MUMUSU FAIPULE E FA’ALEO LE MEA MONI

Ata ee si Fafige Faikakala ina ua tatala atu lana imeli i le isi taeao ae maua mai ai sana imeli mai se tasi o ana uo o lo o faigaluega i le Fono Faitulafono, o lo o talanoa mai ai i le mumusu lea o faipule e fai sa latou faaiuga i pili malolosi e lua o lo o taatitia ai i luma o le maota, o le pili e sii ai le totogi o le kovana ma le lutena kovana, faapea ai ma le pili e sii ai alauni a senatoa ma faipule.

O le itu e malie ai i le imeli a le uo a le Fafige Faikakala, e foliga mai e malamalama lenei lana uo i le tulaga o le mataupu lenei. Fai mai, e tiga lava ona augani atu nai senatoa i faipule fai ia sa latou faaiuga i pili taua nei ua le o toe tele ni aso fono o lo o totoe, ae pei lava o le timu foi lele e pau i le papatua o le pato, e le o ano lava i ai faipule. Ae o le mea e malie ai, e i ai kama makukua o lo o taamimilo solo ai i tua i le mataupu lenei. O le fautuaga i a outou afioga i faipule, aua tou te mumusu e fai sa outou faaiuga i pili malolosi na, ae avane loa i luma i le vaiaso fou e fai i ai sa outou faaiuga manu e lei tapunia le fono. A musu le faipule e fai sona finagalo i le mataupu lenei lona uiga e pepelo lona alofa i lona itumalo. Fai aku ai fo’i. LOL.

O AI LE FA’ATONUSILI E LE TOE FILIFILIA E LE KOVANA?

O le fesili tele lea ua tula’i mai i le kapeneta a le kovana i le taimi nei, po o ai le fa’atonusili o le a le toe filifilia e le kovana mo le isi lua tausaga o lo o totoe o le nofoaiga. Na taua e se uo faalilolilo a le Fafige Faikakala e fa’apea, e i ai fa’atonusili ua ia fa’alogo e le toe filifilia e le kovana mo le isi lua tausaga o lo o sosoo nei, peita’i na taua e le alii kovana i le fonotaga a le kapeneta na te’a nei, o le a fuafua lava le tulaga e i ai le faatonusili i le la iloiloga ma le lutena kovana i ripoti mai faatonusili, i le tulaga sa i ai le tautua ma le auaunaga a le faatonusili i le lua tausaga ua mavae.

O le itu e malie ai, o lea e lei taitai oo ia Ianuari 2015 e toe tauaofia ai le fono, ae ua folafola e le isi au se’i faga o latou lea ua sauni le kovana e tuu atu o latou igoa i luma o le fono mo le faamaoniaina. Ha! Ha! Ha! Ha! HA!. Po o fea lava le tala e moni, pau le itu taua, ia filifili mai ni faatonusili e alolofa i le atunuu, ae le o faatonusili e faamuamua a latou taga.

LU’I TAGATA PALOTA INA IA LESITALA O LATOU IGOA

Ao latalata atu ai le atunuu i lana sailiga tofi i le masina o Novema o lo o sosoo nei, ua amata ona lu’i e se vaega o tagata taitoatasi tagata palota ma i le atunuu, ina ia mautinoa e lesitala o latou igoa ao lei faamuta le lesitalaina o igoa palota i le aso 6 Oketopa, o le aso Lulu lea o le vaiaso fou, ina ia mautinoa e faaaoga lo latou aia e palota ai.

O le itu e malie ai i le faalogologo atu a le Fafige Faikakala, e foliga mai ua mafuli taitai o le atunuu e finau ma faamalamala le mataupu i le ‘veto override’ a le kovana ma le fono, ae pau ai le isi vaega taua e tatau ona faailoa, o le faamanino lea o le aia tatau o tagata palota e palota ai. O le fautuaga mo tagata palota uma i Amerika Samoa, ua tatau ona e magafagafa i le taua o lou aia e te palota ai, o le avanoa e ta’i lua tausaga ma e maua, ae o se avanoa taua fo’i e te filifili tatau ai i se ta’ita’i mo lou itumalo. O le a sou manatu?