“E LE FA’AILOGA TAGATA LE ALI’I KOVANA”

Lagona le fiafia o si Fafige Faikakala i le agaga ua mafai ona fa’ailoa e le ali’i kovana o le atunu’u i le fa’aiuga o lenei tausaga, i lona le fa’ailogaina lea o so o se tagata i le atunu’u, ae ua ia manatu e fai meaalofa i tagata uma e aofia ai tagatanu’u o lo o nofosala i le toese i Tafuna. Fiafia le loto o si Fafige Faikakala ina ua talanoa mai le to’atele o ana uo e fa’atatau i fuafuaga lelei ma le vaai mamao a le ali’i kovana, lea ua sosoo lava tausaga e lua o fai pea ana asiasiga i pagota o le toese, ma ave i ai upu fa’alaeiau e fa’amalosia ai o latou loto.

Pau le itu lea ua tau oso ai le popole o le loto o si Fafige Faikakala, e i ai lava fo’i le isi vaega o lo o tu’u fesili pe aisea ua asia ai fua e le ali’i kovana le nofoaga o le toese, ae le tu’u ai pea pagota e tuli a latou fa’asalaga, o le tali manino e pei ona fa’alauiloa e le ali’i kovana, e le gata e taua ‘aia tatau o tama ma tina, fa’apea ai fanau o lo o taofia i le falepuipui, ae o i latou fo’i o ni isi e pele i o latou aiga, fa’apei fo’i ona pele tagata uma e o latou aiga.

Pau le fautuaga a le Fafige Faikakala i le vaega lea e faitio i le asiasiga a le ali’i kovana, e le tatau ona tatou faia ni ituaiga mafaufauga fa’apea, aua o le upu, e le iloa ala o vae, ne’i te’i ua emo ane ua loka fa’afuase’i se isi o le au faitio i le toese i se taimi o i luma, ona tatou toe lagona lea o le taua o le asiasi atu ao nofosala ai i le toese, aua o le fetalaiga a Iesu, “o se tasi o e aupito itiiti ua e faia i ai, o A’u lava lea ua outou faia i ai”. Vaai le manaia.

KERISIMASI MANUIA MO AMERIKA SAMOA

E lagona le fiafia ma le vivi’i o le loto o si Fafige Faikakala i le tulaga manuia sa i ai le aso kerisimasi o lenei tausaga, pe a fa’atusatusa i ni isi o tausaga ua mavae. E ui sa i ai fa’afitauli laiti na mafua mai ona o le ‘ava malosi, ma i’u ina fai kerisimasi ai le to’atele i le falepuipui i Tafuna, peita’i o le aotelega o lenei kerisimasi, e leai ma se fa’alavelave matuia na tula’i mai ai, po o se tasi fo’i ma i’u sona soifua ona o fiafiaga ma tafaoga.

Na taua i se ripoti mai le Ofisa o Leoleo le to’afilemu o vaega uma o le atunu’u, sa vaaia fo’i le lagi lelei o le tau i le po atoa seia oo mai i le aso o le kerisimai. Talosia ae tumau ai fa’apea le lelei o le tausaga fou ua olioli mai, ia filemu mea uma ma manuia mo le atunu’u atoa.

SUIGA O LE TAUSAGA FOU

Nofonofo lava ma le toto’a si Fafige Faikakala ma vaavaai i le tele o suiga ua folafola e le to’atele o le a aga’i atu i ai o latou olaga pe a aulia le tausaga fou. O ni isi ua folafola le fa’amuta o le inupia ma le ulaula sikaleti pe a aulia le tausaga fou, ae o isi ua folafola le sauni e fa’alusi pauna ina ia maua ai le ola soifua maloloina lelei.

E anoanoa’i suiga eseese ua naunau le to’atele e tatau ona fa’atino pe a la’asia ulua’i sekone o le 2015, peita’i o suiga lelei e pei ona alalaga i ai le aufai lotu i lea aso Sa ma lea aso Sa, o le suia lea o le olaga tuai i le olaga fou, po o le sui o le pepelo i le tautala sa’o, sui le gaoi i le le toe gaoi, sui atu ai loa ma le loto leaga ma le muimui i le loto lelei ma le fai mea lelei. Ae mo le Fafige Faikakala la ia, pau lana suiga ua vaavaai i ai o le tausaga fou, o le a matua fa’akekeleiga le mafiafia o le ola faikakala, ina ia silafia ai e le atunu’u mea o lo o tutupu i tulimanu e fa o le atu Samoa.