Ads by Google Ads by Google

Vavau a Samoa

O LE TAUA A ATUA MA TONGA

 

O le ‘olo lenei, ua tamau ai le taofi e pei ona tauave mai i le tele o tausaga, o tagata Tonga na fausiaina i taimi ao pulea e Tonga ia Samoa, ma o lenei ua tele ina a’oa’oina ai tama fanau a le atunuu o Samoa o loo aumau i atunuu eseese, ma ua soo ai le lalolagi, peitai e ese ma le mau a le afioaga o Luatuanuu. Fai mai le mau a le afioaga, o le ‘olo lenei na fau e le itumalo o Atua i le taimi o va tau ma le Tuamasaga talu ai o la eleele, lea na avea ai Malietoa Falefatu ma taitai au o le Tuamasaga ae o Tuiatua Fotuitamai na taitaia maia le au tau a Atua, ma o le igoa o lenei taua na taua o le “Fasitele”, ona o le taua muamua na to’ilalo ai Atua.

 

Fai mai ua si’i le tuaoi i le pitonuu e taua o Asusu i Salelesi i le itu i Sasa’e o Luatuanuu, peitai e le’i faamalieina Tuiatua ina ua to’ilalo ma sa faanatinati loa ana tapenaga ina ia toe sosofa i lalo le tuaoi ua maea ona faia, ae o Malietoa ma lana itu au, ua faamalieina lava i le tulaga ua i ai le taua, ma sa manatu fo’i ailoga e toe vave lagaina le to’ilalo o Atua, peitai sa le faapena le finagalo o Tuiatua, ona e le’i mapu pea lona finagallo i le matuitui o le to’ilalo ua oo i lana itu taua.

 

O le mea ua tupu, ua faalilolilo le faia o tapenga a le au tau a Atua, ma ua latou ui faalilolilo atu ai i le ‘olo, e ui atu i saute ma le itu i uta, ma a’o faaauau pea ona gasolosolo atu le au tau a Atua i le ‘olo, na faafuase’i ona oo le avea’i ia Malietoa, ua nofoia e au tau mai Atua le ‘olo ma ua faaletonu ai le mafaufau o Malietoa, pe na faapefea ona ala atu au tau mai Atua i le ‘olo.

 

Fai mai sa faanatinati atu loa Malietoa i gatai o Luatuanu’u e auala atu i ana fuavaa, ina ia faailoa atu ia Tuiatua ona tomai i le tulaga o le tau i luga o le sami ma ana fuava’a, peitai na atili ai ona faaletonu lona mafaufau ina ua taunuu atu, e leai ma ni fuava’a a Atua o taula mai i gatai o Luatuanu’u, peitai sa leai se mea na lilo i le vaavaai mai o le au tau a Atua mai luga o le ‘olo.

 

Sa le maua pea se tonu lelei i le finagalo o Malietoa, o lea na ia nanati atu ai loa i lana autau ma amata ai loa le latou osofaiga faasaga ia Atua, e faaaoga mai ai luga o le mauga ma le tuasivi, fai mai e le’i faigofie ia Malietoa ma lana autau lenei osofaiga, ona o le toatele o lana vaegaau na fetolofi i tuli i luga o le mauga, lea na maua ai le igoa o le ogaeleele lea e taua o “Olotuli.”

 

Fai mai le tala o le taeao po lava o le aso na soso’o ai na taunuu ai vaega au a Malietoa i le ‘olo ma amata loa lea taua, ma o se taua na matua tele ai le toto masa’a talu ai le tomai tele o autau mai Atua i luga o le fogaeleele, ae pei fo’i ona silafia, e fita le ala na uia e Malietoa ma lana autau, o le ala lena o le to’atele o le fasi ona ua vaivai i le taimi na aea ai le ‘olo.

 

E faaauau atu i le vaiaso fou le tulaga na oo i ai le taua. Soifua.