IA FILI I LE TAI SE AGAVA’A

E leai ma se gaioiga o lo o faia i totonu o le atunuu i le taimi nei e le o maua i lalo o le ‘microscope’ a le fafige faikakala, e amata mai lava i fefinauaiga e faatatau i le palota, o le tau sailia o se auala e foia ai le taugata o le soifuaga, o tulaga i totogi maualalo ua tatau ona sii, atoa ai ma le mau folafolaga lea ua salalau i le ea mai ni isi o sui tauva, i gaioiga latou te faia pe afai ae faamanuiaina i le tofi.

O le talitonuga o le fafige faikakala i mataupu faapenei, ua o o i le taimi ua tatau ai i tagata palota mai Itumalo taitasi, atoa ai ma tagata palota uma i Amerika Samoa, ua tatau ona tatou mataalia i le filiina o se tasi e avea ma o tatou ta’ita’i i le isi lua tausaga, e le gata o le nofoa i le maota o sui o le Fono Faitulafono a le atunu’u, ae o se sui fo’i mo le nofoa i le laumua i Uosigitone.

E le tatau ona toe fa’ataua ni folafolaga i le taimi nei, e le tatau fo’i ona toe fa’ataua le tele o le tamaoaiga e maua e le sui tauva, ae ua o o i le taimi e tatau ai i le atunuu ona fili fa’alelei se tasi e agavaa mo le nofoa ta’ita’i, aua o le ta’ita’i e taula i le Ali’i lona soifua, sosoo atu ai lona alofa, tausi i le aganuu ae fa’ai’u i totonu o le aiga, o le ta’ita’i fetaui lena mo oe Amerika Samoa i le lumana’i. Ia manuia le alo atu i le palota i le vaiaso fou.

A’AFIA FUA FOAGA AE LE I FAIMISA

Ata ee si fafige faikakala ina ua la fetaui tutu lava ma le isi ana uo loomatua mai Samoa ae ua silia i le 30 tausaga o aumau i Amerika Samoa nei, ae fa’asoa atu le le fiafia o si ana uo loomatua, i le saunoaga a se tasi o sui tauva mai le Itumalo o Tualauta, fai mai e tatau ona toe fa’afo’i uma tagata mai Samoa o lo o nonofo i le teritori, ona ua ave uma e tagata nei galuega sa tatau ona maua e tagata Amerika Samoa. Ua le iloga se vaipanoa o lenei lalolagi e agi solo i ai le ita a le uo loomatua a le fafige faikakala, i le mafua’aga ua ala ai ona fai e lea sui tauva lenei mataupu, e toe fa’afo’i tagata mai Samoa i o latou aiga, ae o nai tagata nei o lo o pito sili ona to’atele ai tagata faigaluega i le kamupani i’a, o le isi lea alaga tupe o lo o fesoasoani i tupe lotoifale a Amerika Samoa.

“O le mea mogi lava ia, ua a’afia fua foaga ae le i faimisa i le kulaga lea ua i ai, i le a’afia fua o gai kagaka mai Samoa o lo o galulue i le kamupani i’a e augoa ma se mafua’aga”. Na taua e le uo a le fafige faikakala e fa’apea, tusa lava po o fea le atunuu e sau ai le tagata lea ua nofo i Amerika Samoa, ae o le taimi lava e faigaluega ma tipi ai lana lafoga i le malo, o lona sao fo’i lena mo Amerika Samoa. Tau saili lava e le fafige faikakala le mafua’aga ua saunoa faapea ai lenei sui tauva i nai uso mai Samoa, ae na tau pa le ata a le fafige faikakala ina ua musumusu atu le isi ana uo i lona taliga fai mai, “E solomua lava i le sui tauva na fanau i Samoa le ita ma logo leaga i isi fo’i uso mai Samoa.” Aue’e, e a ea?. Ka’i malie fo’i la.

100% LE LAGOLAGO E LE KOVANA O LE VETO OVERRIDE

E to le pulou a le fafige faikakala i le ta’utala sa’o o le alii kovana ia Lolo Matalasi Moliga ma ia fa’alauiloa i lana kapeneta i le vaiaso nei, o ia na te lagolagoina le suiga o le Fa’avae e pei ona taumafai i ai le Fono Faitulafono, ina ia tu’u atu le malosi i le Fono Faitulafono latou te liliuina ai se fa’aiuga sa faia e le kovana, e teena ai se pili na pasia mai e le Fono Faitulafono. O le itu ua mafua ai ona to le pulou a le fafige faikakala i le alii kovana, ae o se isi kovana lea na te le lagolagoina le mataupu o lo o finau mai i ai le Fono, ae tu vae lua lava ia e una’i lana pito laau fa’a kovana, peita’i o le fetalaiga i le tootoo ia Lolo, e le o vaai o ia o le kovana, ae o lo o silasila mama, “o ia o le tagata palota ma le tagata nuu o Amerika Samoa”.

Fai mai le uo toeaina a le fafige faikakala, “maimau pe ana faapea e tutusa ituaiga faigamalo a Samoa i Sisifo ma Samoa i Sasa’e nei, o le faiga malo lava e manumalo i le palota, o i latou na e taitaia le atunuu, lona uiga o le mea moni, e le taitai toe faiaina le faigamalo a Lolo ma Lemanu, e le gata ua savavali i upu ma fa’amatalaga, ae ua la manatu fo’i e fa’ataua tagata uma, tagata totogi lafoga tusa lava pe le i soifua a’e i Amerika Samoa, ae ua fa’ataua lo latou sao mo le malo ma le atunuu.