E LE O GI AIKU IA FBI

Tau oso le toto maualuga o si Fafige Faikakala i le tele o taimi e taia ai lana fa’alogo i talanoaga a ni isi o le atunu’u, e fefefe tele pe a ta’u ua i ai ni sui o le FBI i le atunu’u. E le masani tele le Fafige Faikakala i nei mea o FBI, ae ua avea le tele o taimi e talatalanoa ai le Fafige Faikakala ma ni isi o ana uo e fa’atatau i FBI ma a latou galuega e fai i Amerika Samoa pe a o mai, ma itu ua malamalama lelei ai loa si Fafige Faikakala i mea nei e ta’u o FBI.

E le’i tu lelei le pasi na usu mai ai si Fafige Faikakala i le isi taeao ae vaai atu ua emo emo mai le moli o lana telefoni, ua maua lana text, ae tatala atu le text, o le isi ana uo e faigaluega i le malo, o lo o text mai pe ua maua e le Fafige Faikakala se tala e fa’atatau i FBI ia laa o mai i le atunu’u. E le’i umi ona maua mai le text ae te’i i le tatagi o le telefoni, ae tali atu, o le isi ana uo faiaoga, “Siaula, ga e kau maua se kala ua kaugu’u FBI ia ga kalosagaiga e le Ofisa o Leoleo e o mai e su’esu’e le fa’alavelave lea ga faga ai le leoleo i le kausaga ga ke’a gei”?, o le fesili lea a le uo faiaoga, ae na tali i ai le Fafige Faikakala, “Aisea ua e fesili ai fua i ga FBI”, ae na toe tali le uo faiaoga, “Se ua ou fa’alogo e le kasi se makaupu o lo o o mai ai FBI iigei, e le gaka o le su’esu’ega o le fa’alavelave ga faga ai le leoleo, ae o loo o mai fo’i e su’esu’e le makaupu i kupe sa aumai mo le polokalame a le ‘1602’, o lafoga o lo o faila i fafo, ma le agoago lava o le mau makaupu o lo o a’afia ai Amelika Samoa”, toe oso atu loa ma le Fafige Faikakala, “Se soia eke fefe fua i FBI, e le o gi aiku e ala ai oga e palaai, mafua lava oga loka le kagaka o le lima kago vale fua i mea a kama sasa’o, ae sili ai lava si ola makiva e le sau ai soka igoa i luga o le gusipepa”. Fai aku ai fo’i.

KAKAU LE SASA I LE KUA O LE VALE

Lagona le fa’anoanoa o si Fafige Faikakala ina ua faitau i le nusipepa i le isi aso, ae tau ai lana faitau i le tala e fa’atatau i le ali’i leoleo lea ua molia i le fa’alavelave lea na tula’i mai i le fale kalapu o le Evalani i le tausaga nei, ona o tu’uaiga i le fa’aoolima, faaleaga meatotino atoa ai ma le umia o se a’upega mata’utia.

O le itu e lagona ai le fa’anoanoa o le Fafige Faikakala, so o se tasi e avea ma leoleo, o ia lea ua tu’u uma atu i ai le fa’amoemoe i le fa’amalosiga o le tulafono aemaise ai o le puipuia o le saogalemu o le atunu’u, ae lagona le fa’anoanoa ona o mea e tele o lo o tutupu o lo o a’afia ai ni isi o leoleo. E ui la i le fa’anoanoa o si Fafige Faikakala i le ta’uvalea ai o le matagaluega ma le malo, ae ua toe lagona lona fiafia, ona o lea ua i’u lava ina molia le ali’i leoleo na mafua ai ona tele fa’asea a le atunu’u ma tu’u fesili pe aisea ua le lokaina ai le ali’i leoleo lea. Ua moni ai upu a le tusi, e tatau le sasa i le tua o le vale.

FA’ASA’O LE U’AMEA MANU O LO O PI’O

Popole lava le loto o si Fafige Faikakala i le fa’afitauli lea o lo o maitauina pea i le Ofisa o Femalagaaiga, i tagata e fa’afo’i e le fa’amasinoga i atunu’u na malaga mai ai ona o ni solitulafono mamafa ua ta’usala ai i latou, ae toe vaai atu fo’i ua toe li li mai i le isi vaiaso. Maua le imeli a le Fafige Faikakala mai le isi ana uo teine fai mai, e mafua le fa’afitauli lea i tagata e toe fa’afo’i i o latou atunu’u ae toe vaai atu fo’i ua toe ulufale mai, e le o lelei masini komipiuta a le Ofisa o Femalagaaiga e mafai ai ona maua fa’amaumauga e fa’atatau ia i latou nei.

O le popolega o le Fafige Faikakala, o le to’atele lava o tagata mai fafo o lo o a’afia i le fa’afitauli lea, e toe maua ane fo’i ua toe solitulafono iinei, o isi e toe molia i ni solitulafono e sili atu ona matuia. O le fautuaga a le Fafige Faikakala, o le taimi tonu lava lenei e fa’asa’o ai le fa’afitauli o lo o tula’i mai i le Ofisa o Femalagaaiga manu o lo o maua le avanoa, ina ne’i tuai ona toe tulioso atu lea ua leai se aoga. E moni ai le tala a le isi olomatua inisinia, “E lelei le fa’asa’o o le u’amea ae o lo o pi’o, ae le mafai ona toe fa’asa’o pe afai ua gau”. Ua na o ni nai mafaufauga, ae pule lava le kama a le olomakua i laga mea e fai.