“FIU E NANA LE TAMA’I MOA AE ‘IO ‘IO MAI LAVA”

Na uu le gutu o si Fafige Faikakala i le ofo tele, ina ua maua le avanoa e fa’alogologo ai i le talanoaga a le Senate ma le Ofisa o Leoleo i le vaiaso nei, ae taia ai lana fa’alogo i nisi o tala ua leva ona fasa solo ai le atunu’u, e fa’atatau i amioga a nisi o leoleo a le malo sa fa’atauto latou te puipuia le tulafono ma le saogalemu o le atunu’u, ae foliga mai e o o lava i ta’ita’i o le atunu’u o lo o latou silafia lelei amioga a le au sifi ia o lo o fai.

O le itu e sili ona lelei ai, o lea ua fa’afofoga lelei ai lava le komesina fou o leoleo lea fa’atoa tofia e le kovana, atonu o le a fai ai loa ma sana fa’atatau i le fa’afitauli o lo o tulai mai, i le i ai lea o leoleo o lo o masalomia o lo o ulaula mariuana toe sinifi i le aisa. E leai ma se iota o saunoaga uma a senatoa atoa ai ma le tali mai a si komesina fou na pau i le fa’alogologo a le Fafige Faikakala, ae ua atili ai fo’i la i le vaai atu o le Fafige Faikakala i isi ana uo toeaiina e galulue i le fono, o la fo’i e usi lelei mai le latou fa’alogologo i le talanoaga lava lea e tasi. E matua moni lava fa’asea a le Fono, mafua ona faigata i leoleo ona saili tagata o lo o latou gaosi ma faatau fualaau faasaina, ona o lo o tau solomua i isi fo’i leoleo le a’afia ai ma latou ae le fa’atino a latou tiute.

Te’i si Fafige Faikakala i le eu eu atu o lona tauau e le isi ana uo toeaina i le taimi o le talanoaga a le senate ma le ofisa o leoleo ma fai mai, “E ke silafia ali’i Fafige Faikakala, lea fa’akoa ka’u sa’o lava e le Fogo i le Komesina fou o leoleo amioga a isi leoleo o lo o fai, aua o le mea mogi lava, e fiu lava e ga ga le kama’i moa ae ‘io ‘io mai lava, lea la ua amaka oga aliali mai i luga mea gei, kalosia ae fai loa i ai se fa’aiuga i le au sifi ia, ua mogi ai le faukuaga a le isi segakoa, afai e maua leoleo o lo o faia le amio lea, kuli ese.” Magaia fo’i.

“MANA’O I LE UFI AE FEFE I LE PAPA”

Fiu si Fafige Faikakala e tali telefoni i lenei vaiaso atoa, ona o le to’atele o le atunu’u ua fa’asea i le fuafuaga a le faigamalo lea sa fa’alauiloa e le kovana i lana saunoaga i le tatalaina o le fono, lea foi o lo o aofia i le ripoti a le malo ua tauaao e le Fono, i le manatu lea o le malo e taofi le toe fa’aopoopoina o le isi $0.50 o totogi maualalo sa pasia mai e le feterale, ona o le popole ina ne’i a’afia atu ai ma le tamaoaiga o le atunu’u.

Na taua e le isi olomatua na telefoni mai i le Fafige Faikakala e fa’apea, “e le kakau i le kovaga oga ia kaofia le siikaga o kokogi amaka, o lea ga fai mai e kakau oga sii kokogi o kagaka faiglauega, ao lea fo’i ua koe fai mai e popole iga ge’i afaiga le kamaoaiga o le malo”, ae na taua e le isi toeaina i lana tomumu i le Fafige Faikakala e faapea, “o le mea lea ua i ai, ua le iloa e le kovaga poo fea kogu lava e ku ai, e fai o loga alofa i le akuguu ae o loo popole foi i le kamaoaiga o le malo, ua mogi ai le upu a le akuguu, au gaugau i le ufi ae fefe i le papa”.

O le fautuaga a le Fafige Faikakala i nai ana paaga sa tuu vilivili mai i lenei vaiaso e fa’atatau i lenei mataupu, “tatou nonofo tatalo pea ae tu’u le avanoa i le afioga i le ali’i kovana e fai ai lana fa’aiuga, atonu o se fa’aiuga e manuia uma ai Tutuila ma Manu’a, ina ne’i tatou naunau e sii i luga totogi ae emo ane le ata ua leai ni kamupani e maua ai galuega, ona misi atoa lea o ni galuega, misi atoa ma le siitaga o totogi, ae ua fa’asaga sa’o loa i le pa povi, fai aku ai fo’i”.

“O FEA LA O I AI LE MEA MONI?”

Pisi fa’avalevalea le ofisa a le Fafige Faikakala i le aso ananafi i le toatele o le atunu’u na telefoni atu i ai i le fia malamalama, po o fea la lea ua taoto ai nei le mea moni i le mataupu lea na molia ai se leoleo i lona alu ma feavea’i ni pagota se to’atolu i le Van a Leoleo i le masina o Tesema na te’a nei. Fai mai le isi tama matua na telefoni mai i le Fafige Faikakala, “afai la o lea ua solofua moliaga fa’asaga i le leoleo ma pagoka, o fea la o i ai le mea mogi i legei makaupu, aisea e le molia ai loa le kagaka sa ia fa’akogua le leoleo e alu e ave pagoka i Alofau”?, ae na taua e le isi ali’i talavou na talanoa ma le Fafige Faikakala e fa’apea, “kalosia e le ka’aia fa’a fala e le malo legei makaupu, aua o le mea mogi lava ia, ua umi kele oga fai e le alii leoleo lea le amio o le fa’akaga o pagoka e o i kua”, ataata loa le Fafige Faikakala ma fa’apea atu i ana uo ia sa telefoni mai, “vaai oulua, aua eke lua popole, o le kaimi lava e samala ai e le malo le upu o le po’a lea ga faia le faakoguga e o i kua leoleo, oga oulua iloaiga loa lea iiga, o le mea mogi kogu lava lega”.