Ads by Google Ads by Google

Alofa: Fa'avae ai Aiga— Vaega 123

Na iloa e le lo’omatua i lea taimi, o se tama ua sili ona manaia i le va’ai, o ona foliga e fia va’ai ai pea ma saga fia va’ai ai pea i aso uma o le olaga.  Ua tau mafaufau le lo’omatua i lea taimi, po ’o se lau tufaso, po ’o se lau salako, na fa’ainu ai e Minalosa le tama ua valea ai le ulu ia te ia. Ua ‘ata le lo’omatua ma tilotilo ane i a Minalosa ma lona to’alua, e ‘ese lava foliga 'aulelei o Mikaele ‘ese foliga tua o Minalosa, “Mikaele, e a, e tele ni isi tama fa’apei o oe o totoe i le Motu o Fiafiaga?” 

Ua ‘ata Mikaele, ma fa’apea ane i a Tagiilima, “Fa’amalie atu ia te oe le lo’omatua, e leai ni isi o totoe, na o a’u lava, ia a’o lea ua maua muamua a’u e si ou tei.” Ua na o le ata o Minalosa ma tilotilo ane i si ona to’alua i lea taimi. Na fa’apea ane nei i le tuafafine o lona tama, “E le uma lava ou uiga na, e fa’amaasiasi mai lava le tagata o pupula atu mata.” Ua talie nei le lo’omatua ma le afafine o lona tuagane i lea taimi, ua u’ulima ma savalivali e aga’i atu i le isi itu lea ua o’o atu i ai le fa’a'ulaga o Loimataoapa'ula.

Na va’aia e tagata le mananaia o 'ula lole lea o lo’o fa’aula ai nei e le aiga o Tagiilima i a Loimataoapa'ula. O 'ula lole na o atu ma Minalosa ma lona to’alua mai Tutuila. O le 'ula fagu, na a’apa ane nei Minalosa ma fa’a'ula ai Lameko, e fou i le va’ai a le toeaina lea ituaiga 'ula. Na liliu ane nei Lameko ma momoli lana fa’afetai i a Minalosa, ma toe fa’apea ane, “Oe, e maua i Tutula ituaiga ‘ula nei, ta’i manaia, ia ua maua fo’i le 'ula a le toeaina e fa’a'aulelei atili ai, aua a 'auleaga le tagata, ia teuteu ia fa’a'aulelei.” Ua ‘ata Minalosa ma fa’apea ane i a Lameko, “Lameko, a’o ai o fai atu i te oe e te 'auleaga, e matua’i selau pasene lava oe i le va’ai.” Na toe a’apa nei Minalosa i totonu o le tagapepa ma 'aumai i fafo le 'ula tupe, o tala Amelika o lo ’o fai ai ma ua fa’a'ula ai nei Loimata.

Na fa’ate'ia Minalosa ina ua fa’apea ane le tuafafine o lona tama, “Minalosa, o le 'ula tonu lava lea na e sau ia te a’u.” Ua lulu le ulu o Minalosa ma fa’apea ane i le tuafafine o lona tama, “O le a avatu la ia te oe le 'ula, e te le o fa’au’u, o le 'ula a le tenei na ou sau ma a’u mai Tutuila, le Motu o Fiafiaga.” E fai lava tala a le lo’omatua ma savali atu i le itu o lo ’o i ai nei Loimata ma Minalosa.

“O a’u e ‘ese lo’u alofa i le Peresitene o Amelika, e pele i a te a’u le toeaina, e alofa fo’i i a te a’u si toeaina, 'aumai loa se i fai ai le ma fa’amau ma Peresitene Kiligikoge.” Ua alu nei le tali e, a lona aiga i lea taimi, ua ‘ata Loimata ma toe 'ave’ese mai le 'ula ua i lona ua, ma fa’a'ula ai lona tina.

A’o le i alu ane le malaga a le aiga o Tagiilima e aga’i atu i Apia mo le fa’au’uga o Loimataoapa'ula, na fai le fa’atonuga a Lolesio ina ia fasi le povi, ma fasi pua’a e tolu, pu’e ane moa Samoa ma fai se umu tele, ina ia fa’avela ai mea uma ia, aua lo latou malaga atu i Apia. Ua fa’atumulia le pasi, fa’atasi ai ma le ta’avale na fa’aaoga e Minalosa ma lona to’alua.

Ua tau meia le tamaloa o Mikaele i le tulaga lea ua va’ai atu ai nei, ua tumu atoa le pasi, fai o tagata ae toe alu atu i ai le povi, ua fafao atu i ai ma pua’a e tolu ma ato o lo ’o i ai totonu moa Samoa ma le umu.  

O lana va’ai i lona o’o atu i le aiga o Minalosa, ua leai se ‘ese’esega ma lona aiga i Tutuila nei, ua maua mea uma. Ae se i vagana ai lana va’ai i le fanua lafu lemu, o le vaitafe e iloa lelei atu i le fale, o mea fafaga ma fa’ato'aga a le aiga ua iloa le tamaoaiga, ma le lima malosi o le aiga o lona to’alua. Na fa’apea ifo mafaufauga o Mikaele, “Oka oka e, ai o tupe uma nei o le pisinisi a si o’u tama lea ua fa’anunumi mai e Minalosa i lona aiga. Ua ‘ata Mikaele ma tilotilo ane i lona to’alua e pele i lona loto ma lona fa’amoemoe.

E faia pea!