Ua fa’aalia e le Komesina o Leoleo ia William E. Haleck le fa’anoanoa tele o le tulaga sa i ai le fa’aiuga o le suega mo i latou e fia avea ma Leoleo na fa’atoa mae’a atu nei, ina ua mae’a ane le suega e na o le to’a 7 na pasi mai le lata i le to’a 300 na su’e.

Ae na taua e ni isi o sui o le Matagaluega o Leoleo le mataga tele o le fa’aiuga na o o i ai lenei suega, lea na fa’atautaia i le masina na te’a nei i le Fale Laumei i Utulei.

O le masina lenei na faatulaga e le Matagaluega e tatau ona amata ai le vasega mo leoleo fou e to’a 20, talu mai le vasega mulimuli lea na faia i le tolu tausaga talu ai.

Na taua e Haleck i le Samoa News e fa’apea, sa i ai lona manatu maualuga e ono o o atu i le 50 ni isi e pasia le suega, ae o se tulaga na fa’ateia tele ai o ia ina ua mae’a ane le suega e na o le 2% na pasi mai le aofa’i o tagata na su’e.

O se tasi o itu e faanoanoa tele ai le faaiuga o le suega e pei ona saunoa Haleck, e le iloa le mafua’aga ua na o le to’a 7 ai i latou na pasi ae o le faigofie ia o le suega, o isi fo’i fesili e te filifili mai i le tali o le ‘sa’o’ po o le ‘sese’ mai mataupu o le Numera ma le Gagana Peretania.

Na taua fo’i e le alii komesina e fa’apea, na te le tuuaia se isi i le faaiuga na o o i ai le suega, e ui e le o le faaiuga lea sa ia mafaufau i ai, ae na taua e le tofa Fuega Saite Moliga, o le  lagolago mo le Komesina o Leoleo, o i latou uma e lei pasi i le suega na faatoa maea atu nei, e le mafai ona toe su’e i le isi suega lea ua fuafua mo se taimi o i luma.

O le aso 22 Iulai lea ua fa’atulaga mo le isi suega, ae faapitoa lava mo i latou sa faatumu igoa mo le suega muamua ae le i mafai ona auai, ona sa malaga i fafo, e aofia ai ma sui o le Ami Fa’aleoleo ia na malaga i fafo mo a latou aoga.

O le vaiaso fou lea ua fa’amoemoe le komesina e tatau ona toe faasalalau ai le isi suiga mo ni isi tagata fou e fia avea ma leoleo, ae afai e mae’a ane le suega lea ae tutusa lava fo’i ma le fa’aiuga o le suega ua mae’a nei, o le a faia loa le faaiuga ina ia toe amata mai i le amataga gaioiga a le matagaluega mo le sailia o ni isi e fa’atumuina avanoa leoleo o lo o manaomia.

Na taua e Haleck e fa’apea, o lo o latou galulue soosoo tauau pea ma le afioga i le alii kovana ia Lolo Matalasi Moliga i le tau sailia o ni isi leoleo fou, e fesoasoani i le manaoga o lo o tula’i mai i totonu o le matagaluega, o le manaomia lea o ni isi leoleo fa’aopoopo.

Na taua fo’i e Haleck e fa’apea, o le tagata pito maualuga togi na maua i le suega e 76%. Sa ia taua fo’i e fa’apea, o togi sa faavae i ai le filifilia o i latou na pasi i le suega, o lo o amata mai i le 70% e aga’i i luga, e ui o le to’atele sa ausia togi i le va o le 40% ma le 60%.

fa’aliliu Ausage Fausia