AUOMANU MA LE AUOMALA

Vaega #4

Manatua fo’i na gata mai le tatou Vavau i le vaiaso na te’a nei i le taimi lea e masani ai ona tau mulimuli Laulu i soo se mea e lele i ai lana fagafao Tava’e. O le masani fo’i e le tamaloa, o taeao uma lava e ala usu ai i le Faga e fafaga lana Tava’e ma ave i ai lana vai inu ina ne’i oso lona fia ‘ai, ma ua fai pea lava ma masani a Laulu le tausi ma le fa’amaoni i lana fagafao. I le isi aso, na fa’ateia ai Laulu ina ua usu atu i le Faga e fafaga lana Tavae, ae alu atu o loo ta’atitia mai ai ivi i’a i totonu o le Faga, ona oso lea o mafaufauga o le ali’i, pe na fa’apefea ona oo atu nei ivi i’a i totonu o le Faga a lana Tava’e. Ua tau fa’aletonu le mafaufau o Laulu i le ofo tele, pe mafai faapefea e ni ivi i’a ona oo i uta ae o i’a e maua i le sami, ae ina ua usu mai Laulu i le isi taeao e fafaga lana Tava’e, sa ia maitauina ai, ua amata lava ona tele ivi i’a i totonu o le Faga, ma ua oso ai loa lona masalosalo, e i ai le mea o loo tupu i lana Tava’e.

E lei malamalama lelei le isi aso ae ala usu mai loa Laulu ua tatala le Faga ma aumai i fafo le Tava’e, ona ia fa’alele loa lea poo fea e lele i ai, ma ia vaaia ai ua lele sa’o lava le Tava’e aga’i i le sami, ona mulimuli ai fo’i lea o le ali’i i le sami lea ua lele aga’i i ai le Tavae. Na vaaia e Laulu le lele fa’atamilomilo solo o le Tava’e i luga o le sami e foliga mai e i ai se mea o loo ia tuli mata’iina, e lei umi ona lele fa’atifa le Tava’e ae vaaia loa e Laulu le fa’atifa o le Tava’e i lalo o le sami, ona toso lea e le Tava’e o se tasi o ona fulu umi lava aga’i i le sami ma vaaia ai e Laulu le toso mai e le Tava’e i luga o le i’a, ona toe fa’amoe lea e le Tava’e o lona fulu ae lele ese mai loa ma le sami ma lele atu loa aga’i i uta, ao Laulu i le taimi lea, ua na o le tu ma le ofo o lona loto, i le auala na mafai ai e le Tava’e ona maua lana i’a, lea ua mafua ai ona maua ivi i’a i totonu o le Faga o loo tausi ai, ona tonu ai loa lea i le mafaufau o Laulu, o le a ia se’i ese le fulu o le Tava’e ae aumai e fafau ai lana Pa Fagota, atonu e ‘aina ma maua ai ni i’a mo ana faiva.

 Ua oo i le isi aso a’o moe le Tava’e, na tolotolo atu ai loa Laulu ma se’i ese mai lona fulu lea sa masani ona fagota ai ana i’a i le sami, le fulu tonu lava lea e mafua ai le upu a le atunu’u, fai mai e mamae i ai le Tava’e, ona ave lea e Laulu le fulu ma fafau i lana Pa Fagota, ma fai mai le tala a oo ina toso le Pa Fagota a Laulu, e mata’utia le tele o i’a, ona amata loa lea ona fagota e Laulu le Pa, ma ua ofo ai le nu’u i le tele naua o i’a e maua mai ai, ma o iina na mafua ai loa ona faapea Laulu, “E iloa le lelei o le Pa lenei pe afai e goto lo’u va’a.” Ua alu le faiva a Laulu ma le isi tagata, ona vaaia lea e Laulu e foliga mai o le a goto le va’a i le tele o i’a, ona fai atu lea o Laulu i le ali’i na la to’alua, vaai le va’a o le a goto, ae sa fagota pea lava le tagata lenei, ma i’u ai lava ina goto le va’a, ma o iina na maua ai le upu, “Na tagisia lava e Laulu se va’a ia goto”. Ona aau lea o Laulu ma le tagata sa la o e fagogota i uta, peitai ua malosi la ‘au, ona fai lea o Laulu i le tagata lea, “alu e ave le Pa Fagota lea ia Sina, ao a’u o le a ou nofo iinei e tatali le malosi o le ‘au.” E oo mai lava i aso nei o loo i ai pea le “aau o Laulu” e faamanatu ai le vaega tonu na goto ai lona va’a ma maliu ai, ae o le taimi fo’i lea ua oo atu ai le Pa Fagota ia Sina ma lana tama o Taotunu.