E afua mai ia Aperila 24 se’ia o’o ia Aperila 28, 2012 na fa’atautaia ai e le Vasega o A’oa’oga Fa’atausima’i a le Kolisi Tu’ufa’atasi a latou fa’aa’oa’oga ina ia mafai ona fa’amautu atili a’oa’oga ua mae’a a’otauina ai le fanau o lo ’o tau’avea nei mata'upu i totonu o potu a’oga.

“O se mea e tatau lava ona i ai le so’otaga o a’oa’oga i potu a’oga ma le tautuaina o le mamalu lautele o le atunu’u pe a fa’atino e le fanau a’oga nei, o latou tiute!” O se tala lea a le tama’ita’i fa’auluulu i ai a’oa’oga fa’atausima’i i le Kolisi, Lele Ah Mu.

O nei aso e fa, e 'ese'ese fo’i vaega o le atunu’u sa fa’atutuina ai latou laulau ma fa’asalalauga tima’i mo le lautele, ina ia fa’autagia e i latou le tausia lelei o lo latou soifua maloloina i aso faiso’o. O vaega e fa sa tautuaina ai e le fanau le mamalu lautele o le atunu’u sa fa’atulaga ai le “Ulaula Tapa’a e le aoga ae afaina ai lou Soifua Maloloina i gasegase e fa’apogai mai ai! O le tulaga o le tausia lelei o lou tino ina ia e le a’afia mai le Ma’i Suka. O le tausia lelei o lou tagata ina ia e le maua i le Toto Maualuga, ma le lona fa, o le tausia ma va’ai lelei au mea tausami ina ia le maua oe i le ogaoga tele o le Ma’i Gugu.”

I le taimi sa latou tautuaina ai le atunu’u, sa latou fuaina lou toto po ’o le a tonu se maualuga o i ai, fuaina fo’i lou suka, fa’atasi ai ma le a’oa’oina lelei o oe, i gasegase e maua mai le Ulaula tapa’a, fa’atasi ai ma foliga o le ma’i gugu ma ona mafua'aga e ala ai ona fa’atetele, pe afai e le tu’ua lou tausami i nei taumafa.

O isi mea ua matauina, e fa'atalatalanoa atu e le mamalu lautele o latou a’afiaga i o latou gasegase i le fanau a’oga lea ua fa’ata’ita’i tiute mo le lautele, o se mea lea ua mafai ai e le fanau, ona fa’amatala a’afiaga, o afuaga o ia ma’i, atoa ai ma mea’ai e ao ina taumafa ai, ma le fa’amalositino e tatau lava ona faia, ina ia paleni ai pea le soifua maloloina o le tagata i taimi uma, nai lo le fa’amoemoe atu e togafitia i vaila’au ua mae’a fa’atulaga mai e foma’i.

O le isi lava mea lelei ua mafai ona maua e le fanau, o le so’otaga lea ma tagata lautele o lo ’o latou tautuaina, fautuaina ma latou tima’ia ina ia tausia lo latou soifua maloloina lelei. O taumafa e masani ona fiafia i ai le mamalu lautele, o le afuaga lava lea o ma’i e tele ua faigata ona tineia mai o latou tino. O lona uiga, ia taumafai tagata uma ia le toe so’ona taumafa ai i taimi uma, ae ia vava ona fa’aaogaina ma ia mautinoa e faia le fa’amalositino e tatau ona fa’aalu ai le afu ma le taofiofia ai e o latou tino ni afuaga o ma’i.

O le ma’i suka, ua mautinoa o le to’atele lava lea o tagata Amerika Samoa ua a’afia ai ma ua maualuga fo’i le tulaga o Amerika Samoa pe a fa’atusatusa i isi malo, ua maualuga tele le aofa’iga o tagata o lo tatou malo ua a’afia i le ma’i suka.

O le polokalama fa’amasani lea mo le fanau a’oga i a’oa’oga fa’atausima’i, o se mea ua mae’a fa’atautaia e tusa o aiaiga o a’oa’oga i totonu o le Kolisi. Ia masani ai le fanau i o latou tiute, atoa ai ma le tautuaina o tagata lautele, ia pasi e i latou a’oa’oga tau le tomai fa’apitoa, ae ua maua fo’i ma le sosia o le masani e tautua tagata ma fa’atino tiute ma le to’a ona ua lava le agava’a ia i latou.

Na fa’atutuina mai a latou laulau i le EOB i Utulei, po ’o le Maota o le Malo i le aso Lua, ona fa’asolo ai lea i le Maketi i Fagatogo i le aso Lulu, Laufou Shopping Center i le aso Tofi ae fa’ai’u i lo latou falea’oga i le Kolisi Tu’ufa’atasi i le aso Faraile ma fa’ai’u ai la latou polokalama matagofie.

O lona uiga, mai lea faiga sa fa’atautaia ai le tautua, ua maua le to’atele lava o tagata e i latou. O nofoaga sili ona tumutumu lea ua fa’atutuina ai latou laulau ma faia ai le 'au'aunaga. O lo ’o i ai fo’i latou fa’amaumauga ma ua iloga ai le u’umi o latou lisi o suafa o i latou ua mae’a faitauina e i latou o latou toto, ma’i suka, fautuaina fo’i latou ma’i gugu ma fa’amatala au'ili'ili ia i latou ala e maua ai i lea gasegase, ae maise o ala e mafai ai ona fa’aititia e aunoa ma se inumia o ni vaila’au pe va’aia se foma’i.

O le Ulaula Tapa’a, ua pei lava o se fa’ama’i, ae mafua ona faia e se tasi, ona o le manatu e fia siou atu ua e ulaula, ae tele mea e fa’aleagaina ai o lou tino ma lou soifua laulelei pe afai o le a e faia pea le Ulaula.

Ua matua leai lava se mea e te maua ai, ae o le mana’o lava ua le mafai ona fuafua tatau. Ua le sagatonu fo’i le fa’autaga, ua le faia se mea e te lelei ai, ae ua faia se aga e te ma’i ai ma e le togafitia fo’i gasegase tuga tau le kanesa e te ono ma’i ai mulimuli pe a e faia pea lea tulaga.

O le malosi o taumafaiga a le Malo ina ia taofiofi mai le maua o tagata i gasegase leaga tele ona o le ulaula, ua tatou iloa patino ai tulafono ua mae’a fa’amalosia nei e taofia ai le ulaula tapa’a i nofoaga faitele e aofia ai fale fa’atalipasi, luga o pasi, nofoaga o matamataga i ta’aloga, totonu o fale fa’afiafia, totonu o le falema’i atoa, totonu o lotoa o a’oga ma isi mea fa’apena.

O nei mea uma, ua matua iloga le tomai o nei fanau ua a’otauina e avea ma tausima’i i lo latou soifua 'au'auna i le atunu’u, aua ua latou tima’ia ai le mamalu sa gasolo atu e fua o latou toto, va’ai o latou suka ma gasegase tumau o i ai.

Mai lea a'oa'oga fa’ata’ita’i a le fanau a’oga, ua maua ai fo’i o latou maka lelei, mo latou fa’ailoga i le fa’atausima’i pe a o’o ina pasia e i latou a’oa’oga maualuluga mai la tatou Kolisi Tu’ufa’atasi.