E to’afa ni ali’i fai faiva o le atunu’u o lo o tau sailia e le Vaega a Leoleo fa’apea ai sui o le U.S Coast Guard, ina ua ripotia mai le leiloa o le va’a fagota sa latou malaga ai talu mai le vaiaso na te’a nei, i se vaega e latalata i motu o Manu’a.

Na faamaonia mai e le Komesina o Leoleo ia William E. Haleck le faia o sailiiliga a le latou vaega o le Marine Patrol Division atoa ai ma le fesoasoani mai a le U.S Coast Guard, i le tau sailia lea o ali’i fai faiva o lo o leiloloa.

Na faamaonia mai e le alii komesina le mae’a lea ona tu’uina atu o se talosaga i le malo o Samoa, mo le fa’aaogaina o se tasi o a latou va’a e fesoasoani ai i le tau sailiina o ali’i fai faiva.

E ese mai i le vaega a le Marine Patrol Division lea o lo o galulue i ogasami mo le tau sailia o alii fai faiva, o lo o mafai fo’i ona fesoasoani atu le U.S Coast Guard i le mae’a ai lea ona latou talosagaina o se fesoasoani mo lenei galuega, e pei ona faamaonia mai e le alii komesina i le Samoa News.

Talu mai lava le aso Lulu na te’a nei ina ua tuua e alii fai faiva le atunuu, o lo o galulue pea leoleo ma le U.S Coast Guard i le mea sili latou te mafaia, ina ia mautinoa e toe maua i latou o lo o leiloloa.

Na taua e Fuega Moliga i le Samoa News e fa’apea, na fa’aaoga e ali’i e to’afa se va’a alia e o ai e fagogota, e le o tele fo’i ni fa’amatalaga mai le alii pule o le alia e faailoa mai ai po o ai nei alii o lo o malaga i le va’a.

Na taua e le taitai o le US Coast Guard ia Lt. Vignette Kaltsas i le Samoa News, o lo o fesoasoani sui o le latou vaega i le ofisa o leoleo mo le tau sailia o alii fai faiva o lo o leiloloa.

Sa ia taua foi e faapea, o ni sui se toalua o le latou vaega sa malaga mai mo le faia o ni aoaoga i le teritori nei, o lo o fesoasoani i sui o le Marine Patrol mo le tau sailia o alii fai faiva.

Na fesiligia ia Lt. Kaltsas pe ono valaau se fesoasoani mai le latou va’a o le USCG C-130, na tali le ta’ita’i e leai.

fa’aliliu: Ausage Fausia