O le mau a Samoa e uiga i le talatu’u o le tagata lenei o Lata poo Rata fo’i fai mai, o ia o le ulua’i tagata folau i le Pasefika. O ona matua o Fafieloa ma Tula, ae o le mea ua tupu, ua fasiotia lona tama e le toa o le nuu o Fogatuli, le tagata e igoa ia Matuutaotao, o le mafuaaga lena na alu ai loa le tagata lenei o Lata e saili le na fasiotia lona tama, se’i tauia lona toto, o lea na amata ai loa ona fau lona va’a e malaga ai, ma fai mai le tala tu’u a Manu’a o le va’a lenei na fau i le ogaeleele e taua o Tafagafaga i le isi itu o Ta’u, Manu’a ma ina ua mae’a le fauina o lona va’a, sa amata folau loa e taamilo i le atu Samoa, lea na mua’i taunuu i Savai’i ma fai mai le tala, o nuu uma lava e tau i ai ana malaga na te faaigoaina i lona igoa.

Ua fiu Lata e taamilo i le atu Samoa e le’i maua ai lava lona fili ona faaauau ai loa lea o lana folauga i Toga lea fai mai le tala tuu a Samoa na oti ai iina Lata, ona o ane lea o tagata Toga ua talepe lona vaa ae toe fau, ma o le mafuaaga lena na ala ai ona lelei le fau va’a a tagata mai Toga, peitai fai mai le isi mau a le atunuu, e le’i oti Lata i Toga, ae ina ua folau i Savai’i, na tuia ai iina lona va’a, ona aau lea i uta i le fia tuliloloaina lava o lona fili, peitai e taunuu atu ua sola lona fili i se va’a, ona ia manatu lea o le a nofo se’i toe fau se isi ona va’a ona toe faaauau ai lea o lana sailiga.

Ua malama le taeao fou, ona alu lea o Lata i le vaomatua e saili ni laau lelei e fau ai sona va’a fou. Ua ia vaaia le laau lenei o le tamanu, ona ia faalalo lea o tamanu, ua ia vane ma e aso atoa o fai lea galuega, ma ua lagona ai lona vaivai, ona ia manatu ai loa lea o le a malolo seia aulia le taeao fou, ae taatitia ai lava laau ua maea ona ia vaveina i le mea sa i ai, peitai ina ua malama le isi taeao, na te’i le tama ina ua alu atu i le vaega sa i ai laau na faamoemoe e fau ai lona va’a, ua leai se mea, ma le vaai atu i le isi itu, ua toe tutu i luga laau, ua faaletonu lona mafaufau, ona ia toe tago atu lea i lana to’i ma’a ua toe ta ai i lalo tamanu ma toe faaauau fo’i lana galuega masani o le vane ina lea o laau mo lona va’a, peitai ua le uma le galuega ona ua lagona lona vaivai, ona malolo ai loa lea seia aulia le isi aso, peitai ina ua malama le taeao fou na te’i le tama ina ua alu usu atu ua toe tutu mai fo’i tamanu e pei lava fo’i o isi laau o le vaomatua, ona oso ai loa lea o le ita o Lata, ma ua tago atu loa i lana to’i ua toe amata lana galuega i le ta tuu ina i lalo o tamanu, peitai o le mea mata’utia ua tupu, o fasi laau ia ua uma ona ta ese e Lata i lana to’i, na ona pauu lava i lalo ma toe tulioso ane ua pipi’i i le tino o le laau, ma o le taimi lava fo’i lea na amata ai loa ona faalogoina e Lata pesega a Saualii ua sau mai luga o tumutumu o laau. Tulitatao mai i le vaiaso fou pe o le a le tulaga lea o le a oo i ai le galuega a Lata, ae o ai fo’i e pule i laau nei ua ia ta ina i lalo. Soifua.