Ads by Google Ads by Google

Fa’atinoga o Tu ma Aganuu atunuu Eseese - ASCC Business

I kosi tau’ave a le fanau a’oga i mataupu fa’apisinisi a le Kolisi Tu’ufa’atasi Amerika Samoa, ua ese fo’i le ala e sailia ai e le fanau o tau’avea nei kosi o latou togi e agava’a ma tapena ai e fa’au’u.

 

O le aso ananafi Lua, na amatalia ai lea kosi ma sa maimoaina e le pulega o le Kolisi ma le vasega o faia’oga le fa’atinoga o tu ma aganu’u ia, ma o le a fa’amaonia ai ma togi o le a fa’amauina mo nei fanau sa fa’atinoa siva, o mea’ai eseese sa kukaina o matai’ai a atunu’u patino sa latou fa’atinoa latou agaifanua.

 

O le malo o Saina, o le Malo Eleni, le malo o Sipaniolo, sa maimoaina fa’atinoga matagofie tele.

 

“Pe afai e fua atu i le matagofie o nei siva ma agaifanua, e mafai lava ona fa’atino e fanau nei a latou siva, pesega ma meataumafa pe a o’o ina talimalo le Kolisi Tu’ufa’atasi i ni a latou malo fa’aaloalogia i le lumana’i,” o se tala lea a le tama’ita’i faia’oga ma o le fa’auluuluga o le vasega o mataupu fa’apisinisi a le Kolisi Tu’ufa’atasi Dr. Faofua Va’apu’u Fa’atoafe.

 

Sa auai fo’i i lea faatasiga ali’i faia’oga o mataupu fa’apisinisi a le Kolisi e aofia ai Ioapo Taua’i ma Vai Lam Yuen.

 

Saunoa ia Fa’atoafe, “O nei fanau sa tau le mafai ona ola feso’ota’i ma nisi tamaiti, e le faasoaina o latou lagona, e matele ina foliga mai e le fiafia e fa’amasani, peita’i, talu mai ona galulue fa’atasi e saili o latou togi i tu ma aga fa’apenei, ua ese le va’ai atu, ua alia’i mai se tagata fou ua ola feso’ota’i ma le fiafia e saili le atamai.”

 

“O le agaga atoa fo’i lea o lea taumafaiga, e le gata e maua ai togi o le fanau o fa’atinoa nei aganu’u, tu ma agaifanua e ese mai ia a latou lava, ae ua mafai ona malamalama atili ai i tatou i uiga o nisi o latou tagata o tatou nonofo fa’atasi i’inei,” o se fa’asoa mai lea a Vai Lam Yuen ina ua mae’a ona maimoaina le fa’atinoga matagofie a le fanau a’oga.

 

O le malo o Saina sa ma’eu fo’i le matagofie o taumafaiga a le fanau teine e to’afa sa nafa ma le siva e fa’aaogaina ai le ili saina. Ua la’eia fo’i e tama’ita’i e to’afa nei ofu saunia lelei fa’asaina, ma tama’ita’i Eleni ua latou la’eia ofu fa’atama’ita’i o Eleni.

 

O le ali’i Sipaniolo sa tautala o ia e fa’afeiloa’i le aofia na auai i le gagana sipaniolo ma ua matua ese ai le fa’alogo a le vasega o faia’oga. “Fa’afetai ua outou o ese mai le pusa sa puipuia ai i tatou i le gagana ma lagona ae maise o tu ma aga, ua outou tautala, fa’atino, sisiva ma kuka tausami ua fa’ailo o mataiai a nei fo’i malo, lea fo’i tatou te alaala fa’atasi ma le to’atele o tagatanu’u o nei malo i o tatou laufanua,” o se tautalaga fa’ai’u lea a le tama’ita’i o Sifagatogo Tuitasi  mai le vasega a le Admissions a le Kolisi Tu’ufa’atasi.

 

O le la’oai sa laulauina, na tapena lava lea e le vasega na fa’atinoga tu ma aga a nei atunu’u, ma sa iloga ai, ua ese fo’i le fofoga taumafa na latou laulauina peita’i e le’i fo’i ai le mamalu na aofia, sa matua talia ma le fiafia lea taumafataga e fa’ai’u ai le vasega o tu ma aga a le vasega o Pisinisi a le ASCC.