Ads by Google Ads by Google

Alofa: Fa'avae ai Aiga

Ua leai se fia moe, ua leai fo’i se tulaga e ono fa’apea ai ua vaivai, ona ua le mapu tala ua fa’amatalatala nei. E le i fa’amatalaina e le lo’omatua o Silia le mea na o’o i ai lona ma’i, ae sa fa’atoa iloa e le teine ina ua malama a’e le taeao ma ua talatalanoa ma lona tama, a’o faia pea le malologa a lona tia. “Tama, e leai lava se tala na fai mai ia te a’u i lea itu, o lona uiga ua ta’u mai uma isi mea, ae le ta’uina mai le mea na tupu ia te ia. Tama, ua sui lava la’u va’ai i si o’u tina, e mo’i lava sa malosi, ae ua sui lava la’u va’ai, pe i ai se mea o tupu ai, ae le tautala mai le lo’omatua pe a.” Ua na o le punou nei o le toeaina ma inu lana ipu kofe.“Tagi, talu lava ona e alu ‘ese mai, ua fai lava ma ma’i lou tina. Ua ou le iloa po’o le a le tala o le fai i ai ina ia malie ai lona loto ma talia ai, o oe ua fai lou to’alua, e le toe pule ma’ua ia te oe. Ae e le mafai lava le loto o lou tina. Ua ou le iloa ai la po’o fea o le a fai i ai lenei mea.”Na iloa atu nei e Tagiilima le fa’anoanoa o lona tama, o lea na tu’u ifo loa i luga o le laulau le sipuni na sa’eu ai lana mea’ai i le taeao, ma savali atu loa ua fusi mai si ona tama. “Tama, va’ai oe, afai lava o le a le tulaga e i ai lo’u tina, ia e alofa ta’u vave mai ia te a’u fa’amolemole.”Na luelue ane nei i ai le ulu o le toeaina i lea taimi. “Tagi, e a le aiga o Lameko, e alolofa ia te oe?” O le fesili lea a le toeaina, ai o lona fia iloa po’o fai lelei si ona afafine e le aiga, ae maise lava o Lameko. Ua ‘ata Tagiilima ma fa’apea ane i lona tama, “Tama, ‘aua e te popole mai ia te a’u, o lo’o sologa lelei mea uma i totonu o le aiga. Ou te le i masani lelei i nisi tagata o le aiga, ae manatua fo’i e oe tama, e leai lava se aiga e sa’o lele ni ona tagata. E i ai lava tagata lelei, e i ai fo’i ma tagata leaga, ae ‘aua e te lua popole mai ia te a’u, o lo’o maua pea lo’u malosi. Ua na o oulua lea ou te popole atu i ai.”“O a mai Malia, talofa e, i si o’u uso, ua ou sau lava ae tia’i. Ua i ai le ma fuafuaga ma Lameko ma te o’o atu i le fa’aiuga o le vaiaso nei. O lona uiga toe lua aso e va ai ma le aso lenei ona ma sauni atu loa lea e asi atu outou.”Ua uma ona iloa e Pule i a Lameko i le la talatalanoaga lea na fai nei i le po ae maise ai o le tusi na alu atu ma le avepasi i tua. Ua lagona le fiafia o le toeaina i lea taimi, i lona va’ai atu i si ona afafine ua sui lava. Ua le toe ofu Tagiilima i se ofu e masae mai lava le isi itu e tau i le isi itu, ua le toe ve’uve’ua le lauulu e pei ona i ai i aso a’o nofo i tua, e alu lava le aso atoa o fealua’i solo Tagiilima ma lona lauulu e le selua. E su su mai lava le ofu i le taeao e o’o ina pogisa, e fiu fo’i lona tina e tautala i ai, ae le mafai lava Tagiilima.Ua le toe va’ai o tu i le umukuka mai lava i le taeao se ia o’o ina pogisa. O le isi mea fou ua iloa nei e le toeaina i lona afafine, ua fai lava ma a’apa ane i le la’au pese ma ta ta ai ana pese. Na fa’apea mafaufauga o le toeaina, e, o aso o le olaga, o aso ua lelei, o aso fo’i ua fa’ale lelei. Ae fa’afetai ua va’ai atu i le olaga o le a i ai Tagiilima o le a ola manuia ma ola fiafia.Na fa’ateia mafaufauga ia o le toeaina ina ua savali mai i totonu le lo’omatua o Silia. Na savali mai nei i ai le teine ua fa’afeiloa’i atu lona tina, ae na fa’ateia le feiloa’iga ina ua fa’apea ane le toeaina, “Se Silia, alu se i e o’o i le vai, anusa, o le a e savali mai ma somo, alu e fufulu ou mata ona e sau ai lea, ta te le o i tua, o lea ua ta iinei i le taulaga, e tatau ona felesi mea uma.”Ua ‘ata le teine ma tilotilo ane i lona tama ma lulu le ulu. “Tama, e ‘ese lava oe ma au mea e fai i si lo’omatua, tu’u ia lua mea na se i oulua o i tua ona fai lea.” Ua na o le ‘ata’ata o le toeaina e foliga mai ua mimita i le va’ai atu i lona afafine. “Tagi, ua sui lava si ou tina, e te manatua fo’i a fai atu sa’u tala, ua leva ona tu e fa’afetaui mai, o le tele o taimi ma te pisa ai, ona e le pau sa’u upu i lou tina, a’o lea ua ou le iloa, ua ou fiu fo’i e fautua i ai, ua leai lava. Ua le toe i ai ni ona uiga e sagisagi mai i a te a’u, e pei ona i ai muamua. Ua ou le iloa i le lo’omatua, po’o le mea ua i ai se soga’imiti i tua ua fa’asea le lo’omatua.” Ua ‘ata Tagiilima ma tilotilo ane i lona tama, ua toe manatua e le teine e i ai nisi taimi o le aso, la te muimuia ai ma lona tama si ona tina, pe a o’o i taimi e vevesi ai Pule ma Silia.Na punou nei i lalo Pule ma na iloa ai e Tagiilima le maligi ifo o loimata o lona tama. Na savali ane nei ma fusi ma fa’apea ane, “Tama, ‘aua e te popole i a Tina, ou te iloa lava e i ai le taimi e malosi ai. O lea o le a ma o atu ma Lameko, ma o le fa’aiuga fo’i e fai lava i tua, afai lava o le a ou nofo i tua i lo tatou aiga, ua sili fo’i lea, pe afai o le itu lea o lo’o mafatia ai le loto o si o’u tina.”Ina ua ma’ea le malu taeao a matua o Tagiilima ma matua o Lameko, ua sauni loa le malaga a Pule ma Silia e toe fo’i i tua. O le pasiusu o le taeao, lea e fa’atalitali se i manava galuega o le afiafi ona fa’atoa alu lea i tua. O lea la ua sauni ai nei mea uma mo le la fa’aoso i tua i le aiga.E le i faigaluega Lameko i lea aso, fa’atoa pau lea o se aso ua le faigaluega ai Lameko talu ona tula’i mai i le galuega o lo’o i ai nei, e fou fo’i i tagata faigaluega o le ofisa lea tulaga i a Lameko, ona e le masani ai Lameko.Ua alu nei le fa’atauga mo le fa’aoso a Pule ma Silia e o ma la’ua i tua. O mea uma i totonu o le faleoloa e leai se mea e tasi na mana’o i ai le toeaina ma le lo’omatua. Pau lava le mea sa manana’o ai o le moli penisini ma le moli tu mo si o latou fale, pau lea. Ua fiu fo’i Lameko e fa’asufi le toeaina o Pule pe mana’o i lea mea, e tasi lava le tala a le toeaina, e leai.Na ta’ita’i nei e Tagiilima si ona tina i le isi itu lea e i ai oloa ua patino tonu mo tina ma tama’ita’i. Na fiu Tagiilima e fai i lona tina i ofu fo’i nei e aoga mo tina ua matutua, ae lu lu mai o le ulu o le lo’omatua e le mana’o i ai. “Se, va’ai oe i ofu ia, e ‘ese le mananaia, o mu’umu’u ia e te ofuofu ai i mea e fai a le aulotu.” E pei lava e fai i le tua o le pato i lea taimi.