Ua alofaiva nei le Sosaiete a le Aufai Alia mo Fagotaga [PAFA] ma le Matagaluega e Puipuia le Gataifale ma le Vaomatua (DMWR) ina ia fa’amatagofie atili le Aso Fa’afetai i le latou tauvaga o lo’o ua fa’aigoaina, “Fagota mai lau I’a Lapo’a” e fa’aaoga ai nao le ofe fagota ae le taulia ai laina toso.

O lea tauvaga ua fa’amoemoe e faia mo aso e tolu e amatalia i le taeao o le aso Tofi i lona itula e 4:00am ua tatau ona auai uma alia i le Fagatogo marina, soso’o ai ma le aso Faraile ma le aso To’ona’i, ma o le aofai ua mae’a fa’auluina nei, e 10 va’a, peita’i, e i ai isi lea e le’i mae’a lesitalaina o latou Alia.

“O se va’aiga i le aofai o tatou alia e tauva e tula’i mai i le 14, pe sili atu, ona o lo’o vala’aulia isi va’a fagota alia uma e o mai, e aoga ona fa’ataua le tatou fo’i taleni, ma tatou milo fa’atasi i lenei fo’i fa’agatama i le tai, e iloga ai se tautai matapalapala o le tai ma vasa,” o se tala fa’amalosi’au mai lea a Va’amua Henry Sesepasara i sui o le Asosi i se fonotaga ananafi.

O le totogi o le lesitala e $200 i le alia, e fa’amaopoopo i le DMWR mo sau lisiti ma e le fa’atapula’aina fo’i le aofai o au ‘auva’a e fesoasoani i lau faiva mo se i’a lapo’a.

E lima vaega ua vaevae i ai le tauvaga: I’a e fai Isu, e pei o le Ise, e sili ona mamafa; Yellow Fin [Asiasi] sili ona mamafa; Wahoo sili ona mamafa; Masimasi sili ona mamafa; ma so’o se isi ituaiga I’a ua sili ona mamafa.

Mo le ulua’i aso o le fagotaga e maua ai lava fa’ailoga mo i’a e sili ona mamafa i vaega ta’itasi ua lisia. Ua fa’apena fo’i le aso Faraile, ae o’o loa i le aso To’ona’i, ona maua lea o le fa’ailoga sili ona mamafa, ma isi fa’ailoga e lua o i’a e soso’o ane le mamafa i vaega ta’itasi.

A uma lea, ona toe faia lea o le isi fa’ailoga fa’apitoa mo le Tautai e sili ona mamafa ana i’a o isi ituaiga uma sa ia mauaina i lona faiva i lea aso.

Pe mae’a ona fuaina i’a i le ulua’i aso ma lona lua o aso, e na’o le i’a manumalo lava e tu’u e le Komiti, ae o isi i’a uma e toe fo’i lava ma le tautai ma lana auva’a e fa’aaoga mo ia. O i’a e taofia e faia ai le tausamiga, fa’asoa mo kamupani sa fesoasoani mo le ulua’i tauvaga lenei, ma fa’ao’o ai nisi i’a mo le Hope House i Fatuoaiga.

Ua fa’ailoa mai, o le fa’amoemoe lenei, ua fesoasoani tele i ai  le DMWR ma ua latou malilie e maua le kesi e ta’i lua kalone 44 ua fa’atumuina i le tau $1.75 i le kalone. O nei kesi e fa’aaogaina e le aufai faiva mo le aso e tasi, ae o le a fa’alua lava ona fa’atumu ia kalone mo le tauvaga lenei.

E le’i mafai ona fa’ailoa mai fa’ailoga mo le tauvaga lenei, ona o lea e le’i mae’a toe fa’ao’o mai tali na talosaga ai nisi o kamupani mo se latou fesoasoani i le tauvaga. Peita’i i le taimi o le fonotaga i le aso ananafi, e na’o le TRI Marine ua mae’a tali mai, ae o faailoga faatoa tufafua i le aso Toanai muamua o Tesema.

I le fonotaga, ua fa’ailoa ai manatu o le aufai faiva, e ao ina talosagaina i ai se seleni mo fa’ailoga ma le sapalai o le aisa mo le fagotaga i aso nei e tolu mo le tauvaga.

“E tatou te le failoto pe afai ae fa’aletonu le tau, mai le 25-45 le malosi o matagi, e le alu le tauvaga, ae a 20-40 le malosi o le matagi, e alu le tauvaga. Afai ae le alu le tauvaga i se aso, ia outou iloa, e toe fa’aaoga ai se aso o le vaiaso lea e tatalia ai tatou fa’ailoga, e fa’aauau ai,” ose fa’amanino lea a Va’amua  i le Asosi.

O le laulauatofi o lenei asosi, o Va’amua o le peresitene, Togotogo Sotoa le failautusi ae teutupe Analosa Fanene.