Ads by Google Ads by Google

Asia e Ofisa Vetereni Hawaii - VFW Amerika Samoa

E to’atolu sui o le aumalaga mai le Ofisa o Vetereni ma Tautua eseese mo Vetereni o Taua i Hawaii na fono ma le Asosi o Fitafita Tuai a Amerika Samoa e feutaga’i i ala e mafai ai ona maua e tatou fitafita tuai, alamanuia eseese ua mae’a fa’atulaga e le fetarale.

 

O sui na malaga mai e aofia ai le Totino o le Komiti mo Penefiti mo Vetereni, Norbert Enos, le ta’ita’itono mo Alamanuia mo Vetereni ma latou aiga i le Matagaluega o Fitafita Tuai a Hawaii, Alfredo Antonio ma Mrs Viola Indie o le peresetene o le Auxillary i Hawaii.

 

Na taumafai le tama’ita’i o loo avea ma Totino e talosagaina penefiti mo Fitafita Tuai ua Litaea mai tautua Igafo Maria Va’a-Brown ma lona Asosi mo Fitafita sa Tautua a Amerika Samoa, ina o’o mai lenei aumalaga, e fa’afofoga ma taumafai e talosagaina ni mana’oga fa’apitoa o lo’o o’otia ai pea vetereni i Amerika Samoa ma Samoa Tuto’atasi.

 

Sa valaaulia foi e Va’a-Brown le faipule o Amerika Samoa i le Konekeresi ina ia auai i lenei fonotaga. Ma o ni fesili tuga sa fa’ailoa e vetereni i le faipule ma sui mai Hawaii, sa latou fa’ailo ai le tulaga le pasia mai o talosaga a le to’atele mo alamanuia mo sui o a’afia le ola maloloina i le “Agent Orange.” O le to’atele o lo’o fa’amaonia taimi na fa’aaoga ai le kasa sa auai i latou i tiute fa’afitafita o taua i Vietnam, peita’i, o gasegase fo’i ua iloga e afua mai i le fa’aaoga o lenei kasa, ae o lea e le o talia mai talosaga mo penefiti sa ofoina mai mo vetereni nei.

 

O le isi mataupu, sa fa’ailoa atu ai e fitafita tuai, e fia faatula’ia se su’esu’ega maoti i le aofaiga o Fitafita Tuai o alaala i Amerika Samoa ma Samoa Tuto’atasi, ma ia fa’aaogaina lea fa’ai’uga o nei su’esu’ega e talosagaina ai penefiti mo Fitafita tuai ma latou aiga.

 

O le isi mataupu o le tulaga o penefiti ma femalaga’iga o Fitafita Tuai e fia faia talavai i Foma’i Fa’apitoa mo latou ituaiga o manuaga ma gasegase ua maua ai i Hawaii. E le o mafai ona maua ni pasese totogi e malaga atu ai, toe leai fo’i ni totogi mo latou fale e nonofo ai i Hawaii mo talavai, ae na’o le totogi o le pasese e toe taliu mai ai. Aisea e tupu ai na mea, ae aisea fo’i e leai ai ni penefiti e nonofo ai i latou mo talavai i Hawaii.

 

O le valaaulia o le faipule i le Konekeresi ina ia fa’afofoga i mana’oga tupito i fitafita tuai, ina ia fa’ao’o atu fo’i e ia i le Komiti o Fitafita Tuai a le Konekeresi pe tua ma ni a se toe talileleia mai.

 

O nisi o nei mana’oga sa fa’aleo i fa’afesili, ae o nisi o fetufa’iga, sa fa’afofogaina ai Aumua, ma sa ia saunoa e tusa o ana fuafuaga ua mae’a fa’atino i lenei 14 masina talu ona tula’i mai i lenei tofi, ma o lo’o ta’ita’ifono o ia i se tasi o soakomiti o le Veterans Affairs a le Konekeresi, le vaega o Pisiniti Tuma’oti mo Fitafita Tuai.

 

O le soso’oga o le falema’i i Faga’alu ina ia tautuaina ai Fitafita Tuai pe fa’aaogaina fo’i mo talavai a le VA, o se tasi lea o mataupu o lo’o fa’aauau ona taumafai atili le tama’ita’i faipule ina ia talia ma pasia lelei.

 

O le isi ana mataupu ua amatalia ma ua mae’a fa’atino ma ausia fa’ai’uga lelei, o le talosagaina lea o Sitiseni o Fitafita Tuai ua mae’a le tautua ae le’i liliua lava latou sitiseni i le Sitiseni Amerika nai lo le Nesionale o Amerika e pei ona soifua a’e ai i Amerika Samoa. O le sui muamua lava ua maua lona sitiseni mai lea tautua o le susuga Talalua Lemafa.

 

O isi mataupu na saunoa ai le tamaitai faipule e aofia ai aoga mo fanau ma femalagaiga ua le gata i va’alele ae o auala.