Ads by Google Ads by Google

Vavau a Samoa

O LE TALA IA SAU MA FINE I TUFUTAFOE

 

O se tasi lenei o tala tuu e uiga ese foi lona faamatalaina i Samoa, ona o iinei na afua mai ai ni isi o alagaupu ma muagagana ua tele ina faaaoga e Faleupolu i a latou folasaga i le taimi nei.

 

Fai mai le tala o le ulugalii lenei o Sau ma Fine, sa nonofo i le nuu o Tufutafoe i Savaii i le pitonuu e taua o Lalolama. E leai se fanau a le ulugalii i lea taimi, ae na o laua lava lo la aiga. I se tasi afiafi, na alu ai le tamaloa o Sau e toli mai ni ulu e fai ai se la meaai, faatali atu le fafine o Fine i le fale. Fai mai le tala, na alu le toligaulu a Sau i le aoauli e lei taitai, ae po ane lava le aso e leai ma se ulu na maua, ona toe fo’i ai loa lea o le ta maloa i uta i le la fale ma si ona to’alua, ae na te’i ina ua valaau ane i ai se tagata, e vaai le fua o le ulu la le e tautau mai e alu e toli ma ia.

 

Na toe foi le tamaloa ma toli mai i lalo le fua o le ulu, peitai na toe valaau atu i ai le tagata e vaai le isi ulu o lo o tautau mai i le isi itu e toli ma ia, na faasaga atu le tamaloa ua toli le ulu lea, ae tei foi ina ua toe valaau ane le tagta lea lea, e vaai le isi ulu o lo o tautau mai i le isi itu e toli, ma sa faapea foi ona usitai i ai le tamaloa ma toli ma ia ulu nei, ma ua vaaia le tele o ulu ua uma ona toli, ona alu ane loa lea o le tamaloa e tufi ulu ua paepae i lalo o le ulu. Ao tufi ulu le tamaloa i le anoanoa’i o ulu sa ia tolia, na te’i ina ua tau atu i le atigi ulupoo o si ona atalii o lo o taatia mai i le isi itu, ua uma ona ai e lana ava lona tino ae totoe ai na o le atigi poo o le ulu, o lea na fo’i ai loa le tamaloa i uta i le la fale ma lona ita tele, ma lona manatu, o le a fasioti loa lona toalua ona o le mea leaga ua ia faia i lona atalii, ae na te’i le tamalo aina ua fai atu i ai le atigi ulupoo o lo o alu ma ia, “aua ete fasiotia le fafine, aua ua tonu lana mea ua fai, ua e toli ulu i fuata o amiotonu, ae sili pe a lalaga se ato ae tuu i ai a’u”, o le faatonuga lea a le atigi ulupo sa fai i le tamaloa, lea fo’i ona usita’i i ai le tamaloa ma faatino loa, e ala i lona lalagaina o le ato lea ua faaigoaina nei o le ‘ola’ ae tuu ai i totonu o le atigi ulu poo ma alu loa ma ia.

 

E talitonu ni isi o afioaga o Samoa, o le mea lea sa tuu e le tamaloa i totonu o le ato po o le ola, o le ‘ola’ o lona atalii, o iina lea na mafua ai ona maua le igoa o le ato o le ‘ola’, ma fa’aigoa ai loa le tama lea o Mata’ulufotu.

 

I se tasi aso, na sau ai se aumalaga mai Fiti e saili atu se fofo i Samoa mo le gasegase o le afafine o le Tui Fiti, ona taumafai lea o le ulugalii o Sau ma Fine e fa’aafe le malaga, peita’i e le’i afe ae sa alu pea le va’a, ae ina ua oo atu i Puava le malaga, sa afatia ai loa iina, ona toe fo’i mai ai loa lea o le malaga ma avatu le ulugalii ma latou malaga loa i Fiti, peita’i e taunuu atu le malaga, ua maliu le afafine o le Tui Fiti, ona ua tuai atu le faiga malaga. Na fesili le Tui Fiti i le au malaga pe ua maua mai se fofo mai Samoa, ae na tali le au malaga, o lea ua latou o atu ma le ulugalii mai Samoa, ona faapea lea o le tala a le Tui Fiti, “talu ai ua oti lo’u afafine ao lea faatoa taunuu mai le malaga, o lea, ia fai se auala e toe fa’aolo mai ai lo’u afafine, afai e le mafai, o le a mu loa le foaga”.