“O LE FILI LAVA O LE KAMA O LE MAUA ..”

E fealua’i lava si Fafige Faikakala i lenei vaiaso i ana feau masani ma u’u lona gutu i le ofo tele o lona loto, ona o le tele o tupua lililo ua leva na taumafai le malo e saili sona tali, ae foliga mai o lea lava ua vavala mai ataata o Ta’uleleia, e pei o lea muagagana fa’a Samoa.

Toeititi lava o aso uma e fetaui ma talanoa ai si Fafige Faikakala i nisi o ana uo e galulue i le malo, fono ma kamupani tua, o le latou tala lava lea e fai mai i le Fafige Faikakala, “O le fili lava o le kama o le maua ..” Fesili si Fafige Faikakala i le isi ana uo ave pasi e fiafia fo’i i le mea lenei o le faitala fela’ula’ua’i, po o le a sona lagona i nei mau tala ua felelei solo pei ni lau laau i itu e fa o le atunu’u, e le gata o le fa’alavelave na fana ai le leoleo, o le au fa’atau aisa ma mariuana, aemaise ai o le fa’atupulaia o le mau solitulafono i le atunu’u, o le tali a le uo ave pasi a le Fafige Faikakala, “e le o koe umi lava ae maua le vaega leaga”.

Te’i le Fafige Faikakala i le tatagi o lana telefoni i le isi taeao, e tali atu o le isi ana uo loomatua ua leva na litaea ma le malo, fai mai lana tala, “Eke iloa iga o lea ua saugi le iku a le ali’i leoleo lea na maua o ki’eki’e ma pagoka i le Van a leoleo, e ka’u uma mea o lo o kukupu i kokogu o le falepuipui, aemaise ai lava gaioiga lililo o lo o mafua ai oga sao maliuaga i kokogu o le koese, i le iloiloga faapikoa lea laa fai i luma ole fa’amasigoga maualalo i le vaiaso fou, maukigoa lava e le koe gaga iga se mea, ae o le a laga uma i luga, loga uiga e magigo loa le kagaka sa’o ga ia faakaga pagota e o i kua, o iiga e maua ai loa le au o le paipa, ma maua ai loa ma le au sifi o lo o i kua o le mea legei, aua ge’i galo ia oe, o le fili lava o le kama o le maua”.

“ALU I AI SI A’U KAMA ...”

E maofa le loto o si Fafige Faikakala ina ua faitau atu i le kopi o le ripoti a le ali’i Kovana lea na tauaao atu i le Fono Faitulafono i le vaiaso nei, o lo o taua ai fuafuaga mata’utia a le malo ua fuafua e fa’amamalu, ina ia foia ai lava le mau fa’afitauli o lo o alia’e mai i le malo ma le atunu’u i le taimi nei, e le gata i pisinisi ua faia gaioiga pepelo ma le tau fa’asese, ae o tagata faigaluega o lo o faila a latou lafoga i fafo ona o le mana’o tele i le tupe, ae soli ai le tulafono.

Talu ai e le lelei se faitau tusi a si Fafige Faikakala, o le mafua’aga lena na tago ai ua tu’u le ripoti i lana uo tama mai Savai’i na te faitauina le ripoti. Oka se ofo o le loto o si Fafige Faikakala, fai mai le ali’i kovana, o se tasi o tuutuuga e mafai ai ona fa’afou le I.D o le tagata mai fafo, o le faailoa lea o le kopi o le pepa sa faila ai lana lafoga ona fa’atoa mafai lea ona fa’afou lona I.D, e faapea fo’i i pisinisi o lo o pulea e tagata taitoatasi ma tagata tua, e le mafai ona toe fa’afouina le laisene sei vagana ua fa’amaonia sa faila le lafoga a le pisinisi.

Ata fa’amaela sei Fafige Faikakala ina ua tau tonu lava le mea sa manao ai lona loto, o se faiga a le malo e fa’amalosia ai tagata mai fafo e faila a latou lafoga i le teritori, aemaise ai o pisinisi o lo o pulea e tagata Asia, ua tele le tala pepelo ma le taugata o a latou oloa. O le talosaga a si Fafige Faikakala i le ali’i kovana, “aua eke fa’avaivai i au fuafuaga lelei ga ua fai, alu i ai si a’u kama aua eke fa’avaivai, afai e maua le ko’akasi, e maua uma aku ai lava ma le isi vaega, ae le maua lava le Fafige Faikakale”.

TATALO A LE FAFIGE FAIKAKALA

“Lo matou Tama e, o i lagi, ua e silafia mai lenei Fafige Faikakala ma lona olaga fa’atamala, ua le iloga se mau tala e felefele ma falala, ae foliga mai e le o lagona uma mai e tagata. Alofagia aiga lima vaivai o le atunu’u aemaise lava aiga e ta’ito’atasi tagata faigaluega, ae fau ma soloi le lafu o lo o momoe i luga o le moega, ua avea le naunau i le tupe ua soli ai le tulafono, ae ua le faalagolago atu ia te oe o le puna o le poto, ta’u i ai i o latou mafaufau vaivai, tusa lava po o Seoli e fai nana iai a latou amioga, e pei o le ao mea uma i le silafaga a lau afioga.

Alofagia fo’i ta’ita’i o le atunu’u o lo o galulue mo se manuia, fa’ailoa i ai e le manuia le atunu’u pe afai o le faiga lea, o le tuua mai o le lotu i le aso Sa ae alu le solo i le malae ta polo, o le isi lima le pate ae o le isi lima le fagupia. Ia e fa’ailoa fo’i i le atunu’u o lo o fiafia e tagofia fualaau faasaina ma laau malolosi, poo fea lava e fia malo iai, o le latou iuga lava o Seoli, ae maualuga ai le viiga o lau afio. Amene.”