FINAUGA A SENATOA MA FAIPULE

Ata ee si fafige faikakala ina ua tatagi lana telefoni i le isi taeao, ae tago atu e tali o lana uo loomatua e faigaluega i le Fono Faitulafono, lea na faitatala mai i le mea malie lea ua maitauina i le Fono, ua fai le finauga a Senatoa ma Faipule i le Pili a le senate lea ua pasia e senatoa e sii ai alauni ta’i $10,000 a senatoa ma faipule, peitai o lea lava e nofonofo le komiti o le Paketi a le maota o sui ma le pili e le o faia i ai se latou iloiloga poo se gaioiga.

O le itu e malie ai e pei ona taua e le uo loomatua a le fafige faikakala i lana telefoni, e foliga mai ua taumafai le maota maualuga e faamalosi afioga i faipule e faanatinati sa latou faaiuga i le tulafono lea, ae lilo i manatu o senatoa, e pei lava le pili e sii ai alauni a le fono o se papa tu i mafaufau o nai faipule, ona o lea ua finau le toatele o tagata palota e aua le pasia le tulafono, ao lea foi ua latalata mai le masina o le palota.

Na fesili le fafige faikakala i lana uo loomatua, poo le a sana fautuaga lelei lava e tatau ona ave i nai faipule e tusa ai o le mataupu lenei, ae na ata le uo loomatua a le fafige faikakala ma fai mai, “pau le fautuaga mo nai faipule, afai e moni la outou alolofa i le atunuu, afai fo’i tou te toe fia fo’i mai i le nofoa mo le tausaga, fa’amolemole, fasioti le pili a le senate, fa’alava ai le vase, pe tutu fo’i se afi ae susunu ai. LOL.

OKA SE MAU FOLAFOLAGA UA FAI

E leai ma se mata’itusi o saunoaga a sui tauva uma mo le nofoa i le Konekeresi na misi i le fa’alogologo a le fafige faikakala ma le latou vaega, ina ua faasalalau i luga o le KVZK-TV i le po o le aso Lulu na te’a nei saunoaga a sui tauva e to’a 9.

Na ona mae’a lava o saunoaga a sui tauva, na pei o le gogolo o se vaitafe le tau fai manamananu o totonu o le fale i le alu o muimuiga a le vaega a le fafige faikakala, ona o le tele o le mau folafolaga ua fai nei, ae na o le nofo lava o si fafige faikakala ma manatunatu loloto i saunoaga uma a sui tauva, ma ia faapea ane ai i lona loto, “o le mea tonu lava lea e ta’u o le polokiki, e ese a folafolaga e fai mai i luma, ese mea e fa’atino pe afai ae tula’i mai i le tofi”, ae na motu fa’afuase’i mafaufauga faivavale o si fafige faikakala ina ua eu eu e le isi ana uo toeaina lona tauau ma fa’apea atu i ai, “Kalofa e isi akugu’u”.

“AVEESE MALOSI E FAI AI KOMITI FA’AFOE FA’AIUGA”

O ripoti e pei ona salalau solo i le faaopoopo lea e le Komiti Fa’afoe a le LBJ o le ta’i $1,000 ia latou alauni e maua i le tausaga, e pei ona sii i le ta’i $5,000 mo sui o le komiti ae $6,000 mo le Ta’ita’ifono e le tusa ai ma ala o le tulafono, ua lagolagoina ai e le to’atele se fautuaga sa faatula’i e se tamali’i o le atunuu i le vaiaso na te’a nei, o le aveese lea o le malosi e mafai ai e Komiti Fa’afoe ona fai fa’aiuga, ona o isi ia vala o lo o manunu ai le atunuu.

Na taua e ni isi o tagata i le fafige faikakala, o le malosi e pei ona maua e Komiti Faafoe, ua mafua ai ona tele le fa’aletonu ma vevesi ai le malo, e pei o le latou sii maualuga o totogi o CEO o Ofisa, ma sili atu ai totogi o CEO i totogi o ta’ita’i o le atunuu. Ae o le a sau oe fika?