Ads by Google Ads by Google

Avea le le lava tupe ma faafitauli tuai o galuega malo

FETU: A leai ni tupe la’u ane ni ma’a e tanu ai le auala

 

Ao tau faamanino e le Inisinia a le Matagaluega o Galuega a le malo ia Faalava’i Taase i luma o le komiti o Galuega a le maota o sui ananafi, le mafuaaga e ala ai ona tuai le faatinoina o galuega a le malo i auala ma taligalu, ona o le leai o ni tupe lotoifale e fesoasoani ai i lenei manaoga, na faauialeva ai le afioga i le alii faipule ia Fetui Fetu Jr ma saunoa e faapea, afai e leai ni tupe a le matagaluega e faatino ai galue, faaaoga ma’a e tanu ai le auala.

 

E tolu iugafono na faaulu i luma o le maota o sui na aofia i le iloiloga a le komiti i le taeao ananafi, i lalo o le taitaiga a le afioga i le taitai komiti ia Atualevao Gafatasi Afalava.

 

O ia iugafono e aofia ai le talosaga mo se taligalu i Leloaloa ma Aua, o le iugafono mo se taligalu i Alao ma Vatia, faapea ai le iugafono e talosagaina ai ni paipa e fai ma puipui i le auala e agai atu i Alofau ma Amouli.

 

Na taua e le tamaitai faatonusili o le matagaluega o Galuega a le malo ia Faleosina Voight i le komiti e faapea, o lo o faagasolo pea feutanaiga mo le faaaogaina o tupe e faatino ai le galuega, ma o ni isi o taligalu ua maea ona tuu faatasia ripoti ma ata mo le fausiaina, pau le itu o lo o faatali i ai o le faamaonia mai lea o ni isi manaoga tau i le feterale, ona amataina loa lea o le galuega.

 

Na o taligalu o lo o agai i ai fuafuaga a le matagaluega i le taimi nei, lea foi ua i ai ripoti o loo galulue i ai le matagaluega, ae o puipui mo autafa o auala o lo o talosagaina, o lo o i ai le manatu e fia faia se suesuega mo le tuu faatasia o ni faamaumauga i manaoga nei, aei sei vagana ua i ai se ripoti mai le ofisa o leoleo mo ni faalavelave na tutupu, ona faatoa mafai lea ona faanatinati i ai se gaioiga a le matagaluega.

 

E lei nofo lelei i le finagalo o le sui fofoga fetalai ia Iaulualo Faafetai Talia le saunoaga lea a le tamaitai faatonusili, ona o lona talitonuga, e le tatau ona faatali sei faatoa tupu mai se faalavelave ona faatoa gaioi lea o le matagaluega.

 

Saunoa Talia, e le tatau ona faatali le matagaluega sei tulai mai se faalavelave, ae tatau ona faataoto a latou fuafuaga ma faagaioi galuega.

 

“Sa tuu atu foi i se taimi ua te’a mo ni puipui o auala i Faleasao ma Ta’u, e oo mai lava i le taimi nei e lei faia lava se mea e tasi, a’o lenei ua tele iloiloga ua tatou feioai a’i, tasi lava le tali a le matagaluega, o lo o faagasolo fuafuaga mo galuega, o afea e faatino ai a outou fuafuaga o lo o faataoto,?” o le saunoaga lea a Talia.

 

Na lagolago e le alii faipule ia Fatulegaee Palepoi Mauga le finagalo o le sui fofoga fetalai i le manaomia o ni taligalu ma ni puipui o auala mo le saogalemu o auala.

 

Saunoa Mauga e faapea, o le auala i Alao e le o toe umi se taimi ae motu le auala ona o lo o aia i le sami, e faapena foi i le auala o Vatia, e tatau foi ona fausia ai ni puipui ona e maualuga le auala.

 

Fai mai Mauga, sa i ai se taavale na pau i tausaga ua mavae i le auala i Vatia ma Afono, e mafua mai ona o le maualuga o le auala, ma maimau ai ni isi o soifua.

 

Na faaiu le talosaga a le alii faipule i lona talosagaina lea o se gaioiga vave mo le fausia o se taligalu ma ni puipui mo auala i lona itumalo, atoa ai ma le fausia o ni fale faatali pasi se tolu i Alao, e fesoasoani ai i fanau aoga i le taimi e timuga ai ao faatali pasi e o ai i le aoga.

 

O le toatele lava o faipule na maua avanoa e tulei saunoa ai, sa latou lagolagoina o le manatu ua tatau ona faanatinati galuega mo le saogalemu o le atunuu, ma faaiu ai loa le iloiloga ina ua faaluaina le mau e faaagafua molimau.

 

A’o le’i tulai ese molimau, na toe saunoa le susuga ia Taase e faapea, mai le tele o tausaga talu ona galue i le Ofisa o Galuega a le malo, o le faafituali numera tasi lea o lo o feagai ma le matagaluega, o le leai o ni vaega tupe lotoifale e faatino ai galuega e pei ona talosagaina e sui o itumalo.

 

E le’i uma lelei le saunoaga a Taase ae faauilavea le faipule mai Manu’a ia Fetui Jr ma saunoa e faapea, “Matua vaivai lau alofaga o lo o faailoa mai i le komiti alii,” o le saunoaga lea a Fetui Jr ia Taase.

 

“Afai e leai ni tupe e fau ai galuega, la’u ane ni ma’a e tanu ai le auala pe afai o le faafitauli lena o lo o tula’i mai,” o le saunoaga lea a Fetui Jr na mafua ai ona faauilavea le alii faipule mai Fofo ia Puletuimalo D. Koko ma talosaga i le taitai komiti, ina ia faamuta le iloiloga.

 

Ua pasia nei e le maota o sui iugafono e tolu sa talanoaina, mo le fausiaina o ni taligalu ma pa e puipui ai auala i afioaga e pei ona taua.