Ads by Google Ads by Google

Fa’ailoa feterale auala o lo o tu’uaia na fa’aaoga ai Mine Pase tupe

I fa’amaumauga mai le feterale e uiga i le mataupu o lo’o tu’uaia ai le sa avea ma pule o le American Samoa Special Services Commision (ASSSC) ia Mine S. Pase o lo’o taua ai, o le sa galue i le vaega o Tupe a le Ofisa o lo’o tu’uaia e le feterale i lona a’afia ai i lenei mataupu.

 

O le aso Faraile na te’a nei na teena ai e Pase le moliga o lona fesoasoani lea e fa’ataunu’u le solitulafono o le gaoia lea o se vaega tupe e silia ma le $325,000 mai tupe na tu’uina mai e le feterale i le polokalame o le Army Corps, ina ua tula’i i luma o le ali’i fa’amasino o Reggie B. Walton, o le ali’i fa’amasino o le fa’amasinoga feterale fa’aitumalo i le aai o Uosigitone, ma ua fa’amoemoe o le aso 23 Mati 2012 o le a lau ai lona fa’asalaga.

 

Ua tatala i tua e le fa’amasinoga ia Pase e aunoa ma se tupe e totogi, ma ua fa’ataga fo’i ona toe fo’i mai i le teritori ma le tu’utu’uga, afai ae taunu’u mai i le atunu’u, ua tu’uina atu i le Ofisa o le loia sili ona pepa malaga e taofia ai, fa’atoe toe tu’u atu ia te ia i le aso e toe malaga atua i Uosigitone mo le lauina o lona fa’asalaga.

 

Na fesiligia e le Samoa News le sui o le Matagaluega o Fa’amasinoga a le feterale ia Laura Sweeney, i auala e fa’afoeina ai e le feterale mataupu a i latou e tu’uaia ma ta’usala i le fa’aaoga seseina o tupe mai le feterale.

 

Na taua e Sweeney, so’o se mataupu lava e aofia ai le fa’aaoga seseina o tupe a le feterale, e iloilo ma le toto’a e le feterale ma fai i ai lana fa’aiuga fa’avae lea i luga o mau fa’amaonia ma tulafono, ma o lo’o i ai le fa’anaunauga o le feterale e tatau lava ona fa’aaoga tatau ma le fa’amaoni tupe uma o lo’o tu’uina mai mo atina’e, ae le tatau ona fa’aaogaina e se tagata mo ia lava.

 

E le’i mafai e Sweeney ona tali mai ina ua fesiligia o ia i se fa’aiuga a le Matagaluega o Fa’amasinoga a le feterale, i  se avanoa e mafai ai ona molia nisi o lo’o a’afia i lenei mataupu, atoa ai ma le fa’aauauina pea lea o a latou sailiiliga e uiga i lenei mataupu.

 

Ae tusa ai ma fa’amaumauga a le fa’amasinoga o lo’o taua ai, o le Ofisa o le ASSSC o lo’o fa’avae mai ai isi polokalame e fa na galulue i le atunu’u, ma o ia polokalame e fa e aofia ai le “Read to Me Samoa,” lea latou te tu’uina atu polokalame tau a’oa’oga mo fanau aoga i aoga tulaga muamua ma aoga maualuluga i le atunu’u.

 

O le polokalame lona lua o le “Log On Samoa” po’o le “Love Thy Neighbor, lea latou te tu’uina atu aoaoga tau komipiuta mo fanau aoga mai aoga tulaga muamua.

 

O le polokalame lona tolu o le “Jungle Busters”, lea sa galulue i le fa’asaoina lea o le vaomatua e ala i le taina ma le aveesea o laau e ono fa’atamaia ai le ola fa’alenatura o laau i le vaomatua, ma le polokalame lona fa o le “HIS Ministries, lea latou te tu’uina atu aoaoga fa’a faufautua mo aiga o i latou o lo’o taofia i le toese i Tafuna.

 

I le va o le masina o Aokuso 2009 ma Oketopa 2010 e pei ona taua i fa’amaumauga a le feterale, sa galue ai le tagata ua taua o le “TAGATA A” i le vaega o tupe a le ASSSC, o ia lea e gafa ma le toina mai o tupe mai le feterale, fa’atulaga le totogiina atu o tupe mo femalagaaiga, saunia o siaki mo le totogiina o tupe e mana’omia mo le ASSSC.

 

O le “TAGATA A” na sainia siaki mo le polokalame a le Log On Samoa e totogi ai tupe e manaomia ona totogiina atu mo tautua a lea Ofisa.

MALAGA I SAMOA

 

Fai mai fa’amaumauga a le feterale, na fa’atulaga e Pase ma “TAGATA A” se malaga mo Pase ma nisi o sui o le Komiti a le ASSSC, ina ia mafai ai ona latou mauaina le  tupe e $78,889 e fa’atupe ai sa latou malaga mo Samoa, e ui sa iloa lelei e Pase ma nisi o i latou nei, e le taliaina i lalo o le fa’aaogaina o tupe nei a le feterale le fa’aaogaina o nei tupe i ni malaga fa’apenei.

 

Mo se fa’ata’ita’iga o le fa’aaogaina o lenei tupe o lo’o taua ai, i le aso 25 Me 2007 sa fa’aaoga ai le tupe e $13,400; o Aperila 14, 2008 e $15,960 sa fa’aaoga ai; o Aokuso 27, 2008 e $14, 690 sa fa’aaoga ai ma le $4,450 na fa’aaoga ia Aperila 28, 2008.

 

TUPE NA MAUA E PASI I LE MALAGA LEA

 

Fai mai fa’amaumauga a le feterale, sa galulue le “TAGATA A” ma Pase ina ia maua e le ua molia ma sui o le Komiti le tupe e $109,532 mai tupe a le feterale mo le latou malaga, ma e le’i malaga ai ia “TAGATA  A” e pei ona taua i fa’amaumauga a le feterale.

 

E fa vaega tupe eseese o lo’o taua i fa’amaumauga a le feterale sa totogi atu mo Pase i le malaga lea, ma o ia vaega tupe e aofia ai le $2,348 na totogi atui le aso 31 Mati 2008; $2,643 sa totogi atu i le aso 25 Setema 2008; $3,494 na totogi atu i le aso 23 Fepuari 2009, m ale $2,914 na totogi atu i le aso  17 Aperila 2009.

 

Na taua fo’i i se ripoti na saunia e le Vaega Su’etusi se tasi o fa’afitauli o lo’o taua ai, na maua e nisi o tagata faigaluega a le ASSSC tupe mo latou malaga nei, peita’i e leai ma se isi o i latou nei sa o i nei malaga. O lo’o taua le totogiina e le ASSSC o tupe mo malaga nei mai tupe feterale, ma o nei tupe sa totogiina atu i le aofa’i o aso sa aofia i nei malaga.

FA’AAOGAINA O LE OFISA

 

O lo’o a’ofia ai i totonu o fa’amaumauga a le feterale se vaega tupe $28,009 sa totogi atu e Pase i se tasi o lona aiga mo le fa’aaogaina o se vaega o le Ofisa e le polokalame o le Log On Samoa ma le HIS Ministries, ina ua taua le fa’aleagaina o vaega o le ofisa ma mana’omia ai le toe fa’aleleia.

 

E le gata i lea o lo’o taua ai fo’i e fa’apea, sa galulue Pase ma “TAGATA A” i le saunia lea o se vaega tupe e $1,250 lea e fa’afa ona totogiina atu i se tasi o le aiga o Pase mo le fa’aaogaina o le fale e fai ma Ofisa, i le aso 19 Oketopa 2010.

 

O tupe mo le totogiina o lea rent na amata totogi atu ia Oketopa 2009, e aofia ai ma le isi tupe e $6,250 sa totogiina atu ia Iuni 4, 2010.

LISIINA O LE TA’AVALE

 

O lo’o taua ai fo’i i fa’amaumauga a le fa’amasinoga le totogiina atu lea e Pase o se tupe e $19,665 i se tasi o ana tama teine, mo le fa’aaogaina e le Ofisa o lana ta’avale i lalo o se maliliega, e ui o lea ta’avale e pulea ma fealua’i ai Pase.

 

O lo’o taua ai fo’i i fa’amaumauga a le feterale le galulue o Pase ma “TAGATA A” i le tapenaina o siaki e totogi ai le fa’aaogaina o le ta’avale, ma o lea tupe sa aumai lea i le tupe o le polokalame a le Log On Samoa.

 

O le masina o Setema 23, 2009 e oo atu ia Me 26, 2010 na faia ai peimeni mo le totogiina o le fa’aaogaina o le ta’avale, e amata mai i le $400 le maualuga o le siaki e o’o atu i le $1,600.

 

FA’ATAUINA O MEAAI

 

O lo’o taua ai fo’i i fa’amaumauga a le fa’amasinoga le fa’aaogaina e Pase ma “TAGATA A” o le silia i le $89,313 e fa’atau ai meaai mo le ofisa, e ui sa laua iloa e le fa’atagaina e le feterale ona fa’aaoga tupe e fa’atau ai taumafataga a le ofisa.

 

O le masina o Tesema 2008 e oo atu ia Ianuari 2010 o lo’o taua sa faia ai lenei gaioiga e pei ona totogiina atu i le Tepora Group, mai le aofa’i e $500 e o’o atu i le maualuga e $1,200, ma o taumafa nei sa fa’atau i taimi e faia ai fonotaga ma a’oa’oga a le Ofisa.