E ui o lea ua tu lalata mai le taimi e fa’amuta ai le auaunaga a le lala o le Faletupe a Hawaii i Amerika Samoa, peita’i na taua e le afioga i le tama’ita’i faipule ia Vui Florence Tuaumu-Saulo, o se tasi fo’i o tina faipisinisi i le atunu’u, o lo o mana’omia pea e le to’atele o le aufaipisinisi le tautua a le faletupe, mo le fa’atinoina o auauanaga tau pisinisi i fafo atu o le teritori.

O le mataupu i le tula’i ese atu o le faletupe a Hawaii atoa ai ma le manatu e toe tu’u tasi atu i ai se talosaga ina ia nofo mai, na fa’atula’i e le afiog i le ali’i faipule mai le itumalo o Manu’a #1 ia Vesi Talalelei Tautanu

Saunoa Vesi e fa’apea, e ui na te le o iloaina tu’ugatala ua mae’a ona faia e le malo ma le faletupe o Hawaii, peita’i o lona talitonuga, e tatau lava ona toe tu’u tasi atu i ai se talosaga i le faletupe ina ia toe fa’aauau pea lana tautua mo Amerika Samoa.

O lea saunoaga na lagolagoina e ni isi o sui o le maota e aofia ai Fatulegae’e Palepoi Mauga ma Vui.

 Na taua e Fatulegae’e ma Vui lo la lagolagoina o fuafuaga a le ali’i kovana ma le faigamalo e fa’atula’i se isi faletupe fou e sui tulaga i le faletupe a Hawaii o le a tula’i ese, peita’i o le itu o lo o la mana’omia e tatau ona manino, pe gafatia e le faletupe fou lea ona fa’atino auaunaga o lo o fa’atupe e le faletupe a Hawaii e aofia ai teugatupe i fafo.

“Ou te fa’afetai i le ali’i kovana ia Lolo Matalasi Moliga ma le tofa ua a’e ina ia fa’avae se faletupe fou mo tagata o le atunu’u, ae i lo’u taofi, e mana’omia tele e le aufaipisinisi le tautua a le faletupe a Hawai’i”, o le saunoaga lea a Vui i luma o le maota, ma ia talosagaina ai se avanoa e o o atu ai sui o le faletupe a Hawaii e feiloa’i ma le maota, ma se’i fa’ailoa sa’o atu le tulaga o le latou tautua i le atunu’u, ae afea tonu le aso lea ua latou fuafua e malaga ese ai ma Amerika Samoa, ae pe mafai fo’i ona latou toe nonofo tasi mai se’i tau fa’amautu muamua le faletupe fou lea ua galulue le malo e fa’atula’i.

Na fa’afetaia fo’i e Vui fuafuaga a le ali’i kovana ma le faigamalo e fa’atula’i le faletupe fou e pei ona fuafua i ai, ae sa ia taua fo’i i luma o le maota le tatau lea ona manino mai le tulaga o le tupe a le malo e $1 miliona lea o lo o i se faletupe i Vietnam, ina ne’i tula’i ese le faletupe a Hawai’i ae lei toe maua mai lea vaega tupe a le malo.

O se tasi o mataupu o lo o aofia i mataupu na fa’ailoa e Lolo i ta’ita’i o le Fono e mana’omia ona latou galulue fa’atasi e fa’amautu, o le toe aveeseina mai lea o le tupe a le malo e silia i le $1 miliona o lo o i totonu o se faletupe i Vietnam.

Na fa’afetaia e le Fofoga Fetalai ia Savali Talavou Ale finagalo fa’aalia o afioga i faipule e tusa ai o le mataupu i le faletupe a Hawai’i, atoa ai ma le lagolagoina o se taumafaiga a le kovana ma le faigamalo e fa’atula’i se faletupe fou, peita’i na saunoa Savali, e leai se ma’a e le i fulia e le malo i taumafaiga ina ia fa’atumauina pea le tautua a le faletupe a Hawai’i i le atunu’u, ae o le fa’aiuga ua taunu’u i ai, e tula’i ese lava le faletupe.

O le masina o Iuni 2015 na fa’ailoa e Savali i le maota, o le taimi lea ua fa’atulagaina e fa’amuta aloaia ai loa le tautua a le faletupe a Hawai’i i le teritori, o le taimi fo’i lea o lo o fuafua le faigamalo e tatau ona o o atu i ai ua fa’atula’i le faletupe fou lea o le a fa’aigoaina o le ‘American Samoa Territorial Bank’.

Ma ua fautuaina e Savali le komiti o le Tamaoaiga a le maota lea o lo o i lalo o le ta’ita’iga a le afioga i le ali’i faipule ia Larry Sanitoa, ina ia faia gaioiga uma e mafai ona fai ina ia fa’amautu ai tulaga o mataupu uma o lo o finagalo i ai afioga i faipule, e pei o le fa’amalamalamaina lea o ituaiga tautua e mafai e le faletupe fou lea ua faia mo le atunuu ma pisinisi, tulaga i le $1miliona o lo o teu i Vietnam, atoa ai ma le mau atugaluga i auala e mafai ai ona fesoasoani le faletupe fou lenei i le aufaipisinisi.

O le aso Lua o le vaiaso nei lea ua fa’atulaga e faia ai le iloiloga a le komiti o le Tamaoaiga, mo le talanoaina o le pili na talosagaina e le ali’i kovana, e fa’avae ai se faletupe fou mo Amerika Samoa.