Ads by Google Ads by Google

ASNOC:Viia taumafaiga Tanumafili i Ausetalia

Ua faaalia e le peresetene o le Komiti o Ta’aloga a le Olimipeka i Amerika Samoa (ASNOC) susuga J. Victor Langkilde lona fiafia tele ina ua manumalo le alo o Amerika Samoa o lo o koleni i Niu Kaletonia i le pine auro, i se ta’amilosaga sa faia i Ausetalia i le vaiaso na te’a nei.

 

Saunoa Langkilde e fa’apea, o le manumalo ai o le susuga a Tanumafili Malietoa-Jungblut i le pine auro i Ausetalia, o se ata vaaia lea o le tulaga aoga ma le alu tatau o tupe a le ASNOC o lo o totogi ai le avanoa sikolasipi lea o lo o koleni ai o ia i Niu Kaletonia.

 

O Malietoa-Jungblut ma Apineru Vaoga, o sui ia e to’alua mai le Asosi Siisii uamea mamafa a Amerika Samoa na fa’amanuiaina i ni avanoa sikolasipi mai le Faalapotopotoga Siisii a le Pasefika (OWF) i le tausaga na te’a nei, lea sa fa’atupe e le ASNOC.

 

O se vaega tupe sa masani ona maua e le Asosi Siisii a Amerika Samoa mai le ASNOC i tausaga uma lava, na fa’aalu lea e fa’atupe ai avanoa sikolasipi mo ali’i nei e to’alua, peita’i o le taimi nei, ua toe fo’i mai i fanua le susuga a Vaoga ona o ni isi o mafua’aga fa’aleaiga, ae totoe ai na o Malietoa-Jungblut lea o lo o fa’aauau pea ona koleni i Niu Kaletonia mo le umi e 13 masina e oo mai i le taimi nei.

 

O le tauvaga sa faia i Ausetalia e taua o le Australia Weightlifting International Open Championships sa maua ai le avanoa o Malietoa-Jungblut e tausino ai i le aupaga o le 94kg i le vaega o ali’i, ma ia manumalo ai i le pine auro mo le taimi muamua talu ona avea ma tagata siisii i le mamafa e 320kg.

 

Na taua e le Peresetene o le OWF ia Paul Coffa i le Samoa News e fa’apea, o se tulaga mataina ua i ai taumafaiga a Malietoa-Jungblut i le taimi nei, pe a fa’atusatusa i le tulaga sa i ai le maualuga o lana si’i ina ua fa’atoa ulufale atu i le aoga siisii i Niu Kaletonia i le tausaga na te’a nei, lea sa na o le 250kg le mamafa o lana si’i.

 

“O le tulaga tonu lava lea e tatau ona faia e Amerika Samoa, aemaise lava i le ofisa o le ASNOC, ia fa’aalu a latou tupe e fa’atupe ai avanoa sikolasipi mo tama ma teine siisii ina ia maua e i latou le avanoa e koleni ai i nofoaga lelei o lo o i ai fale siisii a le Pasefika e pei o Niu Kaletonia, Fiti ma Samoa, ina ia mafai ai ona maua le tomai e fa’atino ai le ta’aloga, ma fesoasoani ia i latou nei i le atina’eina o le ta’aloga i Amerika Samoa i le lumana’i”, o le saunoaga lea a Coffa.

 

Na taua e le faiaoga a le au siisii a Amerika Samoa ia Tomane Alo Lopesi lona fiafia tele i le tulaga ua i ai taumafaiga a Malietoa-Jungblut, ma o lo o i ai le fa’amoemoe o le a sili atu lana taumafaiga i le ta’amilosaga a le Oceania lea o le a talimalo ai Fiti i le masina o Me o le tausaga nei.

 

E to’a 7 sui o le au siisii a Amerika Samoa ua fa’amoemoe e auina atu i Fiti, lea e aofia ai ma le susuga a Malietoa-Jungblut.