Na fa’afetaia e le Failautusi Aoao o le Komiti Faafoe o Taaloga o le Olimipeka i Amerika Samoa (ASNOC) ia Bill Young ta’ita’i, uo ma aiga, faapea ai pisinisi uma i totonu o Amerika Samoa, e tusa ai o lo latou lagolagoina o le fa’amoemoe a le au ta’aalo a le atunu’u, lea ua sauni atu nei mo ta’aloga a le Pasefika i Papua Niu Kini i le masina fou o Iulai.

“E fai a’u ma sui o le Peresetene o le ASNOC ia Victor Langkilde, ou te momoli atu ai le agaga fa’afetai ma le fa’amalo Amerika Samoa i lou alofa tula’i, ina ua e le fa’atafa i soo se manaoga sa matou faatalauula atu ai, ae ua outou sapaia ma le agaga alofa le talosaga atu a au tama fanau,” o le saunoaga lea a Young i le taimi o le sauniga lotu fa’amavae sa faia i le Fatuoaiga i le aso Lulu na te’a nei, e fa’amavae atu ai i au ta’aalo uma a le atunu’u o le a malaga atu i Papua.

Na taua e Young e faapea, o le lagolagosua ma fesoasoani sa mafai ona tuuina atu e le atunu’u, atoa ai uo ma aiga ma pisinisi, ua mafai ai ona fa’atino le fa’amoemoe o au ta’aalo mo Ta’aloga a le Pasefika.

Sa ia fa’ailoa i le Samoa News e fa’apea, e i ai isi pisinisi ma kamupani tua sa latou foa’i atu ni fesoasoani tupe mo le au ta’aalo.

Saunoa le ali’i Failautusi e fa’apea, o talosaga a le atunu’u atoa ai ma fa’amanuiaga a ta’ita’i ma matua, o le a manuia ai le alo faiva atu a ana tama fanau e tausinio i ta’aloga a le Pasefika i Papua.

Na fa’atumulia le malumalu o le Ekalesia Katoliko i Fatuoaiga i le toatele o matua, uo ma aiga o au taaalo ua faamoemoe e fai ma sui o Amerika Samoa i ta’aloga a le Pasefika, lea sa lolofi atu e fia tuu atu lo latou tauau e lagolago ai le sauniga faamanuia mo i latou ao le’i tu’u va’a ese atu ma le atunu’u.

Na taua e se tasi o tama e leai se isi o lona aiga o i ai i le au ta’aalo, ae na malaga atu e fia auai i le sauniga lotu, “E le tatau i le atunu’u ma le malo ona manatu mama i sauniga taua fa’apenei, e le o malaga fanau e tafafao pe saili manuia mo i latou lava, o loo malaga e fai ma ave fu’a a Amerika Samoa.”

Na taua e le tama lona fa’anoanoa tele ina ua le paau atu le ali’i kovana e saunoa i le saunoaga autu o le sauniga, e pei ona tusia ai lona suafa i luga o le polokalame, e le gata i lea, sa taua fo’i e lea tama lona fa’anoanoa ina ua ua fa’atoa malaga atu lava isi sui o le malo i nai toe minute o loo totoe o le sauniga lotu.

Mo ni isi o matua o loo malaga o latou alo i Papua, sa latou taua le lagona fiafia ina ua mafai ona filifilia i latou nei e avea ma ave fu’a a le atunu’u i taaloga tetele a le Pasefika.

Na fa’aalia e ni isi o faiaoga o au ta’aalo i le Samoa News lo latou sauni e tausinio i ta’aloga a le Pasefika, ma ua i ai fo’i o latou talitonuga ua lava tapena a latou au mo lenei fa’amoemoe.

“Ua sauni le susuga a George Tanoa Jr e fusu i Papua, e le gata ua malosi lona tino ae faapena fo’i lona mafaufau, ua tele taimi o ma koleni ma galulue fa’atasi, ma ua ou mautinoa fo’i e tele le avanoa e manuia ai lana taumafaiga i Papua,” o le saunoaga lea a le afioga a Toleafoa Henry Tavake, le faiaoga a le ali’i fusu o Tanoa Jr, lea ua sauni e fusu i le aupaga o le middleweight, o le ulua’i taimi fo’i lea ua malaga atu o ia i ni ta’aloga faavaomalo faapenei a le Pasefika.

Mo le au basketball i le vaega o ali’i ma tama’ita’i, na taua e a latou faiaoga i le Samoa News le sauni uma o au e lua mo ta’aloga i Papua.

“Ua lava tapena le tatou ‘au mo Papua, o lea ua taunuu mai ni isi o sui o le ‘au mai fafo, ma ua lava fo’i le taimi ua latou koleni fa’atasi ai, e i ai le talitonuga o le a manuia le latou taumafaiga i le masina fou i Papua,” o le saunoaga lea a Samoa Samoa, le faiaoga autu mo le au basketball a le vaega o ali’i.

Mo le au siisii a le atunu’u, na taua ai e le Peresetene o le Asosi Siisii Uamea Mamafa, le afioga i le alii Fa’amasino ia Toetagata Albert Mailo le lava tapena o ali’i ma tama’ita’i ua fai ma sui o Amerika Samoa ma e maualuga lona talitonuga o le a manuia le latou taumafaiga.

“Ua sauni ali’i ma tamaitai siisii o le a fai ma sui o le atunuu, ua latou masani i taaloga faavaomalo faapenei, ma e maualuga lo’u talitonuga ua lava tapena i latou mo ta’aloga i Papua,” o le saunoaga lea a Toetagata.

Saunoa atili le susuga a Young i le Samoa News e fa’apea, o le aso Sa ma le aso Gafua o le vaiaso fou ua fa’amoemoe e malaga ai ulua’i vaega e lua o le au malaga.

“O isi vaega o le au malaga faatoa malaga atu i le amataga o le masina fou o Iulai, fuafua atu lava i taimi e amata ai a latou taaloga,” o le saunoaga lea a Young.