LUPEULUIVA A TUISAMOA

I le isi itu o le afioaga o Aopo i Savai’i e i ai le nofoaga e taua o “Talagagaau”, ma o lo o i ai pea se vaega ua liupapa i le nofoaga lea o lo o fai ma mau fa’amaonia o mea sa tutupu ai i aso ua mavae. O le igoa o le nofoaga lenei na mafua mai i le taimi na fasi mate ai e le tagata mai Aopo o Lake lona igoa le Lupeuluiva a Tuisamoa o Falealili, ona tala lea o le gaau (tulou) o le Lupe ma tia’i ai i le nofoaga lea i le taimi na fa’avai ai e le tagata lenei o Lake le Lupe, ma o nei pine fa’amau o lo o vaaia pea lava i luga o le papa o lo o i ai i le nofoaga lea, e fai ma pine o lenei Vavau.

O le masani a le Lupeuluiva lenei a Tuisamoa, po o fea lava le mamao o le vaega e felelea’i solo ai, e toe fo’i ane lava i lona ali’i, o isi taimi e fetaui lava le alu ane o le auauna a Tuisamoa e fafaga le Luupe ae fetaui ma le toe fo’i ane i lona ofaga masani, ma ua avea ai ma itu e le popole ai Tuisamoa i le umi e lele ese ai lana Lupe. Fai mai le tala, a o galue le tagata lenei o Lake i lana fa’atoaga i le isi aoauli, ae fa’ateia o ia ina ua ia vaaia le punitia fa’afuase’i o le mata o le la ae leai ni ao e ono punitia ai le susulu o le mata o le la. Na fa’ateia Lake ina ua ia tepa a’e i luga ae tau lana vaai i le Lupe o lo o fa’apepepepe i ona luga, o le mafua’aga lena o le punitia o le mata o le La, e le i toe fa’atali Lake i le taimi lea ae ua aapa atu loa i lana ‘oso toto tiapula ma au ato ai le Lupe ma pau mai ai loa i lalo ua mate, ona faasaga atu loa lea o Lake ua faamama le tino o le Lupe, ma tia’i ai le gaau o le Lupe i le vaega ua taua nei o le Talagagaau, ona ia pusa lea o le suavai ae fa’avela ai le Lupe.

Na ona pulou lava o le suavai a Lake, aga’i atu loa le ali’i i le vai taele e fa’amalu ai, e fa’atalitali ai le taimi e fu’e mai ai le suavai, ae na fa’ateia o ia ina ua la fetaui ma le tagata e igoa ia Topelei, o le soga po o le auauna a Tuisamoa, o lo o alu atu e saili le Lupe, ona fesili lea o Topelei ia Lake pe le’i vaai i le Lupe ae na tali Lake, ua uma ona ia fasimatea le Lupe, ma o lo o faavai i le suavai lea ua toeitiiti fu’e, o le ita o Topelei ia Lake ma lana mea leaga ua fai na fa’asaga atu ai loa ma fai le la taua. Fai mai na matua alu lena aso o faatau tutu pea Topelei ma Lake, e leai ma isi na faavaivai. Fai mai le mau a Aopo, e ui i le malosi o Topelei, ae na fasiotia e Lake i le vaega lava sa fa’avai ai le Lupe a lona ali’i, ae fai mai le talitonuga a Faleali’i, na fasioti e Topelei ia Lake i le la taua lea, e mafua lea tulaga, aua fo’i ana sa’o na fasioti e Lake ia Topelei atonu e o o mai lava i aso nei ona tauosi ni faia e fai ma pine fa’amau.