Ads by Google Ads by Google

Fa’alauiloa le paga a Faoa/Taufete’e mo le palota 2012

O le Aso Faraile na te’a nei, na fa’alauiloa aloaia ai le paga tauva a le afioga ia Faoa Aitofele Sunia ma le tofa Taufete’e J. Faumuina, mo le tofi Kovana ma le Lutena Kovana i le palota o le tausaga fou 2012. Na aofia potopoto i lea fa’amoemoe aiga ma uo o sui tauva, fa’apea ai i latou ua manatu latou te lagolagoina le fa’amoemoe a Faoa/Taufete’e, e pei ona i ai le la manulauti e fa’aautu i ai le la taumafaiga e fa’apea, “O ti’a e malie, e fifimalie.”Na fa’aalia e Faoa i lea fa’atasiga e fa’apea, e le o i ai se fa’amoemoe o ia te i laua e fa’ataga o e tauva mo tofi o le atunu’u, ae o le agaga, ia tausinio ina ia manumalo, ma ia manumalo e fia galulue, fa’aaoga le soifua ma taleni e tautua ai le atunu’u.“E le toe i ai se fa’aletonu po o se taumate. Ua tatou o! E 12 masina o le malaga lenei. E le pu’upu’u. E le faigofie. A ua tupu le lototele ma le mafanafana i le va’ai atu i lo outou tula’i mai,” o a Faoa lea.O lenei fa’amoemoe sa tapena ma tu’ufa’atasia e le komiti filifilia e to’atolu ona sui, ma sa fa’apea fo’i ona fa’alauiloa ai ma ta’ita’ifono o komiti mo itumalo ta’itasi i totonu o Tutuila ma Manu’a.O le susuga Lauvao Steve Haleck, o ia lea o le ta’ita’ifono o le komiti a Faoa/Taufete’e, i le lagolagosua a Faletogo Ilalio, e pei ona avea ai o ia ma sui ta’ita’ifono, ae o le tofa ia Malemo Tausaga ua filifilia e avea ma Teutupe.O isi ua filifilia e avea ma ta’ita’ifono mo itumalo ta’itasi e aofia ai Le’i Sonny Thompson mo Manu’a, o le afioga ia Asofa’afetai Maga ma le afioga ia Fa’amausili Mau Mau Jr mo le itumalo i Sasa’e, Paopaoailua Joe Fiaui mo itumalo ogatotonu, ma le afioga i le ali’i Senatoa ia Paogofie Fiaigoa ma Faletogo Ilalio mo le itumalo i Sisifo.O Faoa na amata avea ma lutena kovana i le 2003 ma fa’aauau mai ai lava seia o’o mai i le taimi nei.E tusa ai ma lona filifilia o Taufete’e, na saunoa Faoa, e le gata e mafai ona tauaveina e Taufete’e le tofiga kovana pe afai e to’esea le kovana, ae o ia fo’i o se tagata ua ia silafia lelei le malo i vaega ta’itasi.Na fa’aalia e Faoa.ua silia i le 40 tausaga o galue Taufete’e i tulaga fa’ata’ita’i, tamaoaiga atina’e, falema’i atoa ai ma le tofiga fou o le kapeneta e pei ona tofia i ai o ia e le kovana i le taimi nei.“O Taufete’e, o se ta’ita’i e toaga i le lotu, o le ta’ita’ifono o le ekalesia Katoliko a Nu’uuli, e tautua lotu,” o le saunoaga lea a Faoa.Na ta’ua fo’i e Faoa, o se tagata e fa’aaloalo i ai le atunu’u, e naunau ma pele ia te ia le aganu’u, aua o ia o se tagata o le aganu’u, e fiafia ma soifua ai, o ia fo’i o se failauga aloaia.“E tasi le to’alua moni fa’aipoipo, o se ali’i fai aiga lelei, e tausi ma le fa’amaoni i si ona faletua o Akenese, lea na soifua a’e i totonu o le atunu’u, e agamalu ma amio fa’atausala,” o a Faoa lea.O le isi ona agava’a o le falema’i, lea sa galue ai mo tausaga e 8 i le tulaga pule. E le gata ua masani ma iloa, ae ua talitonuina fo’i o ia. Saunoa Faoa, mai tausaga e 10 sa avea ai ma lutena kovana, ua ia iloa ma malamalama i galuega e fia fa’aleleila mo le falema’i, lea fo’i e mana’omia ai le lagolago a le Fono Faitulafono.E ese mai i agava’a o Taufete’e, sa fa’aalu fo’i e Faoa se taimi e talanoa ma fa’alauiloa ai nisi o ona agava’a, e pei o tausaga e tele sa galue ai i le Ofisa o le Loia Sili, Fono Faitulafono, ma se pisinisi Ofisa Fautua Fa’aloia. Sa ia taua o tulafono e fa’agaioi ai le malo, ma ua ia fiafia i si ona malamalama fa’aloia ua i ai, aua e pei lava na o ia le loia lea e tauva i le tauvaga lenei e i ai le malamalama fa’aletulafono. Sa ia taua fo’i, e fa’alua ona avea o ia ma teutupe a le malo.I manatu o nisi fai mai ua mana’omia se suiga, aua afai e tula’i mai Faoa, e leai lava se ‘ese’ese ma Togiola, na saunoa ai Faoa, e le o mea fou uma e lelei, aua e i ai ofu fou e fa’aofi atu e le ofi, ae i lona talitonuga, afai e i ai se mea fou, ia fa’aaoga ma le fa’afetai, aua e i ai le upu a le atunu’u fai mai, “o le mulu e tupu ai le laufa’ia,” ae i lona talitonuga, “ia taofiofi ma autalu le mea e manuia ma to’alima ai.”“A manuia tatou, e leai se mea o le a sui pe tape ai fua galuega lelei na amata e Togiola, po’o Tauese ma Lutali, vagana ua mautinoa e le taunu’u lelei ona sui lea,” o le saunoaga lea a Faoa. Sa ia taua fo’i, o le isi lea agava’a o Taufete’e na ia filifilia ai o ia, e mamafa lona silafia i le tamaiaoga ma lona atina’e, aua sa tele tausaga na galue ma pule ai i le Ofisa o Tamaoaiga Atina’e.Na fa’ai’u le saunoaga a Faoa i lona fa’apea mai, e le fa’apea e mafai ona la fofoina fa’afitauli uma o le malo ma si’itia vave i se tulaga maualuga fou, ae o le la ta’utinoga, o galuega e fia fa’atino pe a uma le palota, e fa’atino i luga o le iloa masani o le malo ma le atunu’u.