Ads by Google Ads by Google

Alofa: Fa'avae ai Aiga

Na tilotilo atu nei Tagiilima i le itu o lo’o i ai Pule ma lona to’alua o Lameko, na iloa atu e Tagiilima ua u’u mai e Lameko le moli penisini ma le moli tu, ma savali ane e fa’asinosino i a Pule. Ua tu le teine ma fa’apea ifo i lona loto, talofa e, i nai o’u matua, ai ana o nisi matua, e uma mea o le faleoloa ona manana’o i ai, ae va’ai atu nei, e le o ni matua e naunau i ni mea e maua fua mai, ua masani lava la’ua i si o la fale afolau, ma si o la moli matagi e mumu i po uma, pe a fai le la pele suipi.Ua ata Tagiilima ma toe liliu ane i lona tina, na fiu le teine e tau su’e, ae va’ai atu o lo’o talanoa mai ma se tasi o tina na malaga fa’atasi mai tua, lea o lo’o fai nei lana fa’atauga toe fo’i ai. O lea la o le a toe malaga fa’atasi ma Pule ma Silia i le pasi moe o le afiafi.I le po lea na talatalanoa ai Tagiilima ma lona tina, na fa’amotu e le teine le la talanoaga, ona ua i ai mea o lo’o mana’o e ave ai le fa’amomoli mo ona tuagane ma lona uso, fa’apea ma tuafafine o lona tama ma le uso o lona tama o Filipo ma lona to’alua o Segi. O ana fuafuaga ia, e le i iloa e lona tina ma lona tama, ae ua fa’ateia Lameko i le tau si’i mai fafo o le tigipusa. Ua ‘ata Lameko ma tilotilo ane i lona to’alua, ae maise ai o le tigipusa ua ta’atia mai nei i luma o le faitoto’a. Na tau mafaufau Lameko i lea taimi, po’o a mea o lo’o i totonu o le atigipusa, ua ‘ata ma tilotilo atu i lona to’alua.Ua o’o i le taimi e fa’amavae atu ai Tagiilima i nai ona matua, na va’aia e Lameko le tagi a le lo’omatua o Silia, e foliga mai ua ‘ese lava le lo’omatua i lea taimi. Na lagona e Tagiilima uiga ia o lona tina, ma ua le mafai ai ona taofiofi ona loimata. “Tina, ma te o’o atu e asi atu oulua i le fa’aiuga o le vaiaso ma ma tafafao ai i tua se i ma usu mai i le Aso Gafua, ou te alofa ia te oe lo’u tina pele”. Na taumafai nei Pule e ave’ese mai Silia mai i lana tama, peita’i, ua mau le opo a le lo’omatua ua musu e toe fa’amamulu ‘ese atu Tagiilima. “Silia, Silia o le a alu le pasi, o lea e fa’atali mai i a ta’ua.” Na fa’amamulu ‘ese nei e le lo’omatua lana tama, ma liliu loa i le pasi e le i toe tepa mai i tua. Ua na o le pupuni o ona foliga i si ona solosolo e tasi na alu ane ma ia mai tua. O tagata na i luga o le pasi i lea taimi, ua lagona le loto vaivai i le va’ai mai i le fa’amavaega a Silia ma lana tama o Tagiilima.Ua fa’amavae atu nei Tagiilima i si ona tama, “Pule, fa’amolemole si o’u tama, va’ai lelei lo’u tina.” Ua na o le luelue ane i ai o le ulu o le toeaina ma liliu ‘ese loa, ua musu ne i iloa e lona afafine ona loimata ua maligi ifo nei i ona alafau. Ua na o le tu o Tagiilima ma va’ava’ai atu ma le alofa i ona matua, e pele i lona loto. “Tofa Pule, tofa Silia, tatou feiloa’i i le fa’aiuga o le vaiaso, tofa Tina…tofa Tama.”Na a’apa ane nei Lameko ma fusi atu lona to’alua. Na ona liliu ‘ese lava o Tagiilima mai le itu lea o lo’o nonofo mai ai ona matua i luga o le pasi, fa’ataitaio loa. Ua ta’ita’i nei e Lameko i le la ta’avale ma alu ‘ese loa e le i toe fa’atali. “Tagi, e ‘ese le faigata o oe ma ou uiga, sa tatau ona e fa’aloto tele i le lo’omatua ma le toeaina, o lea e te iloa atu le loto vaivai o lou tina, sa tatau lava ia te oe ona e loto tele ina ia fa’amama avega i le loto o lou tina.” Ua na o le tilotilo o le teine i le isi itu ma ona loimata, “Meko, o lo’u loto atoa o o’u matua, ma lo’u aiga, o le na e te iloa.” Ua na o le nofo o Lameko i lea taimi, “Tagiilima, ae fa’afefea a’u, o lou to’alua.”E le i uma le tala a Lameko ae oso mai Tagiilima, “Lameko, e fa’amuamua i a te a’u o’u matua, ona soso’o ai lea ma oe.”Ua le tautala Lameko i lea taimi, ua pei ua tau oso a’e manatu fua o Lameko, ae se manu o se taule’ale’a ua lava ana a’oa’oga ma ua malamalama fo’i lona mafaufau, e fetala’i ai ma fa’auiga upu ia e lafo mai e lona to’alua i a te ia. Ua alu pea le ta’avale, na fa’alogoina e Lameko le tagi tagi pea a Tagiilima, “Lameko, ua ‘ese lava la’u fa’alogo, e pei lava o le a i ai se mea o le a tupu. “E! talofa e, i nai o’u matua, ua ou alu ‘ese lava ae tia’i. Ua pei ua ou le alofa i nai o’u matua Lameko, ua le malamalama ai lo’u mafaufau i lenei taimi.” Ua le tautala Lameko ua fa’asolosolo ona mafaufauga e fa’apea, afai o le tulaga lea o le a o’o i ai Tagiilima ae maise o lona tina, ua sili i a te ia lona fia va’ai atu i lona to’alua o ola fiafia, na i lo le tulaga lea ua tula’i mai nei. Ua tonu nei i lona mafaufau, o le a tapena a la mea uma i le fa’aiuga o le vaiaso, ma o le a nonofo i tua e tausi matua o Tagiilima, ua malie fo’i po’o le a le mamao o le ala, ua sili ia te ia le ola fiafia ma le filemu o le loto na i lo lona va’ai atu i lona to’alua o fa’apea mai. Amuia Tagiilima ua ia maua se tama e loto alofa e pei o Lameko. Amuia fo’i Tagiilima ua ia maua se tama e tali i ona tiga, e malamalama lona mafaufau, e le fia va’ai atu o pologa le loto o lona to’alua. Amuia Tagiilima, ua ia maua se tama e mapu i ai i taimi o faigata ma tiga o le olaga nei.E faia pea!