Ads by Google Ads by Google

To’a 30 ua malaga mo a’oa’oga ma galuega i Guam

O le po anapo na tu’ua ai e le ulua’i vaega o tagata faigaluega e to’a 30, ia le teritori mo Guam, e auai i se tasi o vaega o polokalama o lo o fa’atupe e le feterale, mo le fa’amoemoe e a’o’oga ma galulue i le fausaga o se nofoaga tutotonu mo le Militeli i Guam.

O le polokalama o le ASNEG (American Samoa National Emergency Grant), lea sa amata fa’asoasoa mai mo le atunuu ina ua amata galuega mo le toe fa’aleleia o tulaga sa fa’aleagaina i le galulolo ia Setema 2009.

I se sauniga lotu pu’upu’u na fa’ataunu’u i le nofoaga autu o le Matagaluega o Fa’ato’aga i Tafuna i le taeao ananafi, na fa’amavae atu ai ta’ita’i o le malo i alii ma tamaitai e to’a 30 ua lautogia mo lenei fa’amoemoe.

O lea sauniga lotu sa aofia ai le afioga i le Loia Sili e fai ma sui o le malo, le faatonusili o le Matagaluega o Tagata Faigaluega, o sui o le polokalama o le ASNEG, atoa ai ma sui mai le teritori o Guam.

O upu o le fa’amalosi ma lapata’iga na momoli atu e taitai o le atunu’u ia i latou ua malaga atu, ina ia manatua le igoa ta’uleleia o Amerika Samoa, i so’o se taimi, ma ia fa’amuamua le Atua i so’o se galuega latou te faia.

Na lapata’ia i latou ina ia tausisi i tulafono ma ta’iala o le a fa’atonuina ai i latou i polokalama o le a auai, ma ia taumafai e usita’ia tulaga uma mo le manuia o le latou aumau ai i Guam.

I lana saunoaga, e avea ai ma sui o le malo, na momoli e le afioga Fepulea’i A. Ripley, le agaga fa’afetai i le teritori o Guam, ona o le avanoa ua mafai ai ona malaga atu ni sui mai Amerika Samoa, e galulue ma a’o’oga i totonu o le latou teritori.

Sa ia ta’ua, o avanoa fa’apenei e le maua gofie, peitai ua mafai ona maua ona o le fesoasoani mai o le malo tele, o le malo o Amerika Samoa atoa ai ma le teritori o Guam.

Na fa’aiu lana saunoaga i upu fa’amalosi ma fa’ala’eia’u ia i latou o le a malaga, ina ia galulue finau ma punoua’i mo se manuia o latou aiga.

Na ta’ua e nisi o i latou ua malaga, le fa’afiafiaina o latou loto ina ua maua le avanoa e fa’atasi atu ai i lenei polokalama.

“O se avanoa lelei mo a’u ou te malaga ai e faigaluega i Guam ma lafo mai tupe e fesoasoani ai i si o’u aiga, e le gata o se taimi muamua lea ua ou malaga atu ai i Guam, ae o se taimi muamua lea ua ou tuua ai si o’u toalua ma la’u fanau e toa 2,” o le saunoaga lea a le alii o Faafetai.

Ae na taua e le alii o Elia Nanai, “Ua ou fiafia ina ua ou maua lenei avanoa, o le a ou faigaluega aii Guam ma fesoasoani mai i le aiga i Amerika Samoa nei, ou te iloa o le a faigata le motusia o mafutaga ma matua, peitai o lenei avanoa o se faamanuiaga mo au,” o le saunoaga lea a Elia.

Sa ia fa’afetaia malo e lua ma ona ta’ita’i, ona o le avanoa ua mafai ona maua e tagata faigaluega e aofia ai ma ia, e malaga atu ai e galulue i nei galuega.

Mai le toa 30 ua malaga atu i Guam, o le toa 5 o i latou o tamaitai, ma o se tasi o tamaitai na fesiligia e le Samoa News sa ia taua lona agaga fiafia ina ua mafai ona maua le avanoa e malaga atu ai i Guam.

Na taua e Carol Upulasi, o le galue i nofoaga ese o se avanoa lelei lea mo ia e mafai ai ona aoaoina nisi o mea fou mo le lumanai o lona olaga.

Na taua e le Faatonusili o Tagata Faigaluega a le malo ia Evelyn Vaitautolu Langford i le Samoa News e faapea, o i latou ua malaga atu i Guam o le a auai ini aoaoga e 3 masina le umi mo le faalauteleina o tomai ma agavaa i ituaiga galuega o le a galulue ai i Guam.

Saunoa Evelyn e faapea, o le polokalama lenei i a’oa’oga na amata atu i Amerika Samoa nei ma le faamoemoe o le a faamaea i Guam, ina ia mafai ai ona maua e i latou ua malaga atu nei aoaoga tonu ma talafeagai mo galuega e pei ona manaomia ai i latou i Guam.