le Konekeresi, aua o le mea moni lava, o iinei tonu e taunuu ai se tasi o muagagana a Samoa, “ia fili lava i le tai se agava’a”.

O le itu e pito sili ona tau le to’a ai le mafaufau o si Fafige Faikakala,  o nai sui tauva o le a tausinio i le faamoemoe, i le tigaina ma le pologa e tau faatupe ma tau tuu faatasi lenei faamoemoe, ae emo ane foi le ata e na o mea pepelo lava e la’u i ai e le au palota.

O le fautuaga mai le Fafige Faikakala, faamolemole ia outou le au palota, saunoa sa’o i sui o komiti a sui tauva e faailoa i ai le tagata tonu e te palota i ai, ina ia faigofie le latou galuega, aua ai nei gau aano se isi, ae maua ai se sui e agavaa e fai ma sui o Amerika Samoa i le fono a le konekeresi.

E FIA O FO’I SUI FA’ATONU I LE FALE I TA’AVALE A LE MALO

Ata fa’amaga le Fafige Faikakala ina ua faalogo i le talosaga a le Fa’atonusili o le Matagaluega o le Puipuiga o le Saogalemu Lotoifale (DHS), i le fono a le kapeneta i le vaiaso nei sa tuuina atu i le lutena kovana, o lo o ia talosagaina ai Lemanu Peleti Mauga e toe iloilo le tulafono na la faatulai ma le alii kovana ia Lolo Matalasi Moliga, e na o faatonusili e faataga ona o ma taavale a le malo i o latou aiga.

O le amataga o le tausaga na te’a nei na faatula’i ai e Lolo ma Lemanu se tasi o tulafono mo le la faigamalo, i le faasa lea ona toe ave e soo se tagata faigaluega a le malo ta’avale a le malo i o latou aiga, e pei ona masani mai ai le tele o nofoaiga ua mavae atu, sei vagana ai lava le Fa’atonusili e fa’ataga ona alu i le ta’avale a le malo i lona aiga, ae fa’asa ona ti’eti’e ai nisi o le aiga pe o ai fo’i i le lotu, Bingo pe fa’atau ai.

Ina ua faatula’i e Lolo ma Lemanu le tulafono lea, na la tofia ai loa ma Masela o le Alatele e fesoasoani i le fa’amalosia o le tulafono.

Na talosaga Utuali’i Iuniasolua Savusa i le lutene kovana i le vaiaso nei, ina ia toe iloilo le la tulafono i ta’avale a le malo, ina ia mafai ai ona faataga sui faatonusili e o i taavale a le malo i o latou aiga.

Na taua e Savusa e fa’apea, e i ai isi sui faatonusili o lo o mafai ona o ma taavale i o latou aiga, ma o se tulaga e le talafeagai lea mo isi sui faatonusili.

Ae na taua e se tagata faigaluega sinia a le malo e faapea, afai lava ua faataga na o faatonusili e o ma taavale i o latou aiga, ua lava ai lea, ae atagia mai i le talosaga a le alii faatonusili, e fia o foi nai sui faatonusili i o latou aiga i taavale a le malo.