Ua fa’amaonia mai e le ASPA, ua mafai nei ona la’u atu e le mamalu lautele Lapisi tetele, u’amea, oloa eletoronisi e aofia ai pusa aisa, komipiuta, masini fa’apa’u falaoa etc, ina ia fuaina ma maua ai se fa’aitiitiga o latou pili uila ma le suavai taumafa.

“O lenei faiga, ua fa’atulaga ina ia mafai ona la’u atu e tagata latou lapisi nei e matele ina le la’uina mai e ta’avale la’u lapisi, ae lelei le fa’ao’o mai, ma avea fo’i ma se isi ala, e totogia ai pili o latou eletise ma le suavai.” O se fa’amatalaga lea a le sui sa talanoa mai o le vaega o Lapisi Lafoa’i a le ASPA i Tafuna.

I le ASPA fo’i latou, ua fa’ato’a maliu ai se tasi iloga sa tula’i mai ai i lea matata, ma o se tasi lava sa galue malosi ma fa’atino le tele o galuega lelei mo le atunu’u, le susuga Afonotele Petero Lafaele Mata’utia. Ona o lo’o avanoa lea itu o le tautua, o lea ua fa’atautaia ai le galuega e se tasi o suia ane i ai, ae ua fa’ailoa mai, o ni fuafuaga lelei tele, ma ua to’aga le atunu’u e la’u atu latou lapisi tetele nei mo lea fa’asiliga o se tupe e totogia ai latou pili uila ma le suavai.

Pe a mae’a aoina nei lapisi ma tu’u’ese’eseina i lona ituaiga, ona la’u lea e le ASPA i le nofoaga o lo’o lafoa’i i ai lapisi tetele nei i Futiga, e fa’aputu ai, ae tatalia le taimi e maua ai se kamupani e mafai ona latou fa’aaogaina oloa palasitika, ae tanumia atoa le oloa e le mafai ona toe fa’aaoga, lea e aofia ai le alumini, oloa tau tioata ma le palasitika.

E mautinoa e asia e le ASEPA lea fo’i nofoaga e lafoa’ia i ai le Lapisi lenei, ina ia talafeagai le ala o le a lafoa’i ai nei lapisi tetele, ma ala o tulafono fa’ataoto’oto a le atunu’u. Afai e leai, o le a aiaia loa le lafoa’ia o nei lapisi tetele i ala o tulafono ma aiaiga a le Malo tele.

ASTEO - Poloketi Lafoa’i o le Alumini, Tioata ma Palasitika

Ua fa’ailoa mai ua tulata ina fa’asalalau fa’alaua’itele ala e mafai ai e le atunu’u ona fa’ao’o ane a latou Oloa Alumini, Tiota ma Palasitika ina ia lafoa’i e tusa ma aiaiga o tulafono fa’ataoto a le tatou Malo ma le Malo Tele.

Ua mae’a talanoa mai le susuga Mike o le ASTEO, ua mae’a taua’aoina le Konekarate i le Kamupani a le GHC Reids mo le latou aoina o nei oloa tau Alamini, Tioata ma atigi fagu o so’o se ituaiga, fa’atasi ai ma Oloa palasitika po’o le Una, i le ogatotonu o lenei tausaga.

“Ua mae’a taua’aoina le konekarate i le masina o Aukuso 2012, peita’i, e le’i i ai ni tala fa’asalalauina fa’alaua’itele ina ia silafia e le atunu’u, ona o lo’o tatalia le o’o mai o Masini tetele e fa’aaoga mo le amatalia o le galuega toe fa’aaoga o nei lapisi.”

E ui la ina o lea ua aoina e le ASPA le palasitika, ae o se mea lelei fo’i, o lo’o latou fa’aputuina fa’alelei se’ia o’o ina mafai e le Konekarate lea ona talia nei ituaiga o lapisi, ona toe fa’ao’o ane lea e toe fa’aaoga ai. Ae o le mea sili, ua mae’a ona aoina mai i tua i aiga ma afio’aga ta’itasi i lenei vaitaimi.

O le tala mai e tusa ma le $464,019. le ofo na malo ai le GHC Reids i lea fo’i tauofoga. O le tinoitupe o le a fa’atautaia ai lenei galuega lelei e le ASTEO ma ua totogia ai fo’i le GHCReid i lana ofo ua manumalo nei, o se vaega tupe mai le USTEO. O se tasi lea poloketi ua leva ona fa’ataoto mai e le TEO mo lenei tausaga ia to’ai taunu’u ai, ia fesoasoani i galuega fa’amama atili o le atunu’u.