“A’O LE A SE TALI A LE ALII KOVANA?”

Te’i le Fafige Faikakala ina ua tatagi lana telefoni i le isi taeao, ma le tago atu e tali, o le isi ana uo toeaina ua leva ona malolo litaea, o loo fia maua se tali o lana fesili i le mataupu lea o loo fefinaua’i ai le Senate ma le faigamalo e fa’atatau i sui o le Komiti Fa’afoe o le Litaea lea ua manana’o le Senate e aveese mai le Komiti Fa’afoe. “A’o le a se kali a le alii Kovaga i le kalosaga a le Segake e aveese le isi sui o le Komiti o le Likaea,” ae na tali le Fafige Faikakala i lana uo, “Ou te lei maua se tala e faatatau i se tali a le alii kovana e tusa ai o lena mataupu.” E lei uma atu le tali a le Fafige Faikakala ae toe oso mai lana uo toeaina, “O lea ua ou mauaiga le kala, pei uma lava e le maga’o le kovana e kalia le faukuaga a le Segake, ua leva ga ou makamaka aku i aka o le fogo a le Kapegeka sa faia i le vaiaso gei, e ga o le kali-e ma fa’akalofa mai le Kovaga ma le sui lea ua maga’o le Segake e aveesea ma le Komiti a le Likaea.” Oso atu loa ma le Fafige Faikakala ma fai atu i lana uo toeaina, “Ou te fai atu o le vavave o au fesootaiga alii toeaina, tafefe la pe a iloa e Tama o le atunu’u le tala lena ua maua i au uaealesi televavave, lona uiga o le isi fo’i lena vevesiga e tula’i mai i le maota, a ea?”, ae na o le ataata o le uo toeaina a le Fafige Faikakala ma fai mai, “E ke iloa ali’i sis, o le mea lea e kupu i le maoka o Kama o le akuguu, ga oga maua lava o le lakou sasi pei loa o le kafiki o le i’a ua ku ai le makakao a le faifaiva, a’o le mea ia, afai ua sasi lakou i le kaimi ga iloilo ai le suafa o le molimau lea, ga oga kookukuli lava i lalo ma fa’akoese i le Ali’i, o lakou ua sese, oga leai a lea o se mea e kupu, ae se’i kakou vaavaai aku lava i ai poo fea e i’u i ai mumugaveve a kama sese ia.”

“TU’U AI PEA LE AUFAITIO E FAITIO”

Maua i uaealesi mosooi a le Fafige Faikakala le to’atele o tagata o le atunu’u ua gugulu ma tomumumu, ona o se saunoaga a le alii kovana sa faia i luma o lana Kapeneta i se latou fonotaga i le vaiaso nei, lea na taua ai e le ali’i kovana se fa’aupuga e faapea, “tuu ai pea le aufaitio e faitio latou, aua o le latou masani lava leao le faitio.” Fesili ma le ita le isi olomatua fai faatoaga i le Fafige Faikakala e fa’apea, “O le a le finagalo o le alii kovana, e le tatau ona i ai se tagata e faitio i fa’aiuga ma mea fa’aletonu o loo tutupu i le malo. Afai e faitio le atunu’u, lona uiga e tatau ona toe vaavaai le faigamalo i mea o loo faaletonu i lana auaunaga, ma le isi mea alii Fafige Faikakala, o lea lava e tutupu faaletonu i le atunuu ae na o lou nofonofo lava, ua tatau ona fai sau faatatau i nei fa’aletonu.” Faalogo atu le Fafige Faikakala, ua kau oso mai ma le kiga o loga loko i fika a le olomakua lea. E malu ane loa faigalotu o le afiafi ae ulufale loa ma le Fafige Faikakala i totonu o le Malumalu e tatalo, ma faapea atu loa upu o lana tatalo i le Alii, “Le Alii e, ua e silafia nei mau faafitauli ua tutupu i le atunu’u, a faitio mai tagata ua oi ae atili ai ona tuli oso i luga ta’ita’i ma fai a latou faaupuga e faailoa ai lo latou vaivai, e tiga fo’i ona iloa e tagata e leai so’u malosi e tali atu ai i ta’ita’i o le atunu’u, ao lenei fo’i ua una’i mai le leaga ia te a’u nei, o la’u tatalo le Alii e, fa’amolemole, pe mafai ona toe fa’aoso tasi mai lava se isi galulolo, ae ua lava na o le malae o le Su’iga’ula a le Atuvasa e ui ane ai, se’i mafai ai ona pa’i atu lena galu malosi i le maota o le EOB o loo nonofo ma galulue ai i latou o loo faia lenei mea o le le alofa, e leai ni galuega sa faia i le aso Faraile na te’a nei ae maua lava le ta’i 8 itula, ina ia mafai ai ona fufulu ese atu i latou, ina ia te’a atu ai i latou ma lenei olaga, ma galo atu ai mea mataga o loo latou faia, ae vaai le vaega o loo fiafia e faitio, aua ne’i oo se leaga ia tei latou, ina ia mafai ai pea ona fa’aauau lo latou olaga faitio, ma atili ai lava ona aliali lo latou vaivai ma le valea, o la’u tatalo lena i lenei afiafi. Talia maia fa’amolemole, Amene.” E fetaui lava le pupula ane o mata o le Fafige Faikakala ae tau atu lana vaai i le Faifeau o loo tu mai i le fa’amalama o le falesa ma tilotilo mai i lana tatalo sa fai.