Ads by Google Ads by Google

Alofa: Fa'avae ai Aiga

O uiga ia o le lo’omatua o Naomi, atonu e le o fiafia i ai le aiga ona o lona tautala sa’o, leo malosi, ma e le fo’i lava sana tala e lafo i le tagata pe a o’o i taimi e sese pe sasi ai. Atonu fo’i o ona uiga ia, e alofagia ai e le tele o tagata ona o lona tautala i mea lelei ma upu e lafo sa’o e le fa’a’alo’aloa. O le itu lea o le lo’omatua na ola a’e lava ma ia.Ua fai ai tala a le nu’u ma tagata o le Ekalesia, o le so’o lea o Tagiilima, ona e le mana’o e fa’aletonu se mea e tasi. O le mea fo’i lea ua tagitagi ai fa’apea le lo’omatua o Naomi ina ua alu ‘ese Tagiilima, o ona foliga, o ona uiga, o mea e fai, ua pei o se ata i le fa’ata i lana va’ai uiga o Tagiilima. O ona uiga uma ia ua maua e Tagiilima, e le fefe i se tagata. E le mana’o i ni mea e maua mai, e le mana’o fo’i i se mea na te faia ae ia toe maua mai ai se taui. O ona uiga uma ia, lea ua pei nei o le mea pu’eata i lana va’ai, i uiga o le afafine o lona tuagane, ae talofa e, ua leai se tasi e toe nofo mai, ua leai fo’i se tasi e toe tapa atu i ai i mea e fai o le aiga. E pei o mafaufauga ia na lagona e Naomi ua mafua ai ona tagi aue ue i lea afiafi. A tagi tagi liliu ane otegia Filipo, lona tuagane la’ititi, e alu alu lava i’u ina lavea atu ai ma le lo’omatua o Segi, le to’alua o Filipo. Sa i ai le manatu o nisi o le aiga, ai o le a fa’auma le mataupu ona ua vela fo’i le fala, ua alu le aso atoa o feagai ma le fa’alavelave, peita’i, ua lagona e le lo’omatua o Naomi, ua fia talatalanoa ma fia mafuta pea ma si ona aiga. O le umi ona fa’atasitasi, o le a o’o ai i ni nisi tulaga, o le mea lea na manatu ai, ia vave ona ta’ape, ae ua le mafai le fia talatalanoa ma le fia mafuta o le lo’omatua o Naomi i tagata o lona aiga.O nei talatalanoaga fa’asamasamanoa ua fai e le aiga, e leai lava se leo o le lo’omatua o Silia, e foliga mai, o lo’o i ai se mea o mamafa i lona loto. Na mate gata fo’i e tagata o le aiga, ona o lea e talatalanoa fiafia, ae ua na o le nofo lava o le lo’omatua e le tautala. O ona uiga fo’i sa i i ai, ua pei lava e fofo’e ‘ese atu, a’o le lo’omatua fo’i, e fetaui lava ma le tuafafine o Pule. E fa’alogo atu loa o fai mai e Naomi se tala i a Pule, e le malolo Silia i lea taimi. A’o lea ua va’aia e tagata o le aiga uiga filemu ma le le gaoia o le lo’omatua, e le o iloa mai, o le fatu o Silia ua nutimomo, ua leai se vai na te mafaia ona liua, e leai fo’i se fa’amafanafanaga e mafai ona toe filemu ai lona loto ma lona mafaufau ina ua alu ‘ese atu lana tama o Tagiilima.E le i tali e Filipo le tala a lona tuafafine, ae na liliu nei ma tilotilo aga’i i fafo, ua alu le talie a tama o lo’o i tua i le umu ma tilotilo mai i le tomumu a Filipo i lona tuafafine. Na toe liliu nei i luma Filipo ma fa’apea ane i le tama a lona tuafafine na o mai ma lona to’alua palagi mai Niu Sila. “O ai le igoa fa’aSamoa o si tamaloa si’aula?” Ua ‘ata Sina ma fa’apea ane i le tuagane o lona tina, “Se o Simi le Sifi.” Na ‘ata’ata le tamaloa palagi ona o lona igoa lea e fa’aigoa ai ia e tagata Samoa o lo’o galulue i lana pisinisi i Niu Sila. Na liliu ane nei Filipo ia Simi, “A ali’i Simi, e sa’o o oe o le sifi?” Ua na o le pulapula vale o mata o le palagi i lea taimi ma lulu ane lona ulu i a Filipo. “Sauni oe e igoa Samoa sifi, taeao, me give oe Samoa sifi, okay.” Ua le iloa e le palagi fa’avasega le nanu a Filipo, ua na o le lulu ane i ai o lona ulu. Ae ua fa’amatala ane nei i ai e lona to’alua le uiga o le tala a le tuagane o lona tina, e fa’apea o taeao, o le a fai ai lona igoa matai, o ia o le a avea ma sifi, o le matai i totonu o le aiga.