O le fa’atauaina ma le amanaiaina o i latou uma e a’afia i le gasegase o le mafaufau, o le autu lea o se sauniga pu’upu’u sa fa’ataunu’uina i le Malae o le Talu i Fagatogo i le taeao ananafi, lea na fa’atautaia e le Matagaluega o Tautua ma Auaunaga Lautele a le malo (DHSS).

O se tatalo pu’upu’u e tatala aloaia ai le polokalame na saunoa lea e le susuga a Canton Fano, a o lagiina e le faili pu a le Ekalesia Katoliko a Fagatogo viiga o le Atua, ma sa auai sui o le Matagaluega, faapea ai matua ma i latou e a’afia i le gasegase o le mafaufau.

I le avea ai o le masina lenei o Me o le masina e fa’ataua ai i totonu o le teritori i latou e a’afia i le gasegase o le mafaufau, sa mafai ai ona tolaulauina se poloaiga fa’alaua’itele na sainia e le afioga i le Lutena Kovana ia Lemanu Peleti Mauga, e talosagaina ai le atunu’u atoa ina ia tutu fa’atasi e lagolago ma fesoasoani ia i latou e a’afia i lenei gasegase.

I se vaega o le poloaiga fa’alaua’itele a le alii kovana le tumau sa ia taua ai e fa’apea, o le gasegase o le mafaufau, e le o se gasegase e faigofie, ae mafai ona faigofie pe afai e tutu fa’atasi aiga ma le atunu’u e fesoasoani ma lagolago i le tagata gasegase.

O manatu sa fa’afofogaina i le taimi o le sauniga, na taua ai le tatau lea ona ave le fa’ataua a tagata uma i le soifua maloloina, aua o iina o lo o i ai le olataga ma le ola fiafia o le tagata.

“A lelei ona tausi lou tino e sa’oloto fo’i lou mafaufau ma e ola fiafia,” o se vaega lea o le saunoaga a le susuga a Fano sa taitaia le sauniga lotu.

Ae na taua e le Pulesil lagolago o le polokalame ia Talalupelelei Fiso e fa’apea, e tatau i tagata uma o le atunu’u ona lagolago i le fa’amoemoe o lenei masina, o le ofo atu lea o le fesoasoani ia i latou e a’afia i lenei gasegase.

“O le autu o lenei masina, ia fa’ataua le soifua maloloina o le mafaufau, e tatau fo’i ona tu’u fa’atasi atu ai ma le lagolago atoa ai ma le fesoasoani mo i latou e a’afia i lenei gasegase,” o se vaega lea o le saunoaga a Fiso.

Saunoa le faletua ia Fiso e fa’apea, e ui o lenei gasegase e fa’aeteete gata mo nai fanau o lo o a’afia ai, ae faigofie mea uma pe afai e mafai ona ofo atu i ai e le atunuu le fesoasoani, e ala i le taliaina o i latou nei i so o se taimi latou te mana’omia ai le aapa atu o le atunuu, matua fa’apea aiga.

O ni isi o alo o le atunuu e a’afia i le gasegase o le mafaufau sa mafai ona fa’alauiloa a latou taleni i le taimi o le sauniga ananafi, e aofia ai le susuga ia Gummyboy Ala mai le vasega 11 a le Aoga Maualuga a Leone, faapea ai ma Michelle Tavai, o ia fo’i lea na sa’asa’a i le taimi o le taualuga.

O taleni e pei o pese sa mafai ona lagiina e i laua nei na maofa ai le au valaaulia i le taleni o lo o ia te i latou, ma vavala mai ai le manatu, e ui ina noanoatia i latou i le gasegase o le mafaufau, ae le o mafai ona noanoatia ai taleni ma fa’amanuiaga a le Atua mo i latou.

Na fa’ai’uina le sauniga i le fa’aleleina o paluni aga’i i le ea e fa’ailoa atu ai le momoli atu o le feau i le atunu’u atoa, ina ia tutu fa’atasi e lagolago i latou o lo o a’afia i lenei gasegase.