O le tuana'i ai o le a'oa'oga lea sa faia i le vaiaso na te'a e fa'alauiloa atili ai auala e fa'ailoa ai gaioiga o le fa'apologaina o tagata i totonu o Amerika Samoa, ua atagia mai ai o le vaega fa'amalosi tulafono i totonu o Amerika Samoa, e aofia ai ma Ofisa o lo o galulue mo le puipuia o faiga fa'apologa nei i le atunu'u, e va'ava'ai i auala e fa'amalosia atili ai puipuiga o le tulafono i totonu o le teritori.

Na taua e le tama'ita'i loia sili lagolago ia Mitzie Jessop i le tuana'i ai o lenei a'oa'oga e fa'apea, o le a'oa'oga lenei, ua vaaia ai ni isi o itu lelei mo vaega uma o lo o galulue mo le puipuia o faiga fa'apologa i totonu o Amerika Samoa, aemaise ai o le to'atele o sui o vaega ta'itasi sa fa'atasi atu i le a'oa'oga sa faia mo le umi e lua aso.

O se tasi o itu taua na mafai ona molimauina i lenei fonotaga, o le faia ai lea o se aoaoga na fa'atautaia e le tama'ita'i ia Suzanna Tiapula, e galue i se tasi o vaega o le fetarale.

O le Komisi Fa'apitoa lea na tofia ina ua pasia le tulafono fou e fa'asala ai i latou e faia amioga fai fa'apologa i tagata, ua amata nei ona latou galulue e fa'atulaga ta'iala ma auala e mafai ai ona fesoasoani i matagaluega eseese a le malo, mo le fa'amalosia o lenei tulafono i totonu o le atunuu.

O le taua o le tulafono lea ua pasia nei e le Fono Faitulafono ma sainia e le kovana e avea ma tulafono, o le a mafai ai ona fetufaa'i fa'amatalaga e fa'atatau i tagata sa ta'usala i le faia o solitulafono mataga fa'asaga i fanau teine ma fanau laiti, ina ia mautinoa e le toe i ai se fa'aletonu i le fefa'asoaaina o nei fa'amaumauga.

Na taua e Jessop lona fiafia tele i le tulaga sa i ai le fa'atasi atu o ofisa a le malo aemaise ai vaega fa'amalosi tulafono, aua o iina e iloa ai le mautu ma le malosi o le galulue fa'atasi o ofisa uma o le malo i le fa'amalosia o le tulafono.

Na taua e Tiapula, o le isi vaega o le a mafai ai ona mautu ma malosi le fa'amalosia o le tulafono, o lana aganu'u aemaise ai o tu ma agaifanua a Samoa, lea o lo o mafai ona fa'amalosia e puleaga a ali'i ma faipule o afioaga ma itumalo ta'itasi.

"O le taua o le aganu'u o lo o puipui malu i ai Samoa, o se auala lelei lea e mafai ai ona fa'amalosia puipuiga i totonu o aiga, ma fa'asolo atu ai puipuiga nei i fa'alapotopotoga ta'itasi e aofia ai aoga, ekalesia, mafutaga ma totonu o aoga", o le saunoaga lea a Tiapula.

Sa ia taua fo'i lona talitonu malosi, e le mafai ona alofia e le aganu'u tu ma amioga e alia'e mai i so o se taimi e fa'atino ai se tasi ituaiga solitulafono nei, aua o Samoa o le atunu'u e fusia uma ona tagata i le aganu'u ma le agaifanua e tasi.

Saunoa le afioga i le ali'i faipule ia Vailoata Eteuati Amituana'i, o se tasi lea o faipule e to'alua i ai faipule na auai i lenei aoaoga e fa'apea, o le taua o le aoaoga lenei, e mafai ai ona mautinoa auala eseese e fa'amalosia ai le tulafono i Amerika Samoa, aemaise lava le tufa atu o metotia nei i aoga, ina ia fesoasoani ai i le puipuia o fanau aoga.

Na taua e le afioga a Vailoata, o ia fo'i lea o le Peresetene o le Asosi a Matua ma Faiaoga a le Aoga Tulaga muamua a le SPICC i Fatu ma Futi e fa'apea, afai e le galulue malosi le Asosi a Matua ma Faiaoga e lagolago i le pito laau a faiaoga, aemaise ai o le vaega fa'amalosi tulafono i le puipuia o ituaiga amioga nei, e le mafai fo'i ona puipuia fanau aoga.

I lona talitonuga, e taua le sao o PTA i so o se aoga, o iina e mafai ai ona manino le malosi o puipuiga mo le saogalemu o fanau aoga.