E le o nofo lelei i finagalo o afioga i Senatoa o le maota maualuga tusitusiga e faatatau i le ulua’i ripoti (draft report) o le polokalame o le ‘1602’, lea o lo o faatupe mai e le feterale e fausia ai fale mo i latou e vaivai le tamaoaiga, lea o lo o i lalo o le faatautaiga a le Faletupe o Atina’e a Amerika Samoa.

O atugaluga o nisi o Senatoa e pei ona lalafo ai i le taeao ananafi i le taimi o folafolaga a le maota maualuga, na tasi ai loa le filiga ina ia faatulaga se iloiloga e fesiligia ai le taitai o le Ofisa sa tapenaina le ripoti, mo se faamaninoga o le mataupu e pei ona vavao ai le atunuu.

O le ripoti na tapenaina e le Ofisa o lo o vaavaaia tupe na tuuina mai e le feterale e fesoasoani ai i le toe faaleleia o le tamaoaiga o Amerika Samoa, le American Samoa Economy Stimulus and Recovery Office (ASESRO).

I totonu o lenei ripoti o lo o taua ai ni isi o tuuaiga faasaga i le Komiti Faafoe a le Faletupe o Atina’e, i le le mulimulita’i i ta’iala sa tuuina mai e faatautaia ai le faagaioiina o le polokalame.

Ua tolu lomiga a le Samoa News i le gagana peretania e faatatau i le ripoti lenei, e pei ona faasalalauina i le vaiaso na te’a nei atoa ai ma le aso ananafi.

O le afioga i le alii Senatoa ia Mauga Tasi Asuega na ulua’i lagaina le mataupu lenei, ma ia faaalia ai lona faanoanoa tele ona o tulaga uma e pei ona taua i le ripoti, aemaise ai o lea ua salalau i soo se itu o le malo tele.

Na fa’aalia e le afioga Senatoa Alo Dr. Paul Stevenson, le atugalu o lona sui, ona e le gata o Amerika Samoa o lo o alu ai tala i le ripoti lenei, ae o lo o salalau atu i le malo tele aemaise ai foi le vaega suesue a le feterale, le FBI, ma o iina o le a tulai mai ai se manatu faapea i le malo tele, e le o mafai a Amerika Samoa ma ona taitai ona foia ma taitai le malo i ala e tatau ai.

“Ou te ofo pe na faapefea ona liki i tua kopi o le ripoti lenei ae o lea o loo i ai le taitai o le Ofisa ma ana tagata faigaluega sa faatautaia le ripoti, ae o le fesili tele o loo tulai mai, o le a se mea a le taitai o le Ofisa ua fai i le tagata lea na liki atu ai i tua faamatalaga e uiga i le ripoti,?” o le saunoaga lea a le afioga i le alii Senatoa ia Velega Savali Jr.

Saunoa Velega, ana faapea e faigaluega ia te ia le tagata lea na liki ai i tua faamatalaga o le ripoti, faapenei ua le toe faigaluega lea tagata.

“Ae o le fesili, afai o iloa e le taitai o le Ofisa, e i ai se faaiuga ua fai i le tagata lea na liki ai i tua le ripoti,?” o le fesili lea a Velega i luma o le maota.

O atugaluga o le alii Senatoa mai Manu’a na ia taua ai e faapea, e tatau ona silafia ma malamalama e le Fono tulaga o le mataupu lenei, aua o lea ua vavao le atunuu ae o loo nonofo pogisa le fono.

O le finagalo foi lea o le afioga i le alii Senatoa ia Galea’i Tuufuli ina ua maua lona avanoa e saunoa ai i le mataupu.

Saunoa Galea’i, e ui e tau o ia i le tagata o loo ta’iulu i ai le Ofisa lenei, peitai e le taofia ai le fai o le mea amiotonu, “o le upu foi lea e faapea o le ‘draft report lava o le draft report, e uma ona toe faasa’o lea,’ o le tala lava i le tusi oti, aua e faapefea ona toe faasa’o ma toe sui le ripoti o lea ua salalau i tua ma ua oo atu i fafo tala aave i mea o loo taua ai,?”

O le susuga ia Pat Galea’i o loo faauluulu i ai le Ofisa a le ASESRO, lea na o latou saunia le ripoti e pei ona vavao ai le maota maualuga i le taeao ananafi.

Saunoa le afioga i le alii Peresetene o le Senate ia Gaoteote Palaie Tofau, na te lagolagoina finagalo o afioga i Senatoa, ina ia faatulaga se aso e fesiligia ai le taitai o le Ofisa ma le tagata na tapenaina le ripoti, e uiga i tala ua salalau ma lomia i luga o le nusipepa.

Na faamanino e Gaoteote i luma o Senatoa, e leai se ripoti ua taunuu atu i le laulau, peitai e le faaaogaina e le laulau ni ripoti afaafa ma le atoatoa, sei vagana ai ripoti aloaia e tusa ai o ala o galuega.

E lei faailoa mai se aso e faataunuu ai se iloiloga e uiga i lenei mataupu.