Na siisii le si’ufofoga o le afioga i le tama’ita’i faipule ia Vui Florence Vaili Saulo, seia oo lava ina tutulu le tama’ita’i faipule, ao ia taumafai e fa’aleo ona lagona le fiafia i le Faatonusili o le Matagaluega o Galuega Lautele a le malo ma sui o lona Ofisa, e tusa ai o le latou molimau e fa’atatau i le teena lea e le FEMA o le talosaga mo le fausia o se auala e foia ai le fa’afitauli o loo fetaia’i ma se vaega o le Itumalo o Tualauta i le lolovaia lea o le auala ma faaleagaina ai maota o aiga pe a oo ina leaga le tau.

Ina ua fesiligia e Vui le tama’ita’i fa’atonusili o le matagaluega ia Faleosina Voigt mo se ripoti e fa’atatau i le mafua’aga ua tuai ai ona fa’ataunu’u le fausiaina o le auala i totonu Tualauta, aemaise ai o se taumafaiga ina ia foia le toe a’afia o aiga i lologa pe a tetele tafega ma timuga, ae na saunoa Voigt, ua mafua ona tuai le galuega, ona ua teena e le vaega a le FEMA le talosaga sa tu’uina atu e le latou ofisa.

Na fa’amanino e le tama’ita’i fa’atonusili i lana molimau e fa’apea, e ui o lea ua teena e le FEMA le talosaga, peita’i o loo i ai le avanoa o loo tuuina mai, e mafai ai e le latou Ofisa ona tu’u atu ni fa’amaoniga mo mea sa fa’aleagaina i lologa ma tafega i le tele o tausaga, ma ia ova atu i le $10 miliona le tau aofa’i o mea totino uma ua fa’aeagaina.

Saunoa atili le tama’ita’i fa’atonusili e fa’apea, o faamaumauga aoga ia ma le taua o loo mana’omia e le FEMA, e fesoasoani ai i le fa’atinoina loa o le galuega, ina ia mafai ai ona fa’amaonia atu, le tele o mea totino a aiga sa faaleagaina.

Na faailoa e le tama’ita’i fa’atonusili ia Vui, talu ai e le o i ai ni a latou faamaumauga o mea uma sa fa’aleagaina, o le mafua’aga lea ua latou talosagaina ai le itumalo, pe afai o i ai se tasi o loo i ai ni ana faamaumauga mo mea sa faaleagaina, pe mafai ona tuuina atu i le latou ofisa e fesoasoani ai i le latou ripoti.

Na fesili Vui ia Voigt poo fea le tele o fa’amaumauga e pei o ata sa tapu’e i taimi e lolovaia ai le itumalo, sa masani ona ia lafo atu i lana imeli.

“E faafefea la ona e fai mai e leai ni tou faamaumauga ao lea ua tele faamaumauga sa masani ona ou lafo atu i le tou ofisa e aofia ai ma ata o mea fa’aleagaina,” o le fesili lea a Vui ma lona su’i fofoga ua amata ona siisii i luga.

Ae na toe faamanino atili e le sui faatonusili lagolago o le Ofisa o Galuega Lautele a le malo sa i ai i le iloiloga, o faamaumauga ia e mana’omia mai e le FEMA, o faamaumauga e fa’ailoa atu ai mea totino sa faaleagaina i taimi o tafega ma lologa, ma ia oo atu i le $10 miliona le tau aofa’i o mea sa fa’aleagaina, ona fa’atoa mafai ai loa lea ona vaavaai le FEMA i le fa’atinoina o le galuega.

“Aisea ua faapea ai ona fai galuega a le itumalo, ae le o faapea lava ona faatino isi galuega i totonu o Amerika Samoa,” o le fesili lea a Vui ia Voigt ma sui o lona ofisa, ae na toe tali mai Voigt ma lona si’ufofoga maualalo, “o aiaiga lava mai le vaega o loo aumai ai le tupe e fa’atupe ai le galuega, i auala e mafai ai ona fa’amatu’u mai le vaega tupe mo Amerika Samoa ma ana galuega.”

Saunoa atili le tama’ita’i faipule e fa’apea, e le na o ia le faipule ua finauina lenei mataupu mo le itumalo, sa finauina fo’i e isi sa latou nofoia le nofoa e aofia ai lona soatau ia Larry Sanitoa o loo la pale mai i le nofoa i le taimi nei.

“Faleosina ma la outou matagaluega, fa’amolemole, fai se auala e foia ai le faaletonu o loo pagatia ai lo’u itumalo, e foliga mai e le o taua ia te outou le itumalo lenei, a ia outou silafia, o tagata ola fo’i o loo nonofo i totonu o le itumalo, ua lava ia na alofaga e fai mai ai, ua fai soo fo’i, ou te ofo, fa’amolemole atu, fai sa outou fa’aiuga faanatinati i le mataupu lenei, o loo mafatia le itumalo,” o le saunoaga lea a Vui.

O ni isi o faipule sa latou fesiligia ni isi o tulaga o galuega ua leva ona fuafua le matagaluega e fausia, peita’i e oo mai lava i le taimi nei e le o faia lava i ai se gaioiga.

Na fesili le sui fofoga fetalai ia Fetui Fetu Jr i le tama’ita’i fa’atonusili, pe ua i ai se fuafuaga e fa’aleleia auala sa fa’aleagaina i Manu’a i taimi o lologa na se’i mavae atu nei.

Na taua e le ali’i faipule mai Manu’a e faapea, o le fa’afitauli e pei ona fa’aletonu ai auala i Manu’a, na mafua mai i le auvai o loo tafe mai ai le suavai pe a tetele tafega ma fa’aleagaina ai le auala, ae na tali sui o le matagaluega, ua mae’a ona foia le fa’afitauli i auala i Manu’a, e ala i le fa’aleleia muamua o le auvai na tula’i mai ai le fa’aletonu.

Saunoa Fetui Jr e fa’apea, afai ae fa’aletonu auala e fegasoloa’i ai le atunu’u i Tutuila ma Manu’a, e le mapu lava le fa’asea o le atunu’u.