Ads by Google Ads by Google

Vavau a Samoa

O LE TALA I LE TAMA O ALO

 

I le agai i uta i le auala galue o le nuu o Asaga, e tu ai le ana e taua o le ‘ana o le Imoa’, peitai fai mai mau ma le talatuu a Samoa, o le ogaeleele lea o loo i ai le ana o le Imoa, o lona igoa muamua sa I ai i aso anamua, o ‘Naisaafa’ ma fai mai le tala, o le igoa lea o le tupu o Amoa sa i ai i ia ona po, ma sa nofo ai i le eleele lea.

 

E faapea la le tala tuu, o le tamaitai o Sinalefatumoa na usu i ai le alii o Amoa o Naisaafa ona maua ai lea o le tama o Alo, le tama la lea o loo faapea mai le tala, na alu i se tasi aso e utu sami mo lona aiga, ae alu atu o fai mai le taaloga o le ‘faatau moa’ poo le taumafai lea o tagata e faatau ni moa se lua, ma o lea taaloga sa faia i le nuu o Puapua. Na toe vave foi Alo i uta i lona tina ma tauanau ina ia saili mai sana moa e aumai i le taugamoa lea o loo faia i Puapua, peitai na le fiafia i ai lona tina, le tamaitai o Sinalefatumoa, ona ia alu lea ua ave ia Alo le manu o le Ti’atala e tau ai, ona toe foi loa lea o le tama i Puapua ma lana Ti’otala.

 

Fai mai le tala na manumalo aoao le tama o Alo i lana Ti’otala, ona o le moa lava e tau ma le Ti’otala a Alo, e mautinoa lava e tatogi e le Ti’otala mata ma iu ai lava ina mate ai, ma talu mai lea aso, fai le tala e lei toe faia ai lava ni tauga moa i totonu o Puapua, peitai ua ese le taaloga lea ua fai, ua fai taga-ti’a, ma sa auai foi ma le tama o Alo, ona o lona fia vaai i lona tama. I se tasi aso, ona fai lea o Sinalefatumoa i lana tama o Alo, afai e i ai se aso e alu ai e su’e lona tama, o le tagata lava e tau atu i ai o nofo mai i luga o le ogalaau, o lona tama lena. O le faiga la o le taalo a Alo, o ia e ta ti’a, ae o lona tina e alu e su’e mai le ti’a.

 

I se tasi aso fai mai ua vevela le taaloga taga-ti’a, na ta mai ai e Alo lana ti’a mai le se vaega e taua o Papalaulelei, ma alu atu sa’o lava le ti’a ua nofo i totonu o le Ana o Meto i Puapua. Ma o iina na mafua ai se tasi o upu faamuagagana a le atunuu e faapea, “O le ti’a Ulutonu” e faamanatu ai le ti’a na ta e Alo ma ulu i totonu o le Ana o le tamaitai o Meto. Ona tuu ai lea o le taga-ti’a, ae ua o uma le nuu o Papalaulelei e saili mai le ti’a a le tama o Alo, peitai e o atu ae fai mai le le tamaitai o Meto, “seiloga lava e alu atu le tagata e ana ia le ti’a e aumai lana ti’a ona faatoa aumai lea.” Ona alu ai loa lea o Alo e aumai lana tia, ae fai le mau o le taimi lava na ulufale ai Alo i totonu o le Ana o Meto, o le taimi foi lea na faasaga ane ai loa Meto ua tapunipuni uma le Ana ma ua faigata i le tama o Alo ona toe sau i fafo.