Ads by Google Ads by Google

Fa'ailoa i ripoti le si'itia auaunaga a le falema'i o le LBJ

Ua taua i le ripoti o galuega fa'atino mo le Kuata 4 o le Tausaga Tupe 2014 a le Falema'i o le LBJ le si'itia o ni isi o ana tautua mo le atunu'u, e pei o le fa'aopoopo lea o foma'i ua fai laisene ua mafai ona aga'i mai e galulue i le falema'i, atoa ai ma le si'itia lea o le itu tau tupe e fa'aleleia atili ai lana tautua.

 

O ni isi o suiga e pei ona taua i le ripoti, o lo o atagia mai ai le mulimulita'i o le LBJ i ni isi o ta'iala o lo o fa'ataoto mai e le Ofisa Tutotonu o le Medicare ma le Medicaid (Centers of Medicaid and Mediare Services - CMS), e ao ona lima ta'ita'iina ai galuega fa'atino a le falema'i mo le puipuia o le soifua maloloina o le atunu'u.

 

O ni isi o ia ta'iala e pei ona taua i le ripoti, o le i ai lea o se tausima'i ua lesitala (RN) e galue i sifi ta'itasi, ina ia mafai ai ona fesoasoani i le galuega a le falema'i o lo o ta'iulu i ai togafitiga ma le tausiga o le soifua maloloina o gasegase.

 

O lo o taua fo'i i le ripoti le si'itia o le tulaga ua i ai vaega taitasi a le falema'i, e aofia ai le toe fa'afouina o isi potu e togafiti ai tagata, fale'aiga, atoa ai ma le fa'aea malulu o isi vaega uma o lo o tautua ma togafiti ai le mamalu o le atunu'u.

 

E 58 teine tausima'i o lo o galulue i le LBJ ua uma ona lesitala (RN), ma le isi toa 58 o lo o aooga pea mo le fa'amae'aina o vasega e mafai ai ona lesitala i latou, ina ia agava'a ai i latou i ni isi o ta'iala ua mae'a ona tu'uina mai e le CMS e ao ona mulimulita'i ai le pulega a le LBJ.

 

I le tulaga o tupe maua a le LBJ, o lo o taua ai le si'itia o tupe maua a le LBJ i le to'atele o tagata na asia le falema'i, i le taimi na pipisi ai le fa'ama'i o le fa'ama'i ma le siama o le 'chiungunya' lea na a'afia ai le atunu'u i ni nai masina e le i mamao atu.

 

E 115,986 le aofa'i o tagata mama'i o lo o taua i le ripoti sa latou asia le falema'i i le kuata 4 o le tausaga tupe 2013, lea e $901,187 le aofa'i o le tupe sa mafai ona maua mai ai, peita'i o le kuata 4 o le tausaga tupe 2014, e tusa ma le to'a 118,184 le aofa'i o tagata sa latou asia le falema'i, o se fa'aopoopoga fo'i lea i tupe maua a le falema'i i le aofa'iga e $1,028,495 sa mafai ona maua mai ai, tusa lea e 14% ua si'itia ai tupe maua nai lo le 2013.

 

O lo o taua i se vaega o lenei ripoti e fa'apea, o vaega sa pito sili ona maitauina ai le fa'aopoopo o tagata na asia le falema'i, e le gata o le potu e taunu'u i ai gasegase tigaina, ae fa'apea fo'i i isi vaega o le falema'i o lo o mafai ona ofo atu ai tautua mo le tausiaina o le soifua maloloina o le atunu'u.

 

O isi vaega o lo o taua i totonu o le ripoti o tulaga i le tautua a le fale'aiga a le falema'i, lea o lo o mafai ona latou kukaina taumafa paleni ma le soifua maloloina mo le fofoga taumafa o le atunu'u, o iina fo'i le isi alagatupe o lo o maua mai ai.

 

O lo o taua fo'i i le ripoti le siitia o tupe maua mai le fale'aiga a le falema'i i le aofa'i e $222,832 i le kuata 4 o le tausaga tupe 2014, pe a fa'atusatusa i le $169,678 sa maua i le kuata 4 o le tausaga tupe 2013.

 

I le aotelega o tupe maua a le falema'i sa maua i le kuata 4 ua atagia mai ai le si'itia i le aofaiga e $174,278, tusa lea o le aofa'i atoa e $1.2 miliona, pe a fa'atusatusa i le tulaga maualalo sa i ai le kuata 4 o le tausaga tupe 2013.

 

O le agaga atoa o le Komiti Fa'afoe a le falema'i, ia lelei le tulaga o tupe maua a le falemai, lelei le sau i totonu o vailaau ma fualaau, atoa ai ma le lava o foma'i e galulue mo le tausiga o le soifua maloloina o le atunuu atoa, ae sili ai i lo lena, ia mafai ona fa'aitiitia pili a le falema'i ina ia gafatia e le atunu'u ona totogi.