UMA FARM FAIR AE VEVESI LE AU FAI FA’ATOAGA

E le iloa e si Fafige Faikakala pe ata pe fa’afefea ea i le tulaga lea ua maitauina i le taimi nei, i le mae’a lea o le Farm Fair ae du’i mai le misa i le va o le aufai fa’atoaga a le atunu’u ma le Fa’atonusili o le Ofisa o Fa’atoaga, ona o fa’ailoga o le Fair o lo o fai pea lava tuliga ma le aufai fa’atoaga i le taimi nei.

O le mea moni e pei ona taua e le aufai fa’atoaga, e foliga mai e le o i ai se feso’otaiga lelei i le va o le aufai fa’atoaga ma le Ofisa o Fa’atoaga. Tatagi le telefoni a le Fafige Faikakala i le isi taeao, ae te’i ina ua tago atu e tali o le isi ana uo toeaina fai fa’atoaga, o lo o fa’asea mai i le mafua’aga ua ala ai leai ni fa’ailoga o le Farm Fair e maua i le aso Lulu na te’a nei, ae o le aso lea na folafola e le Fa’atonusili e tatau ona tufa ai fa’ailoga. Na fa’amalulu le Fafige Faikakala i lana uo ona o le fa’aletonu e pei ona tula’i mai, ae na te’i ina ua fa’alogo atu o fa’apea mai lana uo toeaina lea, “ua pei lava le faiga o le aufai fa’akoaga o le faiga o magu, e kiga ga iloa o lakou o lo o sese i leai o gi fesookaiga i kogu sa’o o gei mea, ae leai ma se isi e alu i lalo, ae ua akili ai le lalafo mai o kala mamafa fai mai o makou e loko leaga koe kau muimui, kakou fai lava la po o fea e i’u i ai.”

O le fautuaga a si Fafige Faikakala i le aufaifa’atoaga, fai malu le faiva, e le maua fo’i se malo i luga, ae maua malo pe afai e o i lalo. “O le upu lava ia a le atunu’u, a sala uta ia tonu ta’i, bwahahahahahahaha, awolaaaa, pei lava upu a le Fafige Faikakala o upu a se faifeau e le i fa’auua.”

IA FILI I LE TAI SE AGAVA’A

Maua le telefoni a le Fafige Faikakala i le isi afiafi, o le isi ana uo e sa la masani i le Fale Fono, o lo o faitatala mai i le tulaga malie o lo o i ai le tau sailiina o se Fofoga Fetalai i le Maota o Sui. Sa’o lelei, o le taimi tonu lava lenei e le o toe malolo ai sui tauva i le taumafai e faamaopopo faipule ina ia manumalo ai lana itu ma avea ai ma faipule. E le masani le Fafige Faikakala i auala e saili ai le tofi faipule, ae ua avea le la masaniga ma lana uo lea ma itu ua tau vavala mai ai le malosi o le polokiki i mataupu fa’apenei, e foliga mai o le tagata lava e mafiafia le mea i lana tagi, o ia fo’i lena e sola ma le tofi, ae o le tofi e taua mo tagata uma, ae ona ua filifili i auala eseese.

E le aia le Fafige Faikakala i galuega a le Fono Faitulafono, ae talu ai ona o tupe o lo o fa’apaketi ai le Fono, o tupe lotoifale, ma o lo o aofia atu ai ma lafoga a si Fafige Faikakala, o le mafua’aga lea o le fautuaga e fia taoto atu i fui o le Fono, fa’amolemole, faifai lemu le faiva, ia fili fo’i i le tai se agava’a, se tasi ua i ai le fa’autaga fa’alelagi e avea ai ma ta’ita’i, ae aua ne’i filifilia ona o tupe ma le mamalu. Fai aku ai fo’i.