Ads by Google Ads by Google

To’atolu tu’uaia mataupu na gaoia ai meatotino tagata malaga mai fafo

E to’atolu i latou ua tu’uaia e le malo i le fa’alavelave lea na osofa’i ai e ni tagata potu o le faletalimalo a le Sadies by the Sea i Utulei, lea sa nonofo ai malo mai fafo i le masina o Ianuari 2015, ae ave fa’agaoi le tele o meatotino taua sa i ai e aofia ai ma  se vaega tupe tele.

 

O i latou e to’atolu ua tuu’aia i lenei mataupu e aofia ai ali’i e to’alua ia Tavita Iakopo ma Joe Pitolua, lea o loo tu’uaia i moliaga mamafa e lua o le talepe fale i le tulaga muamua ma le gaoi, faapea ai ma se tama’ita’i e 21 tausaga le matua, o ia lea o Mina Pitolua, o loo tu’uaia i le moliaga mamafa e tasi o lona taliaina lea o ni oloa sa ave fa’agaoi e ni isi tagata ma tu’u atu ia te ia.

 

O le taeao o le aso 23 Ianuari 215 na maua ai e le Ofisa o Leoleo se telefoni mai le Pulega o le Sadie by the Sea e tusa ai o potu o loo nonofo ai se tasi o a latou malo mai fafo na osofa’i e ni tagata i le po.

 

Na fa’ailoa e le ali’i sa nofo i se potu a le Sadie by the Sea i leoleo e fa’apea, ao moe i le po o le aso 22 Ianuari, sa ia faalogoina se pao i totonu o lona potu, peita’i e le’i ala i luga e vaai ona sa matua lagona lona vaivai, ae ina ua malama le taeao na sosoo ai, na ia iloa ai ua leai lana ato sa i luga o le nofoa, e oo foi i le faitoto’a o le potu e foliga mai sa tatala faamalosi e se tagata ae ulufale atu i totonu.

 

O meatotino na taua e le alii lea sa i totonu o lana ato e aofia ai lana laptop le ituaiga o le Mac Book Air e $2,000 le tau; Apple iPad e $600; credit card; uati e $8,000 lona tau; Small Walh Bulgari e $800 le ta’u; pepa ma fa’amaumauga mo ta’aloga soka, aemaisea i le tino i tupe e $1,600, lea e fefiloi ai tupe Amerika faapea ai tupe Europa.

 

I le aoauli o le aso 29 Ianuari,  na faila ai fo’i e le isi malo mai fafo sa nofo i le i si potu o le Sadies sana tagi i le ofisa o leoleo, i lona potu na osofa’i e tagata ae ave fa’agaoi ana meatotino sa i totonu.

 

Na taua e le ali’i lea i leoleo lona vaaia o se ali’i pe a ma le 20 tausaga le matua i totonu o lona potu, o lea na ia fai i ai, e sese le potu o loo i ai, ma fa’ai’u loa i lona tuliina o ia i fafo.

 

O ni molimau sa fesiligia e leoleo e uiga i lenei mataupu, na mafua ai ona fesootai leoleo i le ali’i o Iakopo, ma mafai ai loa ona fa’amatala atoa e Iakopo le la gaioiga ma le ali’i o Pitolua i le osofaiga lea o potu e lua o le Sadie by the Sea e pei ona taua.

 

Na taua e le ali’i o Pitolau i leoleo, ina ua leai se isi na tali mai i totonu o le tasi o ptu na muamua loa ulufale Iakopo i totonu ma ia mulimuli atu ai loa fo’i ma ia, ma la ave fa’agaoi ai meatotino e pei ona taua sa aveesea.

 

Na fa’ailoa e Pitolau i leoleo, sa ia ave le laptop, ma le tele o isi mea sa gaoi, faatasi ai ma le tupe e $500, ae sa ia tuu ia Iakopo le $300, ae ina ua fesiligia e leoleo le tama’ita’i o Mina Pitolau, sa ia faamaonia ai le tu’u atu e lona tuagane o ni isi o mea sa ia aumaia fa’agaoi mai le faletalimalo, e aofia ai ma le tino i tupe e 500 pauni Peretania ma le US$60, ona alu lea i le Western Union ma fa’aliliu ai le pauni Peretania i le tupe Amerika.

 

Ina ua fesiligia atili e leoleo ia Mina, sa ia ioeina ai lona iloa lelei o oloa ma le tupe sa tuu atu e lona tuagane ia te ia, o mea gaoi, ae sa ia taliaina lava.

 

O loo taofia pea i latou nei i le toese i Tafuna e fa’atalitali ai le isi a latou iloiloga lea ua fa’atulaga e faia i le masina o Oketopa, ina ua le mafai ona latou totogiina le tupe ua mae’a ona fa’atulaga e tatala ai i latou i tua.