Ua valoia e le afioga i le ali’i Komesina o Leoleo i se fa’atalatalanoaga ma le Samoa News i le vaiaso nei e fa’apea, afai e le suia ituaiga amioga o lo o fa’aalia e ni isi o leoleo aga’i i le mamalu lautele o le atunu’u i le taimi e fa’atino ai a latou tiute i luga o le alatele, e i ai le taimi e i’u ina fasi ai e se tagata o le atunu’u se leoleo.

“...ou te fai so o lava i leoleo, e i ai lava le aso e i’u ina tu’i ai e se isi o le atunu’u se leoleo, ona i ai lea o le mea e tupu mai ai, o le mea lea e tatau lava ona outou fa’aeteete lelei ai i auala e fa’atino ai a outou galuega, aemaise ai o uiga tou te fa’aali atu i le atunu’u”, o se vaega lea o le saunoaga a le ali’i Komesina ia William E. Haleck.

Saunoa le ali’i komesina e fa’apea, e tele naua fa’asea ua ia maua mai ni isi o le mamalu o le atunu’u, e fa’atatau i amio ma auala o lo o fa’atino ai e ni isi o leoleo a latou tiute i luga o le alatele.

“Ou te talanoa lava i leoleo i le tele o taimi, ina ia fa’aali sina amio fa’aaloalo mo le atunu’u, o le ituaiga lagona lena o lea ou te taumafai e faufautua ai i leoleo, ona ua tele naua fa’asea o lo o o’u maua mai i ni isi o le mamalu lautele o le atunu’u, e fa’atatau i amio le mafaufau a leoleo o lo o galulue i luga o le alatele (traffic division), ma ua latou manatu ai o latou o meaalofa fa’apitoa mai le Atua i le lalolagi”, o le saunoaga lea a Haleck.

Saunoa Haleck e fa’apea, o se tulaga e sili tele ona le lelei i le mafaufau o se tagata pe afai e taofi e se leoleo lana ta’avale ina ua ia le tausisia tulafono i luga o le alatele, ae alu atu le leoleo ma fa’aali atu i ai uiga e le manaia i le vaai.

“E le tatau i se leoleo ona ia faia se gaioiga po o se amio e fa’a ita ai se tagata, aemaise lava pe afai o lea ua ia taofia se ta’avale ina ua le tausisi i tulafono o le alatele”, o le isi lea saunoaga a Haleck.

Sa ia taua fo’i e fa’apea, o se tasi lea o lu’itau tele o lo o fetaia’i ma ia i le tele o taimi i lana galuega, o le taumafai lea e faufautua i leoleo ina ia fa’aali uiga fa’aaloalo ma amioga tausa’afia i le mamalu o le atunu’u.

Na fa’afetaia e le ali’i komesina le galuega fita o lo o fa’atinoina e ali’i ma tama’ita’i leoleo i le aso ma le po, ina ia mautinoa e malu puipuia le saogalemu o le atunu’u, peita’i sa ia taua fo’i e fa’apea, e tatau fo’i ona silafia e leoleo, a o fa’atinoina ai a latou tiute, e i ai lava fo’i tagata o le atunu’u e fa’asea ma faitio i auala e fa’atino ai a latou galuega i soo se taimi.

Na taua e le ali’i komesina le igoa o se ali’i leoleo i lana saunoaga ma ia taua ai e fa’apea, “o se fa’ata’ita’iga o le ali’i leoleo o Pepe Mann, e to’atele naua tagata e le fiafia i le ali’i leoleo lea ona o le tele o ituaiga ‘tickets’ na te tu’uina atu i le mamalu o le atunu’u, o ni isi fo’i taimi e le tu’u avanoa ai le ali’i leoleo i tagata, ae atonu ua pau lava o le auala o lo o fa’atinoina ai e le ali’i leoleo lana galuega”, o le isi lea saunoaga a le komesina.

“Sa i ai fo’i le taimi na ma talanoa to’alua ai na maua ma Pepe ma ou faufautua i ai i auala e tatau ona fa’atinoina ai lana galuega, aemaise o lo o ia te ia le malosi e mafai ai ona tu’u atu se ‘ticket’ i se tagata pe tu’u i ai se avanoa”, o le isi lea saunoaga a Haleck.

Na taua fo’i e le ali’i komesina lona fautuaina o le to’atele o leoleo, ina ia fa’aali fo’i uiga fa’aaloalo i le atunu’u i so o se taimi latou te taofia ai i latou i luga o le alatele, ma fa’ailoa lelei i ai o lo o fa’atino a latou galuega e tusa ai ma le tulafono.

E le o se taimi muamua lea ua talatalanoa ai le ali’i komesina i le tulaga o amioga a leoleo aemaise ai o le tatau lea ona fa’aali amioga tausa’afia ma uiga fa’aaloalo aga’i i le atunu’u.

I se tasi o sauniga e fa’apine ai Leoleo o le Kuata a le matagaluega o leoleo sa faia i le masina o Novema 2013 i le potu fono a le Ofisa o Leoleo i Fagatogo, sa fautuaina ai fo’i e le ali’i komesina ali’i ma tama’ita’i leoleo sa auai i lea sauniga, ina ia avea le fa’aaloalo o se a’upega e asoa i o latou ua i soo se taimi e fa’atino ai a latou galuega.

“Afai tou te taofia taavale a tagata o le atunuu i luga o le auala, fai ma le faaaloalo la outou galuega, fai ia pei lava i latou o ni isi o lou aiga, o lou tama po o lou tina fo’i, aua o mea lelei tou te faia, e ta’uleleia atu ai a’u ma le matagaluega atoa o leoleo”, o le saunoaga lea a Haleck i le masina o Novema na te’a nei i le taimi o le fa’apineina o leoleo na filifilia e avea ma Leoleo o le Kuata.

O fesili a le Samoa News e fa’atatau i uiga ma amioga a leoleo o lo o fa’aalia i le taimi e fa’atino ai a latou tiute i luga o le auala, na afua mai i le mataupu lea o lo o tu’uaia ai ni ali’i leoleo i lo latou fa’aaogaina o se malosi e taofi ai se ali’i talavou na faia ni amioga le tau pulea i luga o le alatele, i lona tago lea ma po fa’ailoilo i luga o le auala, ae fetaui ma le o o atu i ai o ni ali’i leoleo o lo o savavali ma fa’atonuina loa lea ali’i e taofi lana gaioiga o lo o faia.

Saunoa Haleck e fa’apea, o le fa’alavelave lenei na tula’i mai i le aso mulimuli o le polokalame na fa’ataua ai le vaiaso mo Leoleo.

O fa’asea mai le aiga o le ali’i na a’afia, o lo o tuuaia ai leoleo i lo latou soona faia o le ali’i na a’afia, ae o lea ali’i e a’afia i le gasegase o le mafaufau.

Na faamanino e Haleck e fa’apea, a o fa’atinoina ai tiute a alii ma tamaitai leoleo i aso taitasi, ia latou malamalama e i ai faitioga ma fa’asea mai le atunu’u e fa’asaga ia i latou, i auala e fa’atino ai a latou tiute, peita’i e le tatau ona avea ia auala ma fa’afitauli e fefe ai le leoleo e fa’atino lona tiute na mafua ai ona fa’atauto o ia e puipui le saogalemu o le atunu’u.

Sa ia taua fo’i e fa’apea, tusa lava pe tele faitioga ma fa’asea mai tagata fa’asaga i leoleo, ae afai e silafia e le leoleo sa fa’atino lana galuega i lalo o tulafono ma ta’iala o lo o fa’atulaga e lima ta’ita’ina ai lana galuega, e leai la mea o le a fefe ai fua pe solomuli mai le fa’atinoina o lana tiute.

Na faamalulu le ali’i komesina i le atunu’u ona o ni isi o fa’aletonu o lo o a’afia ai le atunu’u, e mafua mai i le fa’atinoina o tiute ma galuega fa’atino a le Matagaluega o Leoleo, e pei o le mataupu i le tuai ona taunu’u mai o ID laisene ave ta’avale aemaise ai o laisene ta’avale mo le Ofisa o Ta’avale Afi (OMV) i Tafuna.

O fa’afitauli fa’apenei e pei ona saunoa Haleck, e le mafai ona foia pe afai e le mataala le taitai ma lana aufaigaluega o lo o fa’atinoina lea auaunaga i le atunu’u.

“E le mafai ona ou alu atu i le OMV ma fa’atonu i latou i galuega e tatau ona fai, o le latou tiute ia mautinoa o lo o lelei tulaga uma e fa’atino ai le tautuaina o le atunu’u, ae afai ua i ai se fa’aletonu i le auaunaga a le OMV, o le a matou galulue e fa’alelei”, o le saunoaga lea a Haleck.

E to’atele le atunu’u na fa’aalia lagona fa’asea i le tuai ona taunu’u mai o ID mo laisene ave ta’avale faapea ai laisene mo taavale.

O lea fa’aletonu e pei ona saunoa Haleck, na mafua ina ua tuai ona tu’uina atu le oka i fafo, aua o nofoaga tau mamao ese ma le Iunaite Setete e pei o Amerika Samoa, e faitau vaiaso e aumai ai le oka fa’atoa taunu’u.

O le susuga ia Capt. Lumana’i Maifea lea ua tofia nei e avea ma Pulesili o le Ofisa o le OMV a le malo.