E LE NA O TAGATA MAI FAFO O LO O NOFO AITALAFU I LE FALEMA’I

Fiu si Fafige Faikakala e tau fa’auma le tagi tautala a le isi ana uo loomatua e alu i lana wheelchair, ae ua atili ai ona tagi solo si loomatua ma ta vau lona tino, ae ina ua tau maua se to’a a le loomatua, sa fesili atu loa i ai le Fafige Faikakala i le mafua’aga o lona tagi tautala, ae fa’amatala e le loomatua fai mai, ua mafua ona tagi, ua fa’ailoa e le faipule mai Aoloau i luma o se iloiloga sa faia i luma o le maota o sui i le vaiaso nei se fautuaga, ina ia fau se tulafono e fa’amalosia ai tagata uma ua taua o “non residents” ma a latou “sponsor”, ina ia fa’amalosia i latou e totogi a latou pili o lo o nofo aitalafu ai i le falema’i, ona ua silia i le $6 miliona tupe ua le mafai e le falema’i ona ao mai tagata o lo o nofo aitalafu.

O le itu na tagi ai le loomatua, e atagia mai i le finagalo o le ali’i faipule, e na o tagata mai fafo o lo o autova’a i le falema’i ma, e na o tagata fo’i mai fafo o lo o i ai aitalafu i le falema’i. Fesili atu loa ma le Fafige Faikakala i lana uo loomatua, “Ae aisea eke kagi ai fua e le o oe lava o se “non resident” o oe o le “US National”, ae na toe tagi si loomatua ma tali i le Fafige Faikakala e fa’apea, “E sa’o oe, o a’u o le US National ae o si a’u pagi popo o le non resident”.

VAAIA PEA LE FEOA’I SA’OLOTO NISI O PAGOTA I LE TAULAGA

O le maua e ni isi o ali’i pagota o le avanoa e feofeoa’i solo ai i le taulaga pei o ni sifi ae o lo o tuli a latou fa’asalaga i le falepuipui, ona o solitulafono matuia ua ta’usala ai i latou, o se tulaga lea ua lagona ai e le Fafige Faikakala le tau le mautonu o lona loto, ona o le to’atele o ana uo ua valaau atu ia te ia ma fa’ailoa atu i ai lo latou popole tele i lea tulaga.

Te’i i le Fafige Faikakala ina ua savali ane i luma o le ANZ Bank i le aso Tofi na te’a nei, ae tamo’e atu le isi ana uo ma eu eu lona tauau ma fai atu ua lagona lona fefe ina ua ia vaaia se ali’i pagota o lo o loka i lona faia o uiga mataga i se teineititi, o lo o tu i le laina i totonu o le ANZ Bank e fa’atali ai le taimi e tala ai lana tupe, ae ina ua o o atu le Fafige Faikakala i le maketi, ae tau atu ai lana vaai i le isi fo’i ali’i o lo o tuli lona fa’asalaga fa’a falepuipui ona o le faia o amioga mataga i tama’ita’i laiti.

O le fesili la ua tula’i mai, o le mea ea e fa’ataga ona feofeoa’i i le taulaga pagota o lo o tuli faasalaga i le taimi nei, po o le mea ea o ituaiga mea faapenei ua moni ai le tala a le isi papalagi, “ONLY IN AMERICAN SAMOA”.

POLOKIKI ELEELEA

Sa na o le uu o le gutu o si Fafige Faikakala i le ofo tele a o fa’amatala e se tasi o ana uo le mata’utia o le “polokiki eleelea” lea ua vaaia i totonu o le maota o sui a le Fono Faitulafono i le taimi nei, i le mumusu lea o isi faipule fa’atalanoa ni isi o tulafono taua e manuia ai le atunu’u, lea sa fa’aulu e ni isi o faipule, ona o le manatu ina ne’i “alofagia ai e tagata palota” na faipule e amo ai e ia le va’a o mala.

Mo se fa’ata’ita’iga e pei ona taua e le uo a si Fafige Faikakala, o le pili lea na fa’aulu e ni isi o faipule i le amataga o le tausaga nei e talosagaina ai le fa’amuta o le lafoga o totogi e 2% o lo o ave i le falema’i, ua mautinoa le leai o se fa’aiuga a faipule e fai i ai, ona o lea ua mae’a le tauaofiaga a le Fono ae o lea lava e nofonofo le pili i le Komiti e le o faia ai se gaioiga.

Fai mai le uo a le Fafige Faikakala, o le isi lea pili sa tatau ona finau le Fono Faitulafono aemaise le maota o sui e fa’apasia, ina ia taofi le toe tipi o lenei lafoga o totogi e 2% mo le falema’i, ona ua pologa tagata faigaluega lima vaivai e totogi lenei pili ae ola fiafia ai le au maualuluga o lo o seei i le laufau malu. O ituaiga mea fa’apenei e sa’o ai le ‘ata o le Tagi a le Faipopo”, o mea fa’apegei e le maua ai se tatou lago.” Fai aku ai fo’i ae pule a oukou.