O LE TOGA A ALAI’ASA

O le toga lenei na mafua ai se tasi o tala tu'u ma o lo o avea nei lava ma Vavau o le atunu'u, fai mai sa i ai se mea na tupu i aso anamua, ina ua sopo tofaga Tupuola i le faletua o So’oa’emalelagi, ona fai lea o lona fa'asalaga, ua oso ma le lau e pei o fa'asalaga fa'ale atunu'u, ua le gata i lea, a ua fa'ato e sa ona toe nofo i totonu o Leulumoega, a ua fa'atafea faitalia o ia ma le mea e alu i ai.

Fai mai le mau a Samoa, ua alu Tupuola ma lona fa'anoanoa tele, po o ai o le a maua i ai sona mapusaga, ma lavea’i ia te ia mai ona puapuaga, ona tonu ai lea i lona manatu, e sili ai ona sulu i Aiga atonu e tali i ona mafatiaga, ona sulu ai lea i Lotofaga i le Aiga Salevalasi ae fai mai le afioga a Salevalasi le Aiga Paia, “Tupuola e, e faigata lau mata'upu na e o'o mai ai, e faigata fo’i ona gagau le la'au a’o mata, ae sili ona talitali laofia seia o'o i se isi taimi, ona fesoasoani atu lea o Salevalasi i ou puapuaga.

Ua tupu le le fiafia o Tupuola ona toe sa'ili ai lea i se isi fesoasoani, ma o'o atu ai ia Safenunuivao i Falefa, peita'i sa te'ena fo’i se tali mo ia ona o le manatu, e le i i ai ni aso talu ona alu ese mai Leulumoega, ona sulu loa lea i le Aiga Sa Alai’asa lea na mafai loa ona tali i ona puapuaga. O le mea ua tupu, ua sa'ili nei e Alai’asa ni tagata malolosi e avea ma ana auva’a, ae o tagata fo’i ia o le a fai ma ana au tau latou te momoliina Tupuola i lona nu'u, fai mai le mau a le atunu'u, ona maua ai lea e Alai’asa tagata mai Gautaala, ma o le pine fa'amau o lea mau o le matai Gautaala e igoa ia “Talitalilaofie” e fa'amanatu ai le malelega a Salevalasi ia Tupuola, e fa'atali se’i o'o i se aso.

Fai mai ua fa'ae'e le va'a ona alu loa lea o le malaga, peitai na fa'ate'ia Alai’asa ina ua va'ai mai i le taumuli o le va’a, o lo o nofo atu ai Iuli, ma na o Iuli lava le tulafale o lo o nofo atu ai, ma o le ala lea e ta'ua ai Iuli o le tulafale o le Aiga Sa Alai’asa. Fai mai le tala, ua va'ai mai Leulumoega o lo o tumutumu i Nu'uausala, ua alu atu lava le va’a ma sunu’i lona taumua i Nu'uausala, ona velo lea e Alai’asa o le tao ma tu i le pogati o le niu, ma o i'ina lea na mafua ai le toga a le Aiga Sa Alai’asa e ta'ua o le “Pa’uniu ma le Fa’atutao, ona fa'aulufale lea e Leulumoega o le malaga ma le manatu o le a fasi Ala’iasa, peita'i ane ina ua fai le taufolo, sa vala'au atu Alai’asa e togi mai le puta o le taufolo, ma ina ua togi atu ia te ia, sa ia folo atoa ona manatu ai lea o Leulumoega, e itulua le tagata lenei, ona fa'apea ai loa lea o Leulumoega, “ua ola le pagota.” Fai mai Leulumoega, “Alai’asa, o le a avea oe ma le na fita-i-tuga ma lau toga o le pa’uniu ma le fa’atutao, o le a fa'aigoa fo’i oe o le Va’asi’itasi.” Soifua.