VAEGA 71

E toe faatalofa atu i a tatou paaga i so’o se tulimanu o le kele, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

***********************************

Na gata mai le tatou Fagogo i le vaiaso ua mavae ina ua tu’ua e le alii fomai o Taki ia lona tina, le fafine o Elena ma le faaupuga a Elena sa le fiafia ai Taki, o le ‘faamagalo i le tamaloa o Alesana/Tanielu’, le uo mamae a si ona tua’a lea ua maliu.

Ae ina ua tatou liliu mai i le aiga o le tamaloa o Alesana/Tanielu, sa le’i mautonu ia le tamaitai o Naomi ina ua usu mai i le taeao na soso’o ai, i lalo i le fale’aiga a lona tama, sa ia va’aia le sagisagi fiafia o Alesana/Tanielu i ana tagata fa’atau, e pei lava e le o tupu se mea i totonu o lona aiga.

Ua oso mai ia Naomi ma fesoasoani i lona tama i le faiga o oka a tagata, aua a latou taumafataga o le taeao ae e le’i faimalaga atu i galuega ma fuafuaga fai o le aso.

Ina ua mae’a le pisi o le taeao, na faapea loa ona fai atu le tamaloa o Alesana/Tanielu i lona afafine, e alu e valaau lona tina ma ona tei matutua, o Ruta ma Iakopo, e o mai loa e fai le latou ti o le taeao, ae e le’i o e faigaluega.

Ua savali atu nei le teine o Naomi ma tu’itu’i i le faitoto’a o le potu a ona matua ma na tatala mai e lona tina.  Sa fa’a ‘good morning’ atu Naomi i si ona tina ma na ia vaaia le taumafai o lona tina, e ataata mai i si ana tama teine.  Ae na iloa atu lava e Naomi, sa le’i lelei foi le moe a lona tina i le po ua mavae.

“La e fai mai Daddy e o atu loa e inu le tatou ti,” o le oso fiafia atu lea a Naomi i si ona tina ma ia tago atu i le u’u mai lona lima ma ta’ita’i mai o ia.

Na toeititi o la o’o i le faitoto’a ae toe lilium ai Naomi ma valaau mai i totonu o le fale, “Luka ma Iakopo, fai mai Dad o e aku e igu le ki!”

“E, ua tiga o’u taliga i lou leotele,” o le ote atu lea o le fafine o Eseta i si ana tama teine.  Ua ‘ata leotele Naomi ma ia tago atu opo mai si ona tina ma o la u’ulima ma savavali atu i le fale’aiga lea o lo’o fa’atali mai ai le tamaloa o Alesana/Tanielu.

Ua saofafa’i ifo uma nei le aiga ma fai le latou lotu ma amata loa ona a’ai.

Ae na fa’ate’ia le aiga, ina ua faapea mai le tamaloa o Alesana/Tanielu i lona afafine o Ruta, “Ruta, o lea e mana’omia sa’u loia.”

“E a? E fai i fea lau loia?” o le fesili lea a le fafine o Eseta i lona to’alua.

“Ua leva ona ou mafaufau i lenei mea tupu ma ou te talitonu ma lo’u loto atoa, o le tali fa’aaliali lea mai le Atua i a’u talosaga, po o le a le mea e tatau ona fai,” o le tala lea a Alesana/Tanielu i lona aiga.

“Ua ou mana’o e toe fa’afo’i o’u pepa i lo’u igoa sa’o, o Alesana Penaia,” o le tala lea a le tamaloa o Alesana/Tanielu i lona aiga.

[E FAIA PEA]