Ads by Google Ads by Google

Aso Fa’afetai - Pavaiai Elementary & ECE

O le fa’ailogaina e le A’oga a Pavaiai Elementary ma le ECE o le Aso Fa’afetai 2014, sa faia ai mea masani a vasega ta’itasi, e teuteuina lava e le faia’oga ma latou vasega o latou potu a’oga i teuga masani o le Aso Fa’afetai ae maise o latou faitoto’a e matua teu fa’aleleia i ata o pi-pi  (turkey) ma ua mata’ina ai lava le latou taeao fiafia.

 

I lea taeao, sa asia ai e le sui filifilia i le Konekeresi lea fo’i a’oga, ma sa maua le avanoa e fa’atalofa ai ma le Level 5, ma o latou faia’oga, a’o fa’ae’e le latou pasi mo le latou asiga i le Faletusi tele i Utulei e maimoa ai, ma ia iloa e i latou le tele o le sosia o le atamai e afua mai i le “Malosi’aga o le Upu.”

 

O se poloketi lea o lo’o latou fa’atautaia i le taimi nei, ina ia fa’amalosia le fanau e faitau, tusitusi ma iloa ona fa’aleo o latou lagona ma manatu. O tama’ita’i faia’oga o lo’o aofia i lea taumafaiga a le Level 5 o Clarinette Eves, Cassandra La’apui [SPED], Vanila Ta’ai [ASCC BEd student teacher] Salevalasi Lam Yuen [Librarian] ma le susuga Tala le ‘avepasi sa aofia mo lea fa’atasiga.

 

Na i ai le vasega a Le’emo Fua o le Level 1 sa faia a latou fo’i fa’aaliga i fafo ane o latou faitotoa, ma sa va’aia ai le matagofie o ata tusia ma galuega fa’atino a le fanau a’oga i lea vasega, ua fa’atautau ma ua teuteuina ai le latou potu a’oga ma le faitoto’a.

 

O Savannah Fonoti, Tereise Saili, Akenese Ah Kuoi -Vine ma Karean Ioka sa latou fiafia tele e fa’aalia mai ata tusia a le fanau i lana vasega e taua’aoina atu mo matua pe a tu’ua le a’oga i le toe aso, le aso Lulu ua te’a.

 

I le ECE a Pavaiai, sa matua tele na’ua le gaoioiga na fa’atino ai e le vasega o le PTA, aua o matua sa aofia i lea falea’oga, ma latou o atu ma fua o fa’aeleeleaga ina ia fa’atauina atu i tau taugofie lava. Sa i ai fo’i ma tausami matagofie fa’a-Samoa, le Vaisalo, Supoesi, Fa’apapa, le anoanoa’i o fuala’au ‘aina mata ma le esi ma fa’i pula.

 

Ona o faia’oga o Lisa Asifoa o Pava’ia’i Elementary o lo’o taumafai ai lona fa’ailoga BEd mo lenei tausaga, o lea sa ia fa’aaogaina ai lana a’oga i le Elementary ma le ECE e fa’atino ai lana pepa mulimuli mo lona fa’ailoga.

 

O lana tapenaga o lana polokalama lea o le “Who ma I?” po’o “O ai a’u?” o lana fa’atinoga mulimuli la o le aso Lulu ma ua fa’ailoa ai le aoga o ana galuega fa’atino sa faia mo le fanau. Na alu asiasiga i nofoaga eseese e mafai ona galulue ai nisi e avea ma se Kovana po’o se ta’ita’i o le Malo o Amerika Samoa, lea sa latou asia ai le Maota o le Kovana i Maugaoali’i.

 

Na asia fo’i e le ECE Pavaiai le Faletusi i Utulei mo se tasi o le fanau e fia avea ma Faia’oga o le Faletusi, faapea fo’i le asiga i le Tauese Sunia Marine Sanctuary i Utulei, ina ne’i fia avea se tasi ma ali’i fagota pe tautai o le Vasa.

 

Peita’i sa ia a’otauina fo’i le fanau i le tusia o sau tusi e fa’amatala ai po’o ai oe! O lana ki lea o le iloa e le tamaitiiti fa’amatala lona tupu’aga, ma fa’amaumau ni ona ata i lea tausaga ma lea tausaga o lona soifuaga.

 

O le isi mea sa ia a’oa’oina le siva ma pese samoa i le fanau, ae maise o le tapenaga o lou toniga mo au fa’afiafiaga fa’asamoa, ma sa ia a’oa’oina ai le gaosiga o le “Ie Tie Dye.” Na tula’i se tasi o ana tama’iti a’oga ECE ma fa’amatala le gaosiga e fa’apea, “Au mai le fasi ie, milimili lona pito, lolo i totonu o le vali, aumai i fafo fa’ala ia mago, maua loa lou ie o le toniga o le siva.”