Ads by Google Ads by Google

Fa’ataua Ofisa o Fa’atoaga pisinisi ma fai fa’atoaga aso fu’a

E silia i le to’a 50 le aofa’i o le aufai fa’atoaga ma le aufai pisinisi ua fa’amoemoe e fa’alauiloa a latou oloa ma taumafa i le vaiaso o le sisiga fu’a i le masina o Aperila 2016, e pei ona fa’amaonia e le Fa’atonusili o le Matagaluega o Fa’atoaga a le malo i le fonotaga a le Komiti o le Fu’a i le aso Faraile na te’a nei i le potu fono a le ofisa o le ali’i kovana.

 

E pei ona fa’atula’i mai i le autu o lenei fa’amoemoe le anavatau, “Ia amanaia Tagata, Aganu’u ma le Lumana’i” i le sisigafu’a o lenei tausaga, na saunoa ai le afioga a Lealao M. Purcell e fa’apea, e to’a 30 le aufai pisinisi lea ua mae’a ona lesitala mo le fa’alauiloaina o a latou oloa i le vaiaso atoa a o lumana’i le sisiina o le fu’a, ae to’a 23 le aufai fa’atoaga.

 

O le aso Gafua e oo i le aso Faraile, Aperila 11-15, 2016 i le malae o le Su’iga’ula a le Atuvasa i Utulei, o le taimi lea ua fa’atulaga e le Komiti o le Fu’a e fa’alauiloa ai oloa ma taumafa a le aufai fa’atoaga, ma maua ai fo’i le avanoa o le atunu’u e aga’i atu ai e maimoa nei fa’aeleeleaga a le atunu’u.

 

O se tasi lenei o mataupu na taua e Lealao i luma o le Komiti o le Fu’a sa talanoaina i le fonotaga fa’apitoa a le aufai fa’atoaga, lea na faia i le aso Tofi na te’a nei i le potu fono a le Ofisa o Fa’atoaga i Tafuna.

 

Saunoa Lealao e fa’apea, o le agaga o le Ofisa, lea o lo o va’ava’alua ma le Ofisa o Fefa’atauaiga ma Alamanuia (DOC) a le malo i le fa’apolokalameina o lenei fa’aaliga i le vaiaso o le fu’a, e le gata ia maua le avanoa o le aufai pisinisi ma le aufai faatoaga e fa’alauiloa ai a latou oloa, ae o se avanoa lelei fo’i lea mo i latou uma e maua ai ni nai vaega tupe mai a latou oloa ma taumafa o le a fa’atauina atu.

 

Mo le aufai fa’atoaga, o le a tapena i latou mo le fa’atauina atu o fua o fa’aeleeleaga aemaise ai o taumafa vela mo le atunu’u.

 

Na fesili le afioga i le ali’i kovana ia Lolo Matalasi Moliga po o i ai ni aufai pisinisi mai Samoa o malaga mai mo le fu’a, peita’i o le tali sa tu’uina atu e le afioga i le Lutena Kovana ia Lemanu Peleti Mauga e le o aofia ai le aufai pisinisi mai Samoa i le polokalame o le fu’a o lenei tausaga.

 

“O le tausaga na te’a nei na talimalo ai Amerika Samoa i le fa’aaliga a le aufai pisinisi i le vaiaso o le sisigafu’a, peita’i la o le tausaga nei, ua fa’amoemoe e talimalo ai Samoa i le vaiaso o le latou fu’a, o le fa’aiuga lea o le masina o Me ma aga’i atu ai ia Iuni 1 2016 lea e fa’amanatu ai le fu’a,” o le saunoaga lea a Lemanu.

 

Ae saunoa Lolo e fa’apea, o le taua o faaaliga o oloa mai le aufai pisinisi i Samoa ma Amerika Samoa, e mafai ai fo’i ona maua ai le avanoa mo le aufai pisinisi i le atunu’u e fa’alauiloa a latou oloa i fafo atu o isi maketi, ina ia fesoasoani ai i le tau atina’eina o a latou pisinisi.

 

“E le tau fesiligia le tele o le sao o pisinisi i le atina’eina o le malo, o le tele o taimi o lo o fesoasoani mai ai le aufai pisinisi i ni isi o manaoga a le malo e pei o sailiga tupe mo au ta’aalo a le atunu’u, aemaise ai o isi lava manaoga e tula’i mai, e le mafai lava ona misi le tali mai a le aufai pisinisi, e tatau fo’i la i le malo ona latou galulue ma le aufai pisinisi i le siitia maualugaina lea o le fa’alauiloaina o a latou pisinisi,” o le saunoaga lea a le ali’i kovana.

 

I le tulaga o pisinisi ma le aufai fa’atoaga ua lautogia mo le vaiaso o le fu’a i Utulei, ua fa’aalia fo’i e le afioga i le ali’i fa’atonusili ia Toleafoa Henry Tavake o lo o pulea le malae taalo a le malo i Tafuna, e 10 avanoa ua ofo mai mo pisinisi e fia fa’atau a latou taumafa i le aso Gafua o le sisigafu’a.

 

E ui e le i fa’amautuina mai po o ai pisinisi o le a mauaina ia avanoa, peita’i na saunoa le ali’i fa’atonusili e fa’apea, e tutusa uma gaioiga e tatau ona ausia e le aufai pisinisi o le a fa’atau a latou oloa ma taumafa i Utulei, ma gaioiga e tatau ona ausia e le aufai pisinisi i totonu o le malae taalo a le Veterans Stadium i Tafuna, e pei o le i ai lea o “health cards” mo i latou o le a gafa ma le fa’atauina o taumafa, ae tatau fo’i ona pasia tulaga uma o loo moomia e le Matagaluega a le Soifua Maloloina.

 

Ua taoto fo’i le fautuaga mo le aufai fa’atoaga ina ia fa’aaoga lenei avanoa e fa’alauiloa ai ni isi o taumafa a Samoa mai aso ua mavae, ina ia maua ai le avanoa o le mamalu o le atunu’u latou te tofoina ai le matagofie o taumafa a le atunu’u sa soifua mai ai i aso ua mavae.

 

E pei ona taua e Lealao e fa’apea, o le to’atele o le aufai fa’atoaga sa maua le avanoa e fa’alauiloa ai a latou pisinisi ma taumafa i le vaiaso o le sisigafu’a o le tausaga ua mavae, sa latou molimauina le tele o se vaega tupe sa mafai ona latou maua, e fesoasoani ai i le tau atina’eina o a latou pisinisi i le atunu’u.