Ads by Google Ads by Google

VAVAU A SAMOA

TALA I LE AU USO O TO’OUTA MA TO’OTAI

 

O se tasi lenei o auala e talitonu A’ana na maua ai nisi i igoa o nuu i le atunu A’ana, fai mai le talitonuga, o tama nei o Tutuila ma Ape, o la igoa muamua lava na iloa ai o Toouta ma Tootai, o le fanau lea e toalua a le ulugalii o Tapuola ma Fasi, fai mai le tala, a’o alu le faiva mafa fe’e a le tamaloa o Tapuola i le isi po, fai mai sa faigata le faiva, ua too i uta le vaa toe too i tai i le sou o le po, ae te’i ina ua alu atu le avea’i e toe fo’i atu i uta ua fanau lona to’alua, o le masaga tama lana fanau, ona fai atu lea o Tapuola i lona toalua o Fasi, “ua lelei, o le mea sili ua e ola ma ua malolosi lau fanau, ae o le a faaigoa tama nei ia Toouta ma Tootai, e faamanatu ai le taimi na too ai i tua ma toe too ai i tai lo’u vaa a’o alu lo’u faiva,” ona malie lea i ai o le fafine i le tonu a lona toalua, faatasi ai ma lana talosaga, o le a faamuamua lona igoa o Fasi i le pito i luma o igoa o lana fanau, ona maua ai loa lea o igoa o tama o Fasito’outa ma Fasito’otai.

 

O tama la ia o Tutuila ma Ape fai mai le tala, na o sii le la faletautu ia Tuia’ana Vaema, ae aioi ane i ai Tuia’ana Vaema, e musu e alu leaga o lo o papala ona vae, ae lelei le nonofo se’i pe papala o ona vae. O Vaema na mafua ona papala ona vae, sa leaga i le taimi na ta ai lana pe’a, peitai sa finau atu pea tama ia Vaema, aua le popole ae latou o pea e asi le taupou, ona o loa lea o tama ma Vaema e asi le taupou, peitai o le mea ua tupu, ua musu le taupou o Vaetamasoali’i ina ua vaai atu e papala uma vae o Vaema.

 

Ua faaauau le malaga a Tutuila ma Ape poo Toouta ma Tootai i Savaii i le taimi na tufa ai le feti’i a Salemuliaga i Amoa, peitai o le mea ua tupu e le’i maua ai se inati a tama, ona fo’i lea o tama ma tomumu fano i le ala ina ua le maua so laua inati, ae fetaui le oo atu o tama i Faga o lo o sasa mai ai le ‘afa a le toeaina o Leululei’ite, sa lagona uma e le toeaina tomumu a le au uso lea, ona fesili lea o le toeaina i tama, pe aisea lava ua la tomumu fano ai i luga o le ala, ae tali le au uso, “e le’i maua se ma inati i le tufaina o le feti’i a Salemuliata,” ae fai atu i ai Leululei’ite, “ete lua iloa le mea ua tupu, ua mafua ona le maua sa oulua inati, leaga e leai se alii na oulua o ma ave, ae o mai ina o i Safotulafai o lo o i ai le tama o Selaginato, o e ave e sii ai le lua faletautu e saili ai so oulua ali’i.” Fai mai le tala, ua usita’i tama o Toouta ma Tootai, ona la o lea i Safotulafai ma ave le tama o Selaginato i Safata i le tamaitai o Vaetamasoalii, ona ma’itaga ai loa lea o le tamaitai.